ສາທາແຂວງ ອຸດົມໄຊ ເຊີນຊວນທົ່ວສັງຄົມ ຮ່ວມກັນລ້າງມື ເນື່ອງໃນໂອກາດວັນລ້າງມືສາກົນ

ສາທາແຂວງ ອຸດົມໄຊ ເຊີນຊວນທົ່ວສັງຄົມ ຮ່ວມກັນລ້າງມື ເນື່ອງໃນໂອກາດວັນລ້າງມືສາກົນ

6th May 2020 0 By Admin

ເນື່ອງໃນໂອກາດວັນລ້າງມືສາກົນ ( 5 ພຶດສະພາ ) ໄດ້ໝູນວຽນມາບັນຈົບຄົບຮອບອີກວາລະໜື່ງ ພະແນກສາທາລະນະສຸກແຂວງ ອຸດົມໄຊ ຮ່ວມກັບໂຮງໝໍແຂວງ ອຸດົມໄຊ ໄດ້ຈັດກິດຈະກຳສາທິດການລ້າງມື ພາຍໃຕ້ຄຳຂັວນ ຊີວິດປອດໄພ ໃສ່ໃຈການລ້າງມືເລື້ອຍໆ ໃນການຈັດກິດຈະກຳທີມງານແພດໝໍ ກໍໄດ້ທຳການສາທິດວິທີການລ້າງມືຢ່າງຖືກຕ້ອງ, ການລ້າງມືດ້ວຍນ້ຳສະອາດໃສ່ສະບູ, ລ້າງດ້ວຍເຈວ ຫຼື ເຫຼົ້າ 70% ຂຶ້ນໄປ ເພື່ອເຮັດໃຫ້ມືປາສະຈາກເຊື້ອພະຍາດ ແລະ ຫຼຸດຜ່ອນອັດຕາການເຈັບເປັນ ແລະ ອັດຕາການເສຍຊີວິດຍ້ອນພະຍາດຕິດຕໍ່.

ຄຽງຄູ່ກັບການຈັດກິດຈະກຳການລ້າງມື ກໍແມ່ນການຕອບໂຕ້ການລະບາດຂອງພະຍາດອັກເສບປອດສາຍພັນໃໝ່ ຫຼື ໂຄວິດ-19 ເຊີງປັດຈຸບັນໄດ້ມີການແຜ່ລະບາດໃນທົ່ວໂລກ ໃນນັ້ນການລ້າງມືກໍ່ເປັນມາດຕະການໜື່ງທີ່ສຳຄັນ ໃນການຫຼຸດຜ່ອນການຕິດເຊື້ອ ເຊີງທຸກຄົນໃນທົ່ວສັງຄົມ ຈະໄດ້ເອົາໃຈໃສ່ໃນການຈັດຕັ້ງປະຕິບັດການລ້າງມືຢ່າງເປັນຂະບວນການ ໂດຍສະເພາະໃນສະຖານທີ່ບໍລິການສາທາລະນະສຸກ ກໍຕ້ອງໄດ້ມີການຈັດຕັ້ງການລ້າງມືຂອງແພດໝໍ ແລະ ຄົນເຈັບທີ່ມາໃຊ້ບໍລິການ ຕາມມາດຕະການຫຼຸດຜ່ອນການຕິດເຊື້ອພະຍາດໃນໂຮງໝໍ.


ໃນໂອກາດນີ້ທ່ານ ດຣ ສູນທອນ ຫຼວງໄຊສີ ຮອງຫົວໜ້າພະແນກສາທາລະນະສຸກ ກໍໄດ້ເຊີນຊວນພໍ່ແມ່ປະຊາຊົນບັນດາເຜົ່າ ພະນັກງານ ທະຫານຕ່ຳຫຼວດ ທຸກຊັ້ນຄົນ ໃຫ້ຮ່ວມໃຈກັນລ້າງມືດ້ວຍນ້ຳສະອາດ ໃສ່ສະບູ່ ຫຼື ເຈວລ້າງມືໃຫ້ມີຄວາມສະອາດ ຕາມຄຳຂັວນວັນລ້າງມືສາກົນ ຊີວິດປອດໄພໃສ່ໃຈການລ້າງມືເລື້ອຍໆ.


ກິດຈະກຳໄດ້ຈັດຂຶ້ນໃນຕອນເຊົ້າວັນທີ 5 ພຶດສະພານີ້ ທີ່ໂຮງໝໍແຂວງ ອຸດົມໄຊ ໂດຍມີ ດຣ ສູນທອນ ຫຼວງໄຊສີ ຮອງຫົວໜ້າພະແນກສາທາລະນະສຸກແຂວງ ອຸດົມໄຊ, ມີຂະແໜງການທີ່ກ່ຽວຂ້ອງຂອງພະແນກ, ຄະນະອຳນວຍການ, ພະນັກງານແພດໝໍ ແລະ ພໍ່ແມ່ປະຊາຊົນຜູ້ທີ່ມາໃຊ້ບໍລິການເຂົ້າຮ່ວມ.

ສີຈັນ ເກດວົງສາ