ຂ່າວດີອີກແລ້ວ! ຄົບຮອບ 19 ມື້ພໍດີ ລາວບໍ່ຕິດເຊື້ອເພີ່ມ ເຮັດໃຫ້ຕົວເລກສະສົມທີ່ 19 ກໍລະນີ

ຂ່າວດີອີກແລ້ວ! ຄົບຮອບ 19 ມື້ພໍດີ ລາວບໍ່ຕິດເຊື້ອເພີ່ມ ເຮັດໃຫ້ຕົວເລກສະສົມທີ່ 19 ກໍລະນີ

1st May 2020 0 By Admin

1 ພຶດສະພາ 2020 ສປປ ລາວ ຍັງບໍ່ພົບຜູ້ຕິດເຊື້ອໃໝ່ ນັບເປັນເວລາ 19 ມື້ແລ້ວ (ເລິ່ມແຕ່ວັນທີ 12 ເມສາ 2020 ເປັນຕົ້ນມາ).ເຮັດໃຫ້ຍອດຜູ້ຕິດເຊື້ອສະສົມຍັງທີ່  19 ຄົນ ປິ່ນປົວຫາຍດີ ແລະ ອອກໂຮງໝໍແລ້ວ 08 ຄົນ ແລະ ຍັງເຫຼືອ 11 ຄົນ ທີ່ຈະໄດ້ສືບຕໍ່ຕິດຕາມ ປິ່ນປົວຕາມອາການຢ່າງໃກ້ຊິດ.

ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ,  ຜູ້ປະຈໍາການ ຄະນະສະເພາະກິດ ຖະແຫຼງໃນວັນທີ 30 ເມສາ 2020ວ່າ:  ໄດ້ເກັບຕົວຢ່າງມາກວດທັງໝົດ 94 ຄົນ, ໃນນັ້ນ ຜູ້ມີອາການສົງໄສມາກວດຢູ່ໂຮງໝໍ 79 ຄົນ, ເກັບຕົວຢ່າງຜູ້ຕິດເຊື້ອທີ່ນອນປິ່ນປົວຢູ່ໂຮງໝໍມາກວດຄືນ 11 ຄົນ, ແລະ ແຮງງານລາວທີ່ກັບມາຈາກປະເທດໄທ 04 ຄົນ.

ໃນຈໍານວນຜູ້ມີອາການສົງໄສ 79 ຄົນ ລາຍລະອຽດດັ່ງລຸ່ມນີ້: ນະຄອນຫຼວງວຽງຈັນ 02 ຄົນ; ບໍລິຄຳໄຊ 01 ຄົນ; ໄຊຍະບູລີ 50 ຄົນ (ຊ່າງແປງໄຟຟ້າຄົນໄທທີ່ເຂົ້າມາ) ໂຮງໝໍມິດຕະພາບ 26 ຄົນ (ແພດໝໍທີ່ສຳເລັດໄລຍະເຮັດວຽກປິ່ນປົວຄົນເຈັບ ໂຄວິດ-19) ເຊິ່ງໃນຈຳນວນແຮງງານລາວທີ່ກັບມາແຕ່ໄທ 04 ລາຍລະອຽດດັ່ງລຸ່ມນີ້: ຈຳປາສັກ 03 ຄົນ ແລະ ອັດຕະປຶ 01 ຄົນ. ທັງນີ້,  ຜົນກວດທັງໝົດ 94 ຄົນ ບໍ່ພົບເຊື້ອ. ໝາຍຄວາມວ່າໃນວັນທີ 30 ເມສາ 2020 ບໍ່ມີກໍລະນີໃໝ່.

ນັບແຕ່ເດືອນມັງກອນ ຮອດ ວັນທີ 30 ເມສາ 2020 ໄດ້ເກັບຕົວຢ່າງມາກວດທັງໝົດ ມີ 2,021 ຕົວຢ່າງ, ກວດພົບເຊື້ອສະສົມ 19 ຄົນ (19 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ).