2 ພຶດສະພາ ປິ່ນປົວຫາຍດີແລ້ວ 2 ຄົນ ແຕ່ເສຍດາຍກໍລະນີ 14 ກັບມາຕິດເຊື້ອຄືນ ຫຼັງຄົບກຳນົດຕິດຕາມ 14 ວັນ

2 ພຶດສະພາ ປິ່ນປົວຫາຍດີແລ້ວ 2 ຄົນ ແຕ່ເສຍດາຍກໍລະນີ 14 ກັບມາຕິດເຊື້ອຄືນ ຫຼັງຄົບກຳນົດຕິດຕາມ 14 ວັນ

2nd May 2020 0 By Admin

ນັບເປັນມື້ທີ 20 ແລ້ວ ທີ່ສປປ ລາວ ບໍ່ພົບຜູ້ຕິດເຊື້ອ (ເລີ່ມແຕ່ວັນທີ 12 ເມສາ 2020 ເປັນຕົ້ນມາ) ເຮັດໃຫ້ຈໍານວນຜູ້ຕິດເຊື້ອສະສົມຢູ່ທີ່ 19 ຄົນ ແລະ ໃນມື້ນີ້ອະນຸຍາດໃຫ້ອອກໂຮງໝໍເພີ່ມອີກ 2 ຄົນ, ຍັງໃຫ້ຍອດຜູ້ຕິດເຊື້ອຍັງເຫຼືອ 09 ຄົນ ທີ່ຈະໄດ້ສືບຕໍ່ຕິດຕາມ ປິ່ນປົວຕາມອາການຢ່າງໃກ້ຊິດ. ສ່ວນຜູ້ປິ່ນປົວດີຄົນທີ 14 ທີ່ອະນຸຍາດໃຫ້ອອກໂຮງໝໍ ເພື່ອໄປຕິດຕາມອາການຢູ່ເຮືອນອີກ 14 ວັນ ເມື່ອຄົບກຳນົດແລ້ວ ມາກວດພົບວ່າຕິດເຊື້ອຄືນ.


ຄະນະສະເພາະກິດລາຍງານໃນວັນທີ 30 ເມສາ 2020ວ່າ: ໃນວັນທີ 01 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 144 ຄົນ, ໃນນັ້ນ ຜູ້ມີອາການສົງໄສມາກວດຢູ່ໂຮງໝໍ 03 ຄົນ, ເກັບຕົວຢ່າງຜູ້ຕິດເຊື້ອທີ່ນອນປິ່ນປົວຢູ່ໂຮງໝໍມາກວດຄືນ 03 ຄົນ, ຜູ້ທີ່ອອກໂຮງໝໍຕິດຕາມຢູ່ເຮືອນຄົບກໍານົດ 14 ມາກວດຄືນ 01 ຄົນ, ແຮງງານຈີນທີ່ເຂົ້າມາເຮັດທາງລົດໄຟ 127 ຄົນ ແລະ ແຮງງານລາວທີ່ກັບມາຈາກປະເທດໄທ 10 ຄົນ.


ໃນນີ້, ຈໍານວນຜູ້ມີອາການສົງໄສ 03 ຄົນ ແມ່ນມາຈາກ ນະຄອນຫຼວງວຽງຈັນ; ຈຳນວນແຮງງານລາວທີ່ກັບມາແຕ່ໄທ 10 ຄົນ ລາຍລະອຽດດັ່ງລຸ່ມນີ້: ສະຫວັນນະເຂດ 04 ຄົນ; ສາລະວັນ 04 ຄົນ. ຜົ້ງສາລີ 01 ຄົນ ແລະ ຈຳປາສັກ 01 ຄົນ.

ທັງນີ້, ຜົນກວດທັງໝົດ 143 ຄົນ ຂອງມື້ວານນີ້ ບໍ່ພົບເຊື້ອໃໝ່. ໝາຍຄວາມວ່າໃນວັນທີ 01 ພຶດສະພາ 2020 ບໍ່ມີກໍລະນີໃໝ່.
ສໍາລັບຜູ້ທີ່ອອກໂຮງໝໍນ້ຳເບີ 14 ເພື່ອຈໍາກັດຕົວເອງຢູ່ເຮືອນຄົບກໍານົດ 14 ວັນແລ້ວ ມາກວດຄືນເຫັນວ່າພົບຕິດເຊື້ອຄືນ ຈຶ່ງໄດ້ເອົາເຂົ້ານອນຕິດຕາມອາການຢູ່ໂຮງໝໍ ລາຍລະອຽດຜູ້ອຳນວຍການໂຮງໝໍຈະລາຍງານເພີ່ມ.


ສະນັ້ນ, ນັບແຕ່ເດືອນມັງກອນ ຮອດ ວັນທີ 01 ພຶດສະພາ 2020 ໄດ້ເກັບຕົວຢ່າງມາກວດທັງໝົດມີ 2,165 ຕົວຢ່າງ, ກວດພົບເຊື້ອສະສົມ 19 ຄົນ (20 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ).


ປັດຈຸບັນ ມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍມິດຕະພາບແຕ່ 11 ຄົນ ທັງໝົດເຫັນວ່າ ມີອາການເບົາບາງ ແລະ ໄດ້ເກັບຕົວຢ່າງມາກວດວິເຄາະຢັ້ງຢືນວ່າບໍ່ພົບເຊື້ອ 2 ຄັ້ງຕິດຕໍ່ກັນ 2 ຄົນ ຈຶ່ງຈະໄດ້ໃຫ້ອອກໂຮງໝໍໄປຕິດຕາມຕົນເອງອີກ 14 ວັນ ຈະເຮັດໃຫ້ຍັງເຫຼືອຢູ່ໂຮງໝໍ 09 ຄົນ.