9 ເດືອນ ດ່ານສາກົນພູເກືອ ອັດຕະປື ມີຕົວເລກເເຈ້ງເຂົ້າເມືອງຫຼາຍກວ່າ 60 ສັນຊາດ

9 ເດືອນ ດ່ານສາກົນພູເກືອ ອັດຕະປື ມີຕົວເລກເເຈ້ງເຂົ້າເມືອງຫຼາຍກວ່າ 60 ສັນຊາດ

19th November 2019 0 By Admin

ທ່ານ ພັຕ ຕຸນຄຳ ສຸດທະວົງ ຫົວໜ້າກຳລັງ ຕໍມໍ ດ່ານສາກົນພູເກືອ ແຂວງ ອັດຕະປື ຊີ້ແຈ້ງໃຫ້ຮູ້ວ່າ: ໃນຕະຫຼອດໄລຍະ 9 ເດືອນຜ່ານມາ ກຳລັງ ຕມ ໄດ້ເອົາໃຈໃສ່ເຮັດໜ້າທີ່ບໍລິການໃນການອຳນວຍຄວາມສະດວກໃຫ້ແກ່ການເຂົ້າອອກຂອງຊາວຕ່າງປະເທດ ກໍຄື ນັກທ່ອງທ່ຽວ, ຜູ້ໂດຍສານ ທີ່ເຂົ້າອອກຜ່ານປະຕູດ່ານສາກົນພູເກືອ ເຊິ່ງໄດ້ມີການຈັດຕັ້ງປະຕິບັດຕາມກົດໝາຍຄຸ້ມຄອງຂອງຄົນເຂົ້າອອກເມືອງ ສາມາດຮັກສາໄດ້ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ມີຄວາມປອດໄພໃນການເຂົ້າອອກເປັນຕົກກະຕິ ແລະ ຕໍ່ເນື່ອງໃນລະດັບທີ່ແນ່ນອນ.

 

ສະເພາະ ໃນ 9 ເດືອນ ປີ 2019 ຕົວເລກຄົນແຈ້ງເຂົ້າເມືອງມີ 66 ສັນຊາດ, ເທົ່າກັບ 55.627 ຄົນ, ຍິງ 12.838 ຄົນ, ມີເດັກ 1.177 ຄົນ, ມີຄົນເເຈ້ງອອກເມືອງມີ 72 ສັນຊາດ ເທົ່າກັບ 58.775 ຄົນ, ຍິງ 12.105 ຄົນ, ມີເດັກ 811 ຄົນ; ມີພາຫະນະເຂົ້າເມືອງ 14.098 ທ້ຽວຄັນ ລວມມີ 2 ສັນຊາດ, ພະຫານະເສຍອາກອກເມືອງ ມີ 12.092 ທ້ຽວຄັນມີ 2 ສັນຊາດ.

ທ່ານ ໃຫ້ຮູ້ຕື່ມອີກວ່າ: ຂໍສະດວກທາງດ້ານການຈັດຕັ້ງປະຕິບັດດ້ານວິຊາສະເພາະໄດ້ຮັບປະສິດທິຜົນ ຍ້ອນທາງຄະນະພັກຄະນະກອງບັນຊາການ ກໍຄື ຫ້ອງສັນຕິບານ ໄດ້ເອົາໃຈໃສ່ຊີ້ນ້ຳຢ່າງໃກ້ຊິດ ແລະ ກົມວິຊາສະເພາະ ໄດ້ມີການຊຸກຍູ້ຊ່ວຍເຫຼືອດ້ານເຄື່ອງອຸປະກອນທີ່ທັນສະໄໝເຂົ້າໃນການກວດການເອກະສານ, ມີການປະສານສົມທົບແລກປ່ຽນຂໍ້ມູນ ຂ່າວສານຮ່ວມກັນເປັນປະຈຳກັບດ່ານສາກົນ ເບີອີ ສສ ຫວຽດນາມ ເພື່ອແກ້ໄຂບັນຫາທີ່ເກີດຂຶ້ນທັງສອງປະຕູດ່ານໃຫ້ທັນກັບສະພາບການ.

ແຕ່ແນວໃດກໍ່ຕາມ ດ້ານວິຊາສະເພາະຂອງເຈົ້າໜ້າທີ່ປະຈຳຢູ່ໃນດ່ານສາກົນພູເກືອ ຍັງຂາດ ອຸປະກອນກວດກາພາຫະນະ, ວັດຖຸເຄື່ອງຂອງຜູ້ໂດຍສານເຂົ້າອອກທີືັທັນສະໄໝ ເຊິ່ງບໍ່ສາມາດກວດດ້ວຍຕາເປົ່າໄດ້ ອີກປະເດັນອັນສຳຄັນ ດ່ານຍັງຕັ້ງຢູ່ຫ່າງໄກຈາກຕົວເມືອງ ເຂດບໍລິເວນດ່ານຍັງມີປ່າດົງຕືບໜາ ບາງຄັ້ງຄາວເຮັດໃຫ້ມີຊ່ອງວ່າງຂອງກຸ່ມຄົນບໍ່ດີຍັງມີປະກົດການເຂົ້າອອກໂດຍບໍ່ຜ່ານປະຕູດ່ານຢູ່

ສຳລັບແຜນການສືບຕໍ່ໃນຕໍ່ໜ້າທາງເຈົ້າໜ້າ ຕມ ດ່ານສາກົນພູເກືອ ຈະໄດ້ເອົາໃຈໃສ່ເຮັດໜ້າທີ່ວຽກງານການເມືອງແນວຄິດພາຍໃນກຳລັງທີ່ປະຈຳໃນດ່ານໃຫ້ສູງຂຶ້ນ, ເພິ່ມທະວີຄວາມເອົາໃຈໃສ່ໃນການເຮັດໜ້າທີ່ວິຊາສະເພາະດ້ານການບໍລິການ, ດ້ານການຮັບໃຊ້ໃຫ້ແກ່ບັນດານັກທ່ອງທ່ຽວຜູ້ໂດຍສານໃຫ້ມີຄວາມວ່ອງໄວທັນກັບສະພາບການຕາມລະບຽບກົດໝາຍໃນການຄຸ້ມຄອງຄົນເຂົ້າອອກເມືອງໃຫ້ຮັບປະກັນໃນລະດັບທີ່ດີຂຶ້ນ.

ໂດຍ: ຈັນສະໄໝ