ຮູບເກົ່າ ເອົາມາເລົ່າໃໝ່ “ນໍ້າພຸເກາະກາງຖະໜົນຂອງ ນະຄອນຫຼວງພຣະບາງ”

ຮູບເກົ່າ ເອົາມາເລົ່າໃໝ່ “ນໍ້າພຸເກາະກາງຖະໜົນຂອງ ນະຄອນຫຼວງພຣະບາງ”

6th May 2020 0 By Admin

ນ້ຳພຸເກາະກາງຖະໜົນຂອງເມືອງຫລວງພຣະບາງ ແຫ່ງນີ້ສ້າງເມື່ອປີ 1969-1970 ໂດຍ ພຣະຍາບໍຣິລັກ ຣາຊກິດ ຂຸນພິທັກ ຕຳຫລວດໂທ ບຸນຄົງ ປະດິດຈິດ ຜູ້ເປັນເຈົ້າຄອງນະຄອນຫລວງພຣະບາງໃນຄັ້ງນັ້ນ ໂດຍໄດ້ມີການຊອກຫາທຶນຮອນຈາກພໍ່ຄ້າ ຊາວຂາຍ ຄົນລາວ ຄົນຈີນ ມາສ້າງນ້ຳພຸໃສ່ກາງດອນຖະໜົນແຫ່ງນີ້ ເມື່ອກ່ອນກາງດອນນີ້ຈະມີທາດນ້ອຍໆ ເກົ່າໆຕັ້ງຢູ່

ສ່ວນນ້ຳພຸທີ່ເພິ່ນປັ້ນຮູບ ໂອຢອງເທິງຂັນ ນັ້ນ ແມ່ນເພິນປັ້ນຕາມລັກສະນະສະຖານປະນິກ ເພື່ອຄວາມແຫນ້ນຫນາ ຫມັ້ນຄົງ… ແຕ່ເຮັດບໍ່ຖືຕ້ອງຕາມທຳນຽມແບບແຜນຄວາມເຊື່ອແບບບູຮານນະການ ເພາະປົກກະຕິແລ້ວ ຂັນຕ້ອງຢອງເທິງໂອ ຈຶ່ງຈະຖືກຕ້ອງ (ເພາະຂັນປຽບສະເຫມືອນເພດຊາຍ ແລະ ໂອປຽບສະເຫມືອນເພດຍິງ ) ຊາຍຈະຕ້ອງເປັນຖານຂອງຄອບຄົວ ເປັນຫລັກຫມັ້ນ ຈະເຫັນໄດ້ໃນພິທີກິນດອງ ໃນພາຂວັນ ຂວັນຕ້ອງຢອງເທິງໂອ ສະເໝີ

ດັ່ງນັ້ນເພິ່ນສ້າງແລ້ວ ຈຶ່ງເຂົ້າໄປລາຍງານຕໍ່ເຈົ້າມະຫາຊີວິດສີສະຫວ່າງວັດທະນາ ເພື່ອຊີແຈງເຫດຜົນການສ້າງທີ່ຜິດທຳນຽມ ແລະ ຖືກຕ້ອງຕາມຫລັກສະຖາປະນິກ
ໃນປັດຈຸບັນນີ້ມີຫລາຍໆຄົນມັກຈະເຂົ້າໃຈຜິດສະເໝີ ໂດຍຈະຈັດພາຂວັນໂດຍຍຶດຖືເອົາຕາມນ້ຳພຸແບບນີ້ເປັນຫລັກເກນຍຶດຖືປະຕິບັດເລື້ອຍມາ.

ໃຜມີຂໍ້ມູນ ເພິ່ນຕື່ມ ກະລຸນາບອກກ່າວກັນເຂົ້າມາໄດ້ ເພື່ອຈະເຮັດໃຫ້ບົດປະກອບຮູບພາບເຫລົ່ານີ້ຖືກຕ້ອງ ສົມບູນຂຶ້ນອີກຕື່ມ.

ຮູບພາບເຫລົ່ານີ້ ແມ່ນຖືກຖ່າຍໄວ້ ເມື່ອປະມານປີ 1973-74 ໂດຍຄະນະຂອງ ສຳນັກຝຣັ່ງເສດ ແຫ່ງປາຍບູຣະພາທິດ (EFEO)

ທີ່ມາ: ວັດຊຽງທອງ ໄຊຍະໂຣຫະຣາມາທິບໍດີມະຫາວິຫານ