ດີໃຈເດ! ເກືອບເດືອນແລ້ວ ລາວບໍ່ພົບຜູ້ຕິດເຊື້ອເພີ່ມ, ສ່ວນຜູ້ຕິດເຊື້ອທັງໝົດຢູ່ໃນຂັ້ນເບົາບາງ

ດີໃຈເດ! ເກືອບເດືອນແລ້ວ ລາວບໍ່ພົບຜູ້ຕິດເຊື້ອເພີ່ມ, ສ່ວນຜູ້ຕິດເຊື້ອທັງໝົດຢູ່ໃນຂັ້ນເບົາບາງ

6th May 2020 0 By Admin

24 ມື້ແລ້ວ ລາວບໍ່ພົບຜູ້ຕິດເຊື້ອໃໝ່ (ເລິ່ມແຕ່ວັນທີ 12 ເມສາ 2020 ເປັນຕົ້ນມາ). ເຮັດໃຫ້ຈໍານວນຜູ້ຕິດເຊື້ອສະສົມ 19 ຄົນ ສາມາດປິ່ນປົວ ແລະ ອອກໂຮງໝໍແລ້ວ 10 ຄົນ ແລະ ຍັງເຫຼືອ 09 ຄົນ ທີ່ຈະໄດ້ສືບຕໍ່ຕິດຕາມ ປິ່ນປົວຕາມອາການຢ່າງໃກ້ຊິດ ໃນນີ້ໄດ້ຮັບຄົນເຈັບເກົ່າເຂົ້າມາຕິດຕາມອາການ 01 ຄົນ, ລວມມີ 10 ຄົນຢູ່ໂຮງໝໍມິດຕະພາບ ເຊິ່ງທັງໝົດເຫັນວ່າມີອາການເບົາບາງ ແລະ ຍັງຕິດຕາມເພື່ອກວດວິເຄາະຢັ້ງຢືນການບໍ່ພົບເຊື້ອ.

ສຈ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການ ຄະນະສະເພາະກິດ ຄວບຄຸມພະຍາດໂຄວິດ 19 ຖະແຫລງຕອນບ່າຍວັນທີ 6 ພຶດສະພານີ້ ເຖິງສະພາບການຄວບຄຸມພະຍາດໂກວິດ 19 ຢູ່ລາວວ່າ: ໃນວັນທີ 05 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 87 ຄົນ, ໃນນັ້ນ ມີກໍລະນີສົງໄສ 04 ຄົນ ແລະ ແຮງງານລາວທີ່ກັບມາຈາກປະເທດໄທ 83 ຄົນ.

ເຊິ່ງກໍລະນີສົງໄສທັງໝົດ 04 ຄົນ ແມ່ນມາຈາກ ນະຄອນຫຼວງວຽງຈັນ 02 ຄົນ, ແຂວງວຽງຈັນ 01 ຄົນ ແລະ ອຸດົມໄຊ 01 ຄົນ.  ແຮງງານລາວທີ່ກັບມາຈາກປະເທດໄທ 83 ຄົນ ລາຍລະອຽດດັ່ງລຸ່ມນີ້: ຈຳປາສັກ 59 ຄົນ; ສະຫວັນນະເຂດ 12 ຄົນ; ຫຼວງພະບາງ 04 ຄົນ; ສາລະວັນ 03 ຄົນ; ບໍລິຄຳໄຊ 02 ຄົນ; ວຽງຈັນ 02 ຄົນ ແລະ ຫຼວງນ້ຳທາ 01 ຄົນ. ໂດຍຜົນກວດທັງໝົດ 87 ຄົນ ຂອງມື້ວານນີ້ ບໍ່ພົບເຊື້ອໃໝ່.  ໝາຍຄວາມວ່າໃນວັນທີ 05 ພຶດສະພາ 2020 ບໍ່ມີກໍລະນີໃໝ່.

ນັບແຕ່ເດືອນມັງກອນ ຮອດ ວັນທີ 05 ພຶດສະພາ 2020 ໄດ້ເກັບຕົວຢ່າງມາກວດທັງ ໝົດ ມີ 2,505 ຕົວຢ່າງ, ກວດພົບເຊື້ອສະສົມ 19 ຄົນ (24 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ).