ກອງພັນໃຫຍ່ 11 ເປັນເຈົ້າການ ສະກັດກັ້ນການແຜ່ລະບາດຂອງພະຍາດ ໂຄວິດ

ກອງພັນໃຫຍ່ 11 ເປັນເຈົ້າການ ສະກັດກັ້ນການແຜ່ລະບາດຂອງພະຍາດ ໂຄວິດ

1st May 2020 0 By Admin

ປັດຈຸບັນພະຍາດ ໂຄວິດ-19 ພວມເປັນໄພຄຸກຄາມຮ້າຍແຮງຕໍ່ມວນມະນຸດໃນໂລກ, ທຸກໆປະເທດ ແລະ ອົງການຈັດຕັ້ງສາກົນ ກໍ່ໄດ້ອອກມາໂຄສະນາຜ່ານສື່ມວນຊົນຕ່າງໆ ເພື່ອໃຫ້ຄວາມຮູ້ກ່ຽວກັບການແຜ່ລະບາດຂອງໄວຣັດສາຍພັນໃໝ່ນີ້,

.

ເວົ້າສະເພາະຢູ່ປະເທດເຮົາ, ທ່ານນາຍົກລັດຖະມົນຕີກໍ່ໄດ້ອອກຄຳສັ່ງ ເລກທີ 06/ນຍ ເພື່ອສະກັດກັ້ນການແຜ່ຂະຫຍາຍຂອງເຊື້ອໄວຣັດສາຍພັນໃໝ່ນີ້, ເຊິ່ງຄະນະພັກ-ຄະນະບັນຊາກອງພັນໃຫຍ່ 11 ກໍ່ໄດ້ຮັບຄຳສັ່ງຈາກກະຊວງປ້ອງກັນປະເທດ ໃຫ້ເອົາໃຈໃສ່ເຝົ້າລະວັງ ແລະ ຕິດຕາມ-ກວດກາບັນດາພະນັກງານທີ່ ເຂົ້າ-ອອກຄ້າຍຢ່າງເຂັ້ມງວດ,

ພ້ອມທັງປະສານສົມທົບກັບອຳນາດການປົກຄອງ ແລະ ກຳລັງທ້ອງຖິ່ນ-ກຳລັງ ປກສ ບ້ານ ຈັດຕັ້ງຈຸດກວດກາຕິດຕາມສະພາບ ຄົນເຂົ້າອອກຕາມຂອບເຂດ ບັນດາບ້ານອ້ອມຂ້າງກົມກອງຕັ້ງທັບ ນັບທັງຢູ່ໃຈກາງນະຄອນຫຼວງ, ນອກນັ້ນໄດ້ຈັດຕັ້ງບຸກຄະລາກອນດ້ານການແພດ ພ້ອມອຸປະກອນລົງຕັ້ງຈຸດກວດວັດອຸນຫະພູມຮ່າງ ກາຍ ເພື່ອກວດວັດອຸນຫະພູມຂອງບັນດາພະນັກງານ-ນັກຮົບ ທີ່ເຂົ້າອອກຄ້າຍຢ່າງເຄັ່ງຄັດ ແລະ ໄດ້ປະສານສົມທົບກັບບ້ານອ້ອມຂ້າງ ພ້ອມກັນຈັດຕັ້ງໜ່ວຍສະເພາະກິດ ນຳເອົາເຄື່ອງສຽງຕິດຕັ້ງໃສ່ລົດ ອອກເຄື່ອນໄຫວໂຄສະນາປ່າວປະກາດ ໃຫ້ກັບພໍ່ແມ່ປະຊາຊົນໃນເຂດ 03 ຕົວເມືອງ ຄື: ເມືອງນາຊາຍທອງ, ເມືອງສີໂຄດຕະບອງ ແລະ ເມືອງສັງທອງ

ເພື່ອໃຫ້ເຂົ້າໃຈກ່ຽວກັບຄຳສັ່ງຂອງຂັ້ນເທິງແລະ ຄວາມອັນຕະລາຍຂອງພະຍາດ ໂຄວິດ-19 ພ້ອມສົ່ງນັກວິຊາສະເພາະດ້ານການແພດ ລົງປະສານສົມທົບກັບອາສາສະໝັກຂັ້ນບ້ານ ເພື່ອໂຄສະນາປະຊາສຳພັນໃຫ້ເຂົາເຈົ້າຮັບຮູ້ ແລະ ເຂົ້າໃຈເຖິງຜົນຮ້າຍຂອງຂອງເຊື້ອພະຍາດດັ່ງກ່າວ, ພ້ອມທັງໃຫ້ຄວາມຮູ້ແກ່ບັນດາພໍ່ແມ່ປະຊາຊົນ ໃນການໃຊ້ຊີວິດປະຈຳວັນ ເພື່ອບໍ່ເປັນການເພີ່ມຄວາມສ່ຽງໃຫ້ກັບຕົນເອງ ກໍ່ຄືຄົນອ້ອມຂ້າງ ຫຼີກເວັ້ນຈາກການຕິດເຊື້ອພະຍາດ.


ຜ່ານການຈັດຕັ້ງປະຕິບັດ ເຫັນວ່າຂອບເຂດບ້ານຮາກຖານອ້ອມຂ້າງກົມກອງ ແມ່ນໃຫ້ຄວາມຮ່ວມມືເປັນຢ່າງດີ ໂດຍໃນນັ້ນເດັ່ນກວ່າໝູ່ແມ່ນບ້ານຈຳປາ ແລະ ບ້ານວຽງຄຳ ເມືອງສີໂຄດຕະບອງ ນະຄອນຫຼວງວຽງຈັນ ເຊິ່ງທ່ານ ຈັນທະວີສຸກ ຈິດຕະກອນ ເລຂາພັກບ້ານ, ນາຍບ້ານບ້ານຈຳປາ ໄດ້ໃຫ້ຮູ້ວ່າ ນັບແຕ່ນາຍົກລັດຖະມົນຕີໄດ້ອອກຄຳສັ່ງ ເລກທີ 06/ນຍ ທາງການຈັດຕັ້ງຂັ້ນບ້ານພວກເຮົາ ແມ່ນໄດ້ແຕ່ງຕັ້ງມອບໝາຍໜ້າທີ່ ໃຫ້ພະນັກງານໃນອົງການຈັດຕັ້ງບ້ານ ປະສານສົມທົບກັບກຳລັງ ປກສ-ກອງຫຼອນ ຕັ້ງດ່ານກວດກາບັນດາການສັນຈອນ ໄປ-ມາ ຂອງປະຊາຊົນຜ່ານເຂດບ້ານຈຳປາ ແລະ ບ້ານວຽງຄຳ ເພື່ອກວດກາ-ສະກັດກັ້ນບຸກຄົນທີ່ຝ່າຝືນຕໍ່ຄຳສັ່ງ ເລກທີ່ 06/ນຍ ກໍ່ຄຶຫ້າມບໍ່ໃຫ້ອອກຈາກເຄຫາສະຖານຂອງຕົນ ຖ້າບໍ່ຈຳເປັນ,

ເພື່ອຈຳກັດການແຜ່ລາມຂອງພະຍາດ ໂຄວິດ-19 ແຕ່ຖ້າວ່າມີຄວາມຈຳເປັນແທ້ ແມ່ນຕ້ອງມີໃບອະນຸຍາດຈາກບ້ານຈິ່ງສາມາດເດີນທາງໄດ້ ພ້ອມກັນນີ້ພະນັກງານອາສາສະໝັກບ້ານ ກໍ່ໄດ້ລົງຕິດຕາມເກັບກຳຈຳນວນຄົນເຂົ້າອອກບ້ານຢ່າງເຂັ້ມງວດ ພ້ອມທັງໂຄສະນາປະຊາສຳພັນໃຫ້ພໍ່ແມ່ປະຊາຊົນທົ່ວໄປໄດ້ຮັບຮູ້ເຖິງຜົນຮ້າຍ ແລະ ວິທີປ້ອງກັນຕົນເອງ ເພື່ອຫຼຸດຄວາມສ່ຽງໃນການຕິດເຊື້ອ ແລະ ແຜ່ລະບາດຂອງພະຍາດ ໂຄວິດ-19.


ທີ່ກ່າວມານັ້ນແມ່ນຄວາມເປັນເຈົ້າການຮ່ວມກັນ ເຝົ້າລະວັງ ແລະ ພ້ອມກັນເຮັດທຸກວິທີທາງ ໃນການສະກັດກັ້ນບໍ່ໃຫ້ເຊື້ອພະຍາດ ມີການແຜ່ລາມອອກເປັນວົງກວ້າງ ຂອງກອງພັນໃຫຍ່ 11 ຮ່ວມມືກັບບ້ານໃກ້ຄຽງ. ສະນັ້ນຕໍ່ໄປນີ້ພວກເຮົາທຸກຄົນ ຍັງຕ້ອງເພີ່ມທະວີຕິດຕາມຂ່າວສານຢ່າງເປັນປົກກະຕິ ເພື່ອຮັບຮູ້ຂໍ້ມູນຂ່າວສານສາລະໜ້າຮູ້ໃນການຕ້ານການແຜ່ລະບາດຂອງເຊື້ອພະຍາດຊະນິດນີ້ ແລະ ພະຍາດອື່ນໆ ທີ່ທາງຂັ້ນເທິງໄດ້ໂຄສະນາປະຊາສຳພັນທາງສື່ໂທລະພາບ, ວິທະຍຸ-ໜັງສືພິມ ແລະ ສື່ອື່ນໆ ແນະນຳໃຫ້ປະຊາຊົນເອົາໃຈໃສ່ແນະນຳສະມາຊິກໃນຄອບຄົວໃນການໃຊ້ຊີວິດປະຈຳວັນຢ່າງມີສະຕິ,

.

ຫຼີກລ້ຽງການເດີນທາງໄປເຂດທີ່ມີຄົນແອອັດ ຫຼື ບ່ອນທີ່ມີຄວາມສ່ຽງໃນການຕິດເຊຶ້ອ ໝັ່ນຮັກສາຄວາມສະອາດຮ່າງກາຍຕົນເອງຢ່າງສະໝໍ່າສະເໝີ ເພື່ອໂຕຂອງເຮົາເອງ ແລະ ຄົນທີ່ເຮົາຮັກ ເວົ້າລວມແລ້ວແມ່ນເພື່ອປະເທດຊາດຈະໄດ້ຫຼຸດພົ້ນຈາກເຊື້ອພະຍາດ ໂຄວິດ-19 ຢ່າງຊີ້ນເຊີງ ເພາະ ພັກ-ລັດ ຍາມໃດກໍ່ຖືສຸຂະພາບຂອງປະຊາຊົນພາຍໃນຊາດເປັນສິ່ງສຳຄັນ. ຖ້າຄົນໃນຊາດສຸຂະພາບແຂງແຮງແລ້ວ ປະເທດຊາດກໍ່ຈະມີຄວາມເຂັ້ມແຂງ ສັງຄົມມີຄວາມສີວິໄລ, ປະເທດຊາດກໍ່ມີຄວາມຈະເລີນຮຸ່ງເຮືອງຍິ່ງໆຂື້ນ.

ສຸກັນ ວົງສະຫວັດ