29 ມ​ື້​ແຫ່ງ​ຄວາມ​ພາກ​ພູມ​ໃຈ​ຂອງ​ແພດ​ໝໍ, ຄົນ​ລາວ​ທັງ​ຊາດ ບໍ່​ພົບ​ຜູ້​ຕິດ​ເຊື້ອ​ເພີ່ມ

29 ມ​ື້​ແຫ່ງ​ຄວາມ​ພາກ​ພູມ​ໃຈ​ຂອງ​ແພດ​ໝໍ, ຄົນ​ລາວ​ທັງ​ຊາດ ບໍ່​ພົບ​ຜູ້​ຕິດ​ເຊື້ອ​ເພີ່ມ

11th May 2020 0 By Admin

ວັນທີ 11 ພຶດສະພາ, ຄະນະສະເພະາກິດລາຍງານວ່າສປປລາວບໍ່ມີກໍລະນີຕິດເຊື້ອພະຍາດໂຄວິດ-19 ເປັນມື້ທີ29ແລ້ວ, ຍອດຜູ້ຕິດເຊື້ອສະສົມຢູ່ທີ19 ຄົນ; ໃນນີ້ອອກໂຮງໝໍແລ້ວ13 ຄົນ, ຍັງນອນຕິດຕາມອາການຢູ່ໂຮງໝໍ6 ຄົນ.

ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ຜູ້ປະຈໍາການ ຄະນະສະເພາະກິດ ໄດ້ຖະແຫຼງຂ່າວປະຈຳວັນທີ 11 ພຶດສະພາວ່າ:ໃນວັນທີ 10 ພຶດສະພາ 2020 ໄດ້ເກັບຕົວຢ່າງມາກວດທັງໝົດ 360 ຄົນ, ໃນນັ້ນ ມີກໍລະນີສົງໄສ 16 ຄົນ, ແຮງງານລາວທີ່ກັບມາຈາກປະເທດໄທ 299 ຄົນ ແລະ ແຮງງານໄທທີ່ເຂົ້າມາແປງສາຍໄຟຟ້າຢູ່ແຂວງໄຊຍະບູລີ 45 ຄົນ.

ຜົນກວດທັງໝົດຂອງແຮງງານລາວ, ແຮງງານໄທ ທີ່ເຂົ້າມາ ແລະ ກໍລະນີສົງໄສຂອງມື້ວານນີ້ ບໍ່ພົບເຊື້ອ. ໝາຍຄວາມວ່າໃນວັນທີ 10 ພຶດສະພາ 2020 ບໍ່ມີຜູ້ຕິດເຊື້ອໃໝ່(29 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).

ປະຈຸບັນນີ້ ມີຜູ້ນອນຕິດຕາມຢູ່ໂຮງໝໍມິດຕະພາບ 6 ຄົນ ລວມທັງນ້ຳເບີ 14 ທີ່ເອົາກັບຄືນມານອນຕິດຕາມອາການຢູ່ໂຮງໝໍ, ທັງໝົດເຫັນວ່າມີອາການເບົາບາງ ແລະ ສືບຕໍ່ຕິດຕາມອາການ ແລະ ກວດວິເຄາະຊອກຫາເຊື້ອອີກໃນໜື່ງອາທິດຕໍ່ໜ້າ.

.

ການປະຕິບັດມາດຕະການຜ່ອນຜັນ ຮອດວັນທີ 17 ພຶດສະພາ ຍັງມີຄວາມຈຳເປັນທີ່ຈະຕ້ອງໄດ້ເອົາໃຈໃສ່ ວິທີປ້ອງກັນການຕິດເຊື້ອ ແລະ ການແຜ່ເຊື້ອພະຍາດ ເພື່ອສະກັດກັ້ນບໍ່ໃຫ້ມີກໍລະນີໃໝ່ເກີດຂຶ້ນ. ປັດໄຈສໍາຄັນທີ່ສຸດ ແມ່ນຂຶ້ນກັບພຶດຕິກໍາຂອງພວກເຮົາໝົດທຸກຄົນທີ່ຈະປັບປຸງວິຖີຊີວິດໃໝ່ຂອງຕົນ ຕາມຄຳແນະນຳຂອງຄະນະສະເພາະກິດ ເຊິ່ງຄະນະສະເພາະກິດຈະໄດ້ປະເມີນສະພາບການຄືນໃໝ່ ວ່າຄວນສືບຕໍ່ປະຕິບັດມາດຕະການໃດຕື່ມ ຫຼື ຄວນຈະຍົກເລິກມາດຕະການໃດຕື່ມອີກ.


ສະນັ້ນ, ຈຶ່ງຮຽກຮ້ອງໃຫ້ທຸກພາກສ່ວນໃນສັງຄົມ ມີຄວາມອົດທົນພະຍາຍາມ ເອົາໃຈໃສ່ ຮ່ວມແຮງຮ່ວມໃຈກັນ ຈັດຕັ້ງປະຕິບັດຄຳແນະນຳ ແລະ ມາດຕະການຕ່າງໆ ໃຫ້ຖືກຕ້ອງ ແລະ ເຂັ້ມງວດ. ໂດຍສະເພາະ ການລ້າງມືດ້ວຍນໍ້າສະອາດ ແລະ ສະບູ ຫຼື ໃຊ້ເຈວລ້າງມືຂ້າເຊື້ອດ້ວຍເຫຼົ້າ 70% ຂື້ນໄປ, ການປະຕິບັດໄລຍະຫ່າງ, ການໃສ່ຜ້າປິດປາກ-ດັງ ເວລາອອກຈາກບ້ານ ຫຼື ໄປສະຖານທີ່ບໍລິການຕ່າງໆ.

ຮູບຖະແຫຼງຂ່າວຈາກ: ຂ່າວເສດຖະກິດ ການຄ້າ