ທະຫານແຂວງອຸດົມໄຊ ມອບລົດຈັກໃຫ້ບັນດາກົມກອງປ້ອງກັນເສັ້ນທາງລົດໄຟລາວ-ຈີນ

ທະຫານແຂວງອຸດົມໄຊ ມອບລົດຈັກໃຫ້ບັນດາກົມກອງປ້ອງກັນເສັ້ນທາງລົດໄຟລາວ-ຈີນ

9th May 2020 0 By Admin

ໃນວັນທີ່ 7 ພືດສະພາ 2020 ນີ້; ກອງບັນຊາການທະຫານແຂວງອຸດົມໄຊ ໄດ້ມອບລົດລົດຈັກໃຫ້ບັນດາກົມກອງທີ່ເຄື່ອນໄຫວເຮັດໜ້າທີ່ປ້ອງກັນໂຄງການກໍ່ສ້າງເສັ້ນທາງລົດໄຟລາວ – ຈີນ, ໂດຍການເປັນກຽດເຂົ້າຮ່ວມຂອງ ພັນໂທ ວຽງໄຊ ຍົມມະລາ ຄະນະພັກກອງບັນຊາການ ຮອງຫົວໜ້າຫ້ອງເສນາທິການທະຫານແຂວງອຸດົມໄຊ, ມີຄະນະພັກ-ຄະນະບັນຊາກອງບັນຊາການທະຫານເມືອງນາໝໍ້, ເມືອງງາ, ເມືອງໄຊ, ກອງພັນນ້ອຍ 414, ກອງຮ້ອຍ 28 ແລະພະແນກການກ່ຽວຂ້ອງເຂົ້າຮ່ວມ.


ໂອກາດນີ້ ພັນຕີ ສົມອົກ ສຸວັນນະສິງ ຫົວໜ້າພະແນກສູ້ຮົບ ໄດ້ຜ່ານຂໍ້ຕົກລົງຂອງກອງບັນຊາການທະຫານແຂວງອຸດົມໄຊ ວ່າດ້ວຍການມອບພາຫະນະ ລົດຈັກ ໃຫ້ບັນດາກົມກອງທີ່ເຄື່ອນໄຫວເຮັດໜ້າທີ່ປ້ອງກັນໂຄງການກໍ່ສ້າງເສັ້ນທາງລົດໄຟລາວ-ຈີນ, ໂດຍອິງຕາມແຜນການ ເຄື່ອນໄຫວຂອງກົມໃຫຍ່ເສນາທິການກອງທັບ ວ່າດ້ວຍການປ້ອງກັນໂຄງການກໍ່ສ້າງ ເສັ້ນທາງລົດໄຟລາວ-ຈີນ ແລະການຄົ້ນຄ້ວາເຫັນດີເປັນເອກະພາບຂອງຄະນະພັກ-ຄະນະກອງບັນຊາການທະຫານແຂວງອຸດົທໄຊ ແລະອານຸກຳມະການປ້ອງກັນໂຄງການກໍ່ສ້າງ ເສັ້ນທາງລົດໄຟລາວ-ຈີນ ເຫັນມອບລົດຈັກ ຮອນດ້າ ຈຳນວນ 9 ຄັນ ປະກອບມີລົດຈັກຮອນດ້າເວບໄອ 125 ຈໍານວນ 4 ຄັນ, ລົດຈັກຮອນດ້າເວບ 100 ຈໍານວນ 5 ຄັນໃຫ້ແຕ່ລະຈຸດປ້ອງກັນໂຄງການກໍ່ສ້າງເສັ້ນທາງລົດໄຟ,

ໃນນີ້ໄດ້ປະກອບໃຫ້ກອງບັນຊາການທະຫານເມືອງນາໝໍ້ 2 ຄັນ, ເມືອງງາ 2 ຄັນ, ເມືອງໄຊ 1 ຄັນ, ກອງພັນນ້ອຍ 414 ຈຳນວນ 2 ຄັນ, ກອງຮ້ອຍ 28 ຈຳນວນ 1 ຄັນ ເພື່ອນໍາໃຊ້ເຂົ້າໃນວຽກງານລວມຂອງກົມກອງ, ຕາມພາລະບົດບາດ ສິດໜ້າ ທີ່ຄວາມຮັບຜິດຊອບ, ເຊິ່ງກົມກອງມີໜ້າທີ່ປົກປັກຮັກສາ, ບົວລະບັດຜັດເຊັດ, ສ້ອມແປງໃຫ້ເປັນປົກກະຕິຮັບປະກັນຄວາມປອດໄພ ແລະນໍາໃຊ້ໄດ້ຍາວນານ, ທັງນີ້ກໍເພື່ອຕອບສະໜອງຕາມຄວາມຮຽກຮ້ອງຕ້ອງການໃນການເຄື່ອນໄຫວປະຕິບັດໜ້າທີ່ ຂອງກົມກອງໃຫ້ມີຄວາມສະດວກວ່ອງໄວຕື່ມອີກ.

ຂ່າວ-ພາບ: ທະນູວັນ