ລັດຖະມົນຕີ ກະຊວງ ຖວທ ຕ້ອນຮັບ ເອກອັກຄະລັດຖະທູດ ສະຫະພາບ ເອີຣົບ ແລະ ເອກອັກຄະລັດຖະທູດ ຝຣັ່ງ ເຂົ້າຢ້ຽມຂຳ່ນັບ

ລັດຖະມົນຕີ ກະຊວງ ຖວທ ຕ້ອນຮັບ ເອກອັກຄະລັດຖະທູດ ສະຫະພາບ ເອີຣົບ ແລະ ເອກອັກຄະລັດຖະທູດ ຝຣັ່ງ ເຂົ້າຢ້ຽມຂຳ່ນັບ

20th November 2019 0 By Lao Admin

ໃນວັນທີ 19 ພະຈິກ 2019 ທີ່ນະຄອນຫລວງວຽງຈັນ, ທ່ານ ກິແກ້ວ ໄຂຄໍາພິທູນ ລັດ ຖະມົນຕີ ກະຊວງຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ (ຖວທ) ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ Leo Faber ເອກອັກຄະລັດຖະທູດ ສະຫະພາບ ເອີຣົບ ຫຼືອີຢູ ປະຈຳລາວ ເພື່ອສະແດງຄວາມຍິນດີ ກັບທ່ານ ກິແກ້ວ ໄຂຄໍາພິທູນ ທີ່ມາຮັບຕຳ ແໜ່ງໃໝ່ເປັນ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃນວ່າງບໍ່ດົນມານີ້. ທັງສອງໄດ້ຍ້ອງຍໍຊົມເຊີຍການຮ່ວມມືທີ່ດີລະຫວ່າງສອງຝ່າຍໃນໄລຍະຜ່ານມາ ແລະ ໂອ້ລົມກ່ຽວກັບການຮ່ວມມື ໃນອານາຄົດ ໂດຍສະເພາະແມ່ນທາງດ້ານດົນຕີ ແລະ ຮູບເງົາ.

ໃນມື້ດຽວກັນນີ້ ທ່ານ ນາງ Florence Jeanblanc-Risler ພາຍຫລັງມາດຳລົງຕຳແໜ່ງເປັນເອກອັກຄະລັດຖະທູດ ຝຣັ່ງ ຄົນໃໝ່ ປະຈຳ ສປປ ລາວ. ກໍ່ໄດ້ເຂົ້າຢ້ຽມຂ່ຳນັບ ທ່ານ ກິແກ້ວ ໄຂຄໍາພິທູນ, ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ການມາຢ້ຽມຢາມຂອງ ທ່່ານເອກອັກຄະລັດຖະທູດ ເຊິ່ງເຫັນໄດ້ເຖິງຄວາມສຳຄັນຕໍ່ວຽກງານຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມທັງຕີລາສູງຕໍ່ການຮ່ວມມື ລະຫວ່າງ ສປປ ລາວ ແລະ ຝຣັ່ງ, ໂດຍສະເພາະລະຫວ່າງກະຊວງ ຖວທ ຂອງລາວ ແລະ ສະຖານທູດຝຣັ່ງ ທີ່ເຫັນວ່າໄດ້ຮັບໝາກຜົນ ແລະ ມີຜົນສຳເລັດໃນຫລາຍດ້ານຕະຫລອດໄລຍະເວລາທີ່ຜ່ານມາ.

 

ໃນຂະນະດຽວກັນ, ຜົນສຳເລັດດັ່ງ ກ່າວ ຈະເປັນພື້ນຖານອັນສຳຄັນ ແລະ ໜັກແໜ້ນ ໃຫ້ແກ່ການສືບຕໍ່ການຮ່ວມມືຂອງສອງຝ່າຍໃນຕໍ່ໜ້າ.

 

ທີ່ມາ: Lao National Radio