ໃກ້​ເປັນ​ປົກ​ກະ​ຕິແລ້ວ​ເຮົາ 32 ມື້​ປອດ​ເຊື້ອ​ໂຄວິດ ຍັງ​ຕິດ​ຕາມ​ອາ​ການ​ພຽງ 5 ຄົນ

ໃກ້​ເປັນ​ປົກ​ກະ​ຕິແລ້ວ​ເຮົາ 32 ມື້​ປອດ​ເຊື້ອ​ໂຄວິດ ຍັງ​ຕິດ​ຕາມ​ອາ​ການ​ພຽງ 5 ຄົນ

14th May 2020 0 By Admin

ເປັນເວລາ 1 ເດືອນກວ່າ ປະມານ 32ມື້ລຽນຕິດແລ້ວ ທີ່ ສປປ ລາວ ເຮົາບໍ່ມີຜູ້ຕິດເຊື້ອໂຄວິດ-19 ເພີ່ມ, ສ່ວນຄົນເຈັບກໍ່ສາມາດປິ່ນປົວຫາຍດີອອກໂຮງໝໍແລ້ວ 14 ຄົນ, ເຮັດໃຫ້ຍັງມີຄົນເຈັບສືບຕໍ່ຕິດຕາມອາການຢູ່ໂຮງໝໍພຽງ 5 ຄົນເທົ່ານັ້ນ ເຊິ່ງເຂົາເຈົ້າເຫຼົ່ານັ້ນ ມີອາການປົກກະຕິດີ.

ໃນວັນທີ 14 ພຶດສະພາ 2020 ທີ່ກະຊວງສາທາລະນະສຸກ ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໄດ້ມີການຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ-19 ໂດຍການຖະແຫຼງຂອງທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ຜູ້ປະຈໍາການຄະນະສະເພາະກິດ ໂດຍມີສື່ມວນຊົນຈາກຫຼາຍພາກສ່ວນເຂົ້າຮ່ວມ.

ທ່ານ ຮສ.ດຣ ພູທອນ ເມືອງປາກ ໃຫ້ຮູ້ວ່າ: ໃນວັນທີ 13 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 117 ຄົນ, ໃນນັ້ນ ມີກໍລະນີສົງໄສ 38 ຄົນ ແລະ ແຮງງານລາວທີ່ກັບມາຈາກປະເທດໄທ 79 ຄົນ, ເຊິ່ງຜົນກວດທັງໝົດຂອງມື້ວານນີ້ ບໍ່ພົບຜູ້ຕິດເຊື້ອ. ນັ້ນໝາຍຄວາມວ່າ ໃນວັນທີ 13 ພຶດສະພາ 2020 ບໍ່ມີຜູ້ຕິດເຊື້ອໃໝ່. ສໍາລັບການສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 13 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 4.092 ຕົວຢ່າງ, ກວດພົບເຊື້ອສະສົມ 19 ຄົນ (32 ມື້ແລ້ວທີ່ບໍ່ພົບຜູ້ຕິດເຊື້ອໃໝ່). ດ້ານການຕິດຕາມປີ່ນປົວຄົນເຈັບຢູ່ໂຮງໝໍ, ປັດຈຸບັນມີຜູ້ນອນຕິດຕາມຢູ່ໂຮງໝໍມິດຕະພາບ 5 ຄົນ, ຍີງ 4 ຄົນ ທັງໝົດເຫັນວ່າມີອາການປົກກະຕິ.

ທ່ານ ກ່າວຕື່ມວ່າ: ການຈັດຕັ້ງປະຕິບັດແຈ້ງການ 524/ຫສນຍ ກ່ຽວກັບການຜ່ອນຜັນບາງມາດຕະການ ຮອດວັນທີ 17 ພຶດສະພາ ນີ້ກໍ່ຍັງພຽງແຕ່ 2-3 ວັນ ແຕ່ຍັງມີຄວາມຈຳເປັນທີ່ຈະຕ້ອງໄດ້ເອົາໃຈໃສ່ ວິທີປ້ອງກັນການຕິດເຊື້ອ ແລະ ວິທີປ້ອງກັນການແຜ່ເຊື້ອພະຍາດ ເພື່ອສະກັດກັ້ນບໍ່ໃຫ້ມີກໍລະນີໃໝ່ເກີດຂຶ້ນ.

ປັດໄຈສໍາຄັນທີ່ສຸດ ແມ່ນຂຶ້ນກັບຄວາມຮັບຜິດຊອບຂອງທຸກພາກສ່ວນທີ່ເປີດການບໍລິການຄືນໃໝ່ ວ່າຈະປະຕິບັດມາດຕະການໄດ້ຖືກຕ້ອງ ເຂັ້ມງວດສ່ຳໃດ ແລະ ຂື້ນກັບພຶດຕິກໍາຂອງພວກເຮົາໝົດທຸກຄົນທີ່ຈະປັບປຸງວິຖີຊີວິດໃໝ່ຂອງຕົນ ຕາມຄຳແນະນຳຂອງຄະນະສະເພາະກິດ.