ຈັດຕັ້ງງານຊາປານະກິດທ່ານ ພົນ​ເອກ ສີສະຫວາດ ແກ້ວບຸນພັນ ຢ່າງສົມກຽດ

ຈັດຕັ້ງງານຊາປານະກິດທ່ານ ພົນ​ເອກ ສີສະຫວາດ ແກ້ວບຸນພັນ ຢ່າງສົມກຽດ

13th May 2020 0 By Admin

ທ່ານ ສີສະຫວາດ ແກ້ວບຸນພັນ ເປັນລູກຂອງທ່ານບຸນຊູ ແລະ ນາງ ປ້ານ ທ່ານ ໄດ້ສ່ວງຄອບຄົວກັບ ນາງຫຼ້າ ແກ້ວບຸນພັນ ມີລູກນຳກັນ 4 ຄົນເປັນຍິງທັງໝົດ ປະຈຸບັນຢູ່ບ້ານໜອງບອນເມືອງໄຊເສດຖາ ນະຄອນຫຼວງວຽງຈັນ .

ທ່ານ ພົນເອກ ສີສະຫວາດ ແກ້ວບຸນພັນ ແມ່ນຜູ້ນໍາຮຸ່ນທໍາອິດຂອງພັກ ແລະ ລັດເຮົາທີ່ ໄດ້ອຸທິດຊີວິດຂອງຕົນຕິດພັນກັບການຕໍ່ສູ້ກູ້ຊາດຕ້ານຈັກກະພັດລ່າເມືອງຂຶ້ນແບບເກົ່າ ແລະ ໃຫມ່. ສະຫາຍແມ່ນນັກຮົບປະຕິວັດຜູ້ອົງອາດທີ່ເກັ່ງກ້າສາມາດ, ມີນ້ໍາໃຈເສຍສະຫຼະອັນສູງສົ່ງ, ເປັນຫນຶ່ງ ໃນບັນດານາຍທະຫານນໍາພາ-ບັນຊາ ທີ່ດີເດັ່ນ ເປັນທີ່ເຄົາລົບຮັກຂອງກໍາລັງປະກອບອາວຸດ ແລະ ປະຊາຊົນລາວບັນດາເຜົ່າ, ແມ່ນພະນັກງານການນໍາທີ່ມີແບບແຜນນໍາພາທີ່ດີ, ມີຄວາມສາມັກຄີ ເປັນເອກະພາບພາຍໃນພັກ ແລະ ຢຶດຫມັ້ນໃນອຸດົມການປະຕິວັດຢ່າງສູງສົ່ງ ໃນພາລະກິດປະຕິວັດ ປົດປອຍຊາດ, ປົກປັກຮັກສາ ແລະ ສ້າງສາລະບອບໃຫມ່.

ດ້ວຍຜົນງານ ແລະ ຄຸນງາມຄວາມດີທີ່ສະແດງອອກເຖິງຄຸນສົມບັດສິນທໍາປະຕິວັດອັນຜ່ອງ ໃສ ແລະ ຄວາມຮັກເຊື້ອແພງຊາດທ່ານໄດ້ຮັບຄວາມໄວ້ເນື້ອເຊື່ອໃຈ ແລະ ຄວາມເຄົາລົບຮັກ ຈາກສະມາຊິກພັກ, ພະນັກງານ, ນັກຮົບ ແລະ ປະຊາຊົນລາວບັນດາເຜົ່າກໍ່ຄືປະເທດເພື່ອນມິດຢ່າງ ກວ້າງຂວາງ, ເພື່ອ ເປັນການສັນລະເສີນກຽດຕິຄຸນຂອງສະຫາຍ, ພັກ ແລະ ລັດຖະບານ ໄດ້ຕົກລົງ ມອບຫຼຽນໄຊຂັ້ນສູງປະເພດຕ່າງໆໃຫ້ແກ່ທ່ານ ດັ່ງນີ້:
ຫຼຽນ ຄໍາແຫ່ງຊາດ ສປປ ລາວ 1 ຫຼຽນ – ຫຼຽນ ຄໍາແຫ່ງຊາດ ສສຫວຽດນາມ 1 ຫຼຽນ – ຫຼຽນໄຊ ອິດສະຫຼະ ຊັ້ນ I. 4 ຫຼຽນ – ຫຼຽນໄຊ ອິດສະຫຼະ ຊັ້ນ II 2 ຫຼຽນ
ນອກຈາກນັ້ນ ຍັງໄດ້ຮັບຫຼຽນໄຊ, ຫຼຽນກາ, ຫຼຽນລະນຶກ ແລະ ຫຼຽນມິດຕະພາບ ທີ່ສໍາຄັນ ເປັນຈໍານວນຫຼວງຫຼາຍ ຈາກພາຍໃນ ແລະ ຕ່າງປະເທດ.

ດັ່ງນັ້ນ, ເພື່ອສະເເດງເຖິງຄວາມຮູ້ບຸນຄຸນ ແລະ ອາໄລອາວອນຢ່າງສຸດຊຶ້ງ ຕໍ່ທ່ານ ພົນເອກ ສີສະຫວາດ ແກ້ວບຸນພັນ ອະດີດ ກໍາມະການສູນກາງພັກ ສະໄຫມທີ I, II, II, IV, V, VI, VII ແລະ VIII. ອະດີດ ເລຂາທິການສູນກາງພັກ ສະໄຫມທີ III, IV, ອະດີດກໍາມະການກົມການເມືອງສູນກາງພັກ, ສະໄຫມທີ IV, VI, VII ແລະ VIII, ອະດີດນາຍົກລັດຖະມົນຕີ, ອະດີດຮອງປະທານປະເທດ, ອະດີດປະທານສູນກາງ ເເນວລາວສ້າງຊາດ, ອະດີດຫົວຫນ້າເສນາທິການສູງສຸດກອງທັບປະຊາຊົນລາວ, ອະດີດລັດຖະມົນຕີປະຈໍາ ສໍານັກງານນາຍົກລັດຖະມົນຕີ, ອະດີດລັດຖະມົນຕີກະຊວງປ້ອງກັນຄວາມສະຫງົບ, ອະດີດເລຂາຄະນະ ພັກ, ປະທານຄະນະປົກຄອງກໍາແພງນະຄອນຫຼວງວຽງຈັນ, ອະດີດລັດຖະມົນຕີກະຊວງກະສິກໍາ ແລະ ປ່າໄມ້ ແລະ ອະດີດເລຂາທິການສູນກາງຊາວຫນຸ່ມປະຊາຊົນປະຕິວັດລາວ ໄດ້ເສຍຊີວິດແລ້ວໃນເວລາ 07 ໂມງ 00 ນາທີ ຂອງວັນທີ 12 ພຶດສະພາ 2020.

ກົມການເມືອງສູນກາງພັກໄດ້ອອກຂໍ້ຕົກລົງສະບັບເລກທີ 109/ກມສພ ນະຄອນຫຼວງວຽງຈັນ, ວັນທີ 12/5/2020  ວ່າດ້ວຍການແຕ່ງຕັ້ງຄະນະຮັບຜິດຊອບງານຊາປະນະກິດສົບທ່ານ ພົນເອກ ສີສະຫວາດ ແກ້ວບຸນພັນ ທັງໝົດ 19 ທ່ານ ນຳໂດຍທ່ານທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄອບຄົວແກ້ວບຸນພັນ ຈັດຕັ້ງປະຕິບັດງານຊາປານະກິດສົບຂອງທ່ານ ສີສະຫວາດ ຢ່າງສົມກຽດ ແລະ ມີຄວາມເປັນລະບຽບຮຽບຮ້ອຍ.

.

ຈາກ: https://www.laothai.net/