ຫ້ອງວ່າການປົກຄອງເມືອງ ທ່າແຕງ ບົ່ງຕົວແຕ່ງຕັ້ງເລຂາໜ່ວຍພັກຄົນໃໝ່

ຫ້ອງວ່າການປົກຄອງເມືອງ ທ່າແຕງ ບົ່ງຕົວແຕ່ງຕັ້ງເລຂາໜ່ວຍພັກຄົນໃໝ່

12th May 2020 0 By Admin

ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່,ຫຼາຍອົງການຈັດຕັ້ງລວມທັງສູນກາງ ແລະ ທ້ອງຖິ່ນ ໄດ້ມີການໂຍກຍ້າຍໜ້າທີ່ຕໍາແໜ່ງຂອງພະນັກງານລັດຖະກອນ ແນໃສ່ເຮັດໃຫ້ການຈັດຕັ້ງປະຕິບັດວຽກງານດັ່ງກ່າວໃຫ້ມີປະສິທິພາບຍິ່ງໆຂຶ້ນເຊິ່ງເມືອງ ທ່າແຕງ ແຂວງ ເຊກອງ ໄດ້ມີການໂຍກຍ້າຍໜ້າທີ່ພະນັກງານການນຳໃນລະດັບຂັ້ນເມືອງຂຶ້ນ.

ພິທີດັ່ງກ່າວມີຂຶ້ນວັນທີ 11 ພຶດສະພາ 2020,ທີ່ສະໂມສອນຂອງເມືອງ ໂດຍການເຂົ້າຮ່ວມເປັນປະທານຂອງສະຫາຍ ສົມເພັດ ເອິດລັດດາ ເລຂາພັກເມືອງ ທ່າແຕງ,ມີຄະນະປະຈໍາພັກເມືອງ,ກໍາມະການພັກເມືອງພ້ອມດ້ວຍສະມາຊິກພັກ
ແລະ ພາກສ່ວນກ່ຽວຂ້ອງເຂົ້າຮ່ວມ.


ສະຫາຍ ເພັດຕຸລາ ສຸດທິຈັກ ຮອງຫົວໜ້າຄະນະຈັດຕັ້ງເມືອງທ່າແຕງ ຊີ້ແຈງວ່າໂດຍສືບຕໍ່ປະຕິບັດກົດລະບຽບຂອງພັກສະໄໝທີ X ,ໝວດທີ II,ມາດຕາ 13 ວ່າດ້ວຍການບົ່ງຕົວແຕ່ງຕັ້ງ,ຍົກຍ້າຍ ແລະ ການສິ້ນສຸດເປັນຄະນະພັກ,ດັ່ງນັ້ນ ຄະນະປະຈໍາພັກເມືອງທ່າແຕງ ຈິ່ງໄດ້ບົ່ງຕົວຕົກລົງແຕ່ງຕັ້ງເລຂາໜ່ວຍພັກຫ້ອງວ່າການເມືອງ ທ່າແຕງ,ສະບັບເລກທີ 63/ຄຈພມ,ລົງວັນທີ 11 ພຶດສະພາ 2020 ໂດຍແຕ່ງຕັ້ງສະຫາຍ ກິ ສາຍອຸດົມ ກໍາມະການພັກເມືອງ ຫົວໜ້າຫ້ອງວ່າການປົກຄອງເມືອງ ເປັນເລຂາໜ່ວຍພັກຫ້ອງວ່າການເມືອງ ທ່າແຕງ ຄົນໃໝ່ ເນື່ອງຈາກວ່າເລຂາໜ່ວຍພັກຜູ້ເກົ່າການຍົກຍ້າຍໜ້າທີ່ຕໍາແໜ່ງໄປຢູ່ບ່ອນໃໝ່.

ເຊິ່ງພິທີຄັ້ງນີ້ ຍັງໄດ້ທາບທາມ ພ້ອມທັງປ່ອນບັດເລືອກຕັ້ງເອົາບຸກຄະລາກອນເປັນຮອງເລຂາໜ່ວຍພັກ,ຮັບຟັງບົດບັນຍັດຂອງທ່ານເຈົ້າເມືອງ ທ່າແຕງ ພ້ອມພາລະບົດບາດຂອງຫ້ອງວ່າການເມືອງທ່າແຕງຊຸດໃໝ່ຢ່າງຈະແຈ້ງ.


ໂອກາດນີ້ ສະຫາຍ ສົມເພັດ ເອິດລັດດາ ເລຂາພັກເມືອງ ທ່າແຕງ ໄດ້ກ່າວເນັ້ນຫຼາຍດ້ານທີ່ພົ້ນເດັ່ນໃນໄລຍະຜ່ານມາ ແລະ ຍັງມີບາງດ້ານທີ່ເລຂາໜ່ວຍພັກຄົນໃໝ່ ຕ້ອງສືບຕໍ່ໜ້າທີ່ວຽກງານທີໄດ້ຮັບມອບໝາຍ,ພາລະກິດຂອງພັກ-ລັດ ໃຫ້ດີຂຶ້ນກວ່າເກົ່າ.ໂດຍສະເພາະ ແມ່ນເພີ່ມທະວີສຶກສາອົບຮົມການເມືອງໃຫ້ສະມາຊິກພັກມີຄຸນທາດການເມືອງໜັກແໜ້ນ,ອຸ່ນອ່ຽນທຸ່ນທ່ຽງ,ຈຳແນກມິດສັດຕູຢ່າງຈະແຈ້ງ,ຕັ້ງໜ້າຝຶກຝົນຫຼໍ່ຫຼອມຕົນເອງ,

ເພີ່ມທະວີຮັກສາມູນເຊື້ືອ,ເປັນແບບຢ່າງການປະຕິບັດລະບຽບຂອງພັກ-ກົດໝາຍຂອງລັດ,ມີແບບແຜນດຳລົງຊີວິດທີ່ດີ,ປັບປຸງແບບແຜນວິທີເຮັດວຽກ,ຊອກໃຫ້ເຫັນທ່າແຮງບົ່ມຊ້ອນຂອງແຕ່ລະສະຫາຍ ແລ້ວມອບວຽກງານໃຫ້ຕາມຄວາມສາມາດຕົວຈິງ,ຮັກສາຄວາມສາມັກຄີພາຍໃນໃຫ້ແໜ້ນແຟ້ນ,ສືບຕໍ່ປະຕິບັດແນວທາງນະໂຍບາຍຂອງພັກໃຫ້ຖືກຕ້ອງ ແລະ ທັນເວລາ, ຮ່ວມດຳເນີນຊີວິດເປັນປົກກະຕິ ເພື່ອຕໍານິສົ່ງຂ່າວຊ່ວຍເຫຼືອເຊິ່ງກັນແລະກັນ ພ້ອມທັງຕີລາຄາປະເມີນຜົນການເຄື່ອນໄຫວນໍາພາແຕ່ລະໄລຍະໃຫ້ເປັນປົກກະຕິ.


ໂດຍ: ພອນ ບຸນອຸທິດ 020 5632 8844
ເພື່ອນຮ່ວມງານ 12/5/2020