ໃຈ​ບຸນ​ອີ່ຫຼີ່ ຖວາຍ 1 ຕື້ກວ່າກີບຊື້ເນື້ອທີ່ດິນ ໃຫ້ແກ່ວັດທີ່ ນະຄອນປາກເຊ​

ໃຈ​ບຸນ​ອີ່ຫຼີ່ ຖວາຍ 1 ຕື້ກວ່າກີບຊື້ເນື້ອທີ່ດິນ ໃຫ້ແກ່ວັດທີ່ ນະຄອນປາກເຊ​

7th May 2020 0 By Admin

ຜູ້ມີສັດທາ ໄດ້ປະກອບສ່ວນເງິນ 1 ຕື້ກວ່າກີບຊື້ເນື້ອທີ່ດິນ ຖວາຍ ໃຫ້ແກ່ວັດບ້ານ ໂພນງາມ ນະຄອນປາກເຊ​ ແຂວງຈຳປາສັກ.
ຄອບຄົວທ່ານ ບຸນເຮັ່ງ – ທ່ານ ນາງ ແກ່ນຈັນ ບຸດດາວົງ ແຊຫຼໍ ປະທານ​ກຸ່ມບໍລິສັດ ຫົງຄໍາພາກໃຕ້ ພ້ອມດ້ວຍຍາດພີ່ນ້ອງ, ປະຊາຊົນບ້ານໂພນງາມ, ຜູ້ມີຈິດສັດທາທັງພາຍໃນ ແລະ ຕ່າງປະເທດ ໄດ້ປະກອບສ່ວນເງິນ 1.111.999.000 ກີບ, ຊື້ເນື້ອທີ່ດິນ 785 ຕາແມັດ ເພື່ອ ຖວາຍ ເປັນດິນທໍລະນີສົງ ໃຫ້ແກ່ວັດບ້ານ ໂພນງາມ ນະຄອນປາກເຊ ແຂວງຈໍາປາສັກ.


ພິທີ ຖວາຍ ທີ່ດິນດັ່ງກ່າວມີຂຶ້ນໃນວັນທີ 6 ພຶດສະພາ 2020 ຢູ່ທີ່ວັດບ້ານ ໂພນງາມ ໃຫ້ກຽດເຂົ້າຮ່ວມຂອງທ່ານ ສີທົນ ແກ້ວພູວົງ ຄະນະປະຈໍາພັກແຂວງ ປະທານແນວລາວສ້າງຊາດ ແຂວງ, ພຣະອາຈານ ສຸວັນ ຈັນທະລາດ ປະທານ ອພສ ແຂວງຈໍາປາສັກ, ມີອໍານາດການປົກຄອງແຂວງ, ນະຄອນປາກເຊ, ບ້ານ ແລະ ມວນຊົນເຂົ້າຮ່ວມ.


ທ່ານ ນາງ ແກ່ນຈັນ ບຸດດາວົງ ໃຫ້ຮູ້ວ່າ: ປີ 2018-2020 ວັດບ້ານໂພນງາມ ໄດ້ມີການກໍ່ສ້າງສາລາໂຮງທໍາ (ຫໍແຈກຫຼັງໃໝ່) ໃຫ້ກວ້າງຂວາງໃຫຍ່ກວ່າເກົ່າໃຫ້ມີຄວາມສວຍງາມ ດັ່ງນັ້ນຈິ່ງເຮັດໃຫ້ເນື້ອທີ່ຂອງວັດມີຄວາມຄັບແຄບ ແລະ ເຫັນໄດ້ແນວນັ້ນ ຄອບຄົວບຸດດາວົງ ແຊຫຼໍ ພ້ອມດ້ວຍຍາດພີ່ນ້ອງ, ປະຊາຊົນບ້ານໂພນງາມ, ຜູ້ມີຈິດສັດທາທັງຫຼາຍ ທີ່ມີຈິດໃຈເຫຼື້ອມໃສໃນພຸດທະສາສະໜາ ພາກັນເຕົ້າໂຮມປະກອບສ່ວນເງິນຊື້ດິນຖາວອນ ຖວາຍ ໃຫ້ແກ່ວັດແຫ່ງນີ້ ເພື່ອເປັນດິນທໍລະນີສົງ ເຊິ່ງມີເນື້ອທີ່ທັງໝົດ 785 ຕາແມັດ, ມູນຄ່າ 1.111.999.000 ກີບ, ໃນນັ້ນຄອບຄົວ ບຸດດາວົງ ແຊຫຼໍ ພ້ອມຍາດພີ່ນ້ອງ ປະກອບສ່ວນເງິນ 600 ລ້ານກວ່າກີບ (ຜ່ານມາຄອບຄົວບຸດດາວົງຍັງໄດ້ປະກອບສ່ວນສ້າງ ປະໂຂງວັດ, ສ້າງຫໍພຣະ, ສ້າງພຣະໂພທິສັດປາງປະສູດ) ສ່ວນທີ່ເຫຼືອແມ່ນເປັນເງິນກອງທຶນຂອງວັດປະກອບສ່ວນ.


ວັດບ້ານ ໂພນງາມ (ວັດກົກຂາມເທບ ໃນເມື່ອກ່ອນ) ສ້າງຂຶ້ນໃນປີ ຄສ 1949 (ພສ 2006) ດ້ານໜ້າຂອງວັດຕິດກັບເສັ້ນທາງ ເລກທີ 13 ວັດແຫ່ງນີ້ໄດ້ຮັບການນໍາພາສ້າງສາພັດທະນາໃນແຕ່ລະດ້ານ ຂອງເຈົ້າອາວາດແຕ່ລະອົງ, ໃນແຕ່ລະໄລຍະ ແລະ ສັດທາເຫຼື້ອມໃສຂອງສັງຄົມທຸກພາກສ່ວນ ຈິ່ງເຮັດໃຫ້ວັດແຫ່ງນີ້ເປັນສະຖານທີ່ສ້າງຄວາມເຫຼື້ອມໃສທາງດ້ານວັດທະນະທໍາ, ຮີດຄອງປະເພນີອັນດີງາມຂອງຊາດ.