ແຂວງບໍ່ແກ້ວ ມອບ-ສົ່ງແຮງງານມຽນມາ 100 ກວ່າຄົນກັບຄືນປະເທດ

ແຂວງບໍ່ແກ້ວ ມອບ-ສົ່ງແຮງງານມຽນມາ 100 ກວ່າຄົນກັບຄືນປະເທດ

9th May 2020 0 By Admin

ແຂວງບໍ່ແກ້ວ ຈັດພິທີມອບ-ສົ່ງແຮງງານມຽນມາ ທີ່ອາໄສຢູ່ເຂດເສດຖະກິດພິເສດສາມຫລ່ຽມຄຳ 125 ຄົນ, ຍິງ 51 ຄົນ ກັບຄືນປະເທດ ໃນວັນທີ 8 ພຶດສະພາ 2020 ຢູ່ດ່ານບ້ານມອມ ເມືອງຕົ້ນເຜິ້ງ ຕາມການສະເໜີຂອງລັດຖະບານມຽມມາ ກໍຄື ໜັງສືສະເໜີຂອງເຈົ້າແຂວງທ່າຂີ້ເຫລັກ ເພື່ອນຳແຮງງານກັບຄືນປະເທດ ໃນໄລຍະການແຜ່ລະບາດຂອງພະຍາດ ໂຄວິດ-19.


ທ່ານ ເຄື່ອນເພັດ ວົງຈັນ ເຈົ້າເມືອງຕົ້ນເຜິ້ງ ໄດ້ໃຫ້ຮູ້ວ່າ: ການມອບ-ສົ່ງແຮງງານດັ່ງກ່າວ ແມ່ນປະຕິບັດຕາມຈຸດປະສົງຂອງລັດຖະບານມຽນມາ ກໍຄື ໜັງສືສະເໜີຂອງເຈົ້າແຂວງທ່າຂີ້ເຫລັກ ໂດຍອີງຕາມການສະເໜີຂອງແຮງງານຊາວມຽນມາ ທີ່ມາອອກແຮງງານຢູ່ໃນເຂດເສດຖະກິດພິເສດສາມຫລ່ຽມຄຳ ເມືອງຕົ້ນເຜິ້ງ ສປປ ລາວ ເນື່ອງຈາກວ່າສະພາບການແຜ່ລະບາດຂອງພະຍາດໂຄວິດ 19 ທີ່ກຳລັງຄຸກຄາມທຸກໆປະເທດໃນໂລກ ເຊິ່ງວິກິດການດັ່ງກ່າວ ໄດ້ເຮັດໃຫ້ໂຮງຈັກໂຮງງານ ແລະ ການເຮັດວຽກງານຕ່າງໆໄດ້ຢຸດດຳເນີນກິດຈະການຊົ່ວຄາວ.

ສະເພາະຢູ່ເຂດເສດຖະກິດພິເສດສາມຫລ່ຽມຄຳ ເມືອງຕົ້ນເຜິ້ງ ມີແຮງງານມຽນມາ ອາໄສຢູ່ ປະມານ 3.000-4.000 ຄົນ ແລະ ໄລຍະດໍາລົງຊີວິດຢູ່ ແຂວງບໍ່ແກ້ວນີ້ ອຳນາດການປົກຄອງແຕ່ລະຂັ້ນ ກໍໄດ້ອຳນວຍຄວາມສະດວກ ແລະ ໃຫ້ໂອກາດແກ່ແຮງງານມຽນມາ ໃນການທຳມາຫາກິນມາອອກແຮງງານ, ໃຫ້ຄວາມສຳຄັນແກ່ເຂົາເຈົ້າໃນການຄຸ້ມຄອງດູແລ ແລະ ໄດ້ໃຫ້ເຂົາເຈົ້າເຂົ້າເຖິງການສຶກສາ, ສາທາລະນະສຸກ ເປັນຕົ້ນ ການປ້ອງກັນພະຍາດໄຂ້ເລືອດອອກ, ພະຍາດໂລກອະຫິວາ ແລະ ພະຍາດອື່ນໆໂດຍບໍໄດ້ເສຍຄ່າຄືກັນກັບປະຊາຊົນລາວ.

.
ສຳລັບແຮງງານທີ່ມອບ-ສົ່ງກັບຄືນປະເທດໃນຄັ້ງນີ້ ແມ່ນມອບໃຫ້ແຂວງທ່າຂີ້ເຫລັກນຳໄປຄຸ້ມຄອງເບິ່ງແຍງຕາມກົດໝາຍຂອງ ສສ ມຽນມາ ໃນໄລຍະທີ່ສອງປະເທດພວກເຮົາ ກໍຄື ເມືອງຕົ້ນເຜິ້ງ ແຂວງບໍ່ແກ້ວ ແລະ ເມືອງທ່າຂີ້ເຫລັກ ແຂວງທ່າຂີ້ເຫລັກ ພວມຂຸ້ນຂ້ຽວໃນການປ້ອງກັນ ແລະ ສະກັດກັ້ນພະຍາດໂຄວິດ-19 ບໍ່ໃຫ້ມີການຂະຫຍາຍອອກເປັນວົງກວ້າງ ແລະ ກັບຄືນສຸ່ສະພາບປົກກະຕິໂດຍໄວ.

ຂ່າວ: ສ ປັນຍາທອງ