ທຄຕລ ເຊກອງ ມອບນໍ້າດື່ມ ແລະ ອຸປະກອນປ້ອງກັນພະຍາດໂຄວິດ

ທຄຕລ ເຊກອງ ມອບນໍ້າດື່ມ ແລະ ອຸປະກອນປ້ອງກັນພະຍາດໂຄວິດ

1st May 2020 0 By Admin

ໃນວັນທີ 30 ເມສາ 2020 ທະນາຄານການຄ້າຕ່າງປະເທດລາວມະຫາຊົນ (ທຄຕລ) ສາຂາແຂວງເຊກອງ ໄດ້ນໍາເອົາເຄື່ອງຊ່ວຍເຫຼືອມອບໃຫ້ເຈົ້າໜ້າທີ່ຢູ່ຈຸດກັ່ນຕອງຄົນເຂົ້າ-ອອກເມືອງ ເພື່ອປ້ອງກັນພະຍາດໂຄວິດ-19 ຢູ່ຈຸດບ້ານເຊນໍ້ານ້ອຍ, ຂົວມິດຕະພາບລາວ-ຍີ່ປຸ່ນ ແຂວງເຊກອງ ແລະຈຸດບ້ານຮ່ອງໄລ່ ກ່າວມອບໂດຍທ່ານ ຄອນປະເສີດ ຫຼວງສຸວັນນະວົງ ຫົວໜ້າ ທຄຕລ ສາຂາແຂວງເຊກອງ ແລະກ່າວຮັບແມ່ນທ່ານ ຮອ ເພັດສະໄໝ ຖິ່ນຫາດສາຍຄໍາ.

.


ທ່ານ ຄອນປະເສີດ ຫຼວງສຸວັນນະວົງ ກ່າວວ່າ: ການມອບເຄື່ອງຊ່ວຍເຫຼືອຄັ້ງນີ້ ເປັນການປະກອບສ່ວນອັນສໍາຄັນ ເພື່ອຊ່ວຍເຫຼືອສັງຄົມດ້ວຍກັນ ໂດຍປະກອບມີນໍ້າດື່ມຈໍານວນ 30 ແກັດ, ໜ້າກາກອະນາໄມ້ 3 ກັບ, ຄັນຮົ່ມໃຫຍ່ 3 ອັນ ແລະເສື້ອຍືດຄໍມົນ 14 ຜືນລວມມູນຄ່າ 3,5 ລ້ານກີບ ເຖິງວ່າ ເຄື່ອງຊ່ວຍເຫຼືອດັ່ງກ່າວຈະມີມູນຄ່າບໍ່ຫຼາຍ, ແຕ່ມັນສະແດງໃຫ້ເຫັນເຖິງນ້ຳໃຈຄວາມສາມັກຄີຮັກແພງແບ່ງປັນຊ່ວຍເຫຼືອເຊິ່ງກັນ ແລະກັນ ໃນຍາມຫຍຸ້ງຍາກ ແລະທັງເປັນການໃຫ້ກຳລັງໃຈແກ່ເຈົ້າໜ້າທີ່ຜູ້ເສຍສະຫຼະສະຕິປັນຍາ, ເຫື່ອແຮງ ເພື່ອຊ່ວຍຄວບຄຸມ ແລະຕ້ານການລະບາດຂອງພະຍາດໂຄວິດ-19.

.


ໂອກາດນີ້, ທ່ານ ຮອ ເພັດສະໄໝ ຖິ່ນຫາດສາຍຄໍາ ໄດ້ກ່າວສະແດງຄວາມຂອບໃຈມາຍັງທະນາຄານການຄ້າຕ່າງປະເທດລາວມະຫາຊົນສາຂາແຂວງເຊກອງທີ່ໃຫ້ການສະໜັບສະໜູນຊ່ວຍເຫຼືອໃນຄັ້ງນີ້ ແລະຂໍຢືນຢັນວ່າພວກເຮົາຈະນຳເອົາວັດຖຸດັ່ງກ່າວນຳໃຊ້ໃຫ້ເປັນປະໂຫຍດ, ມີຜົນສຳເລັດ ແລະນຳໃຊ້ໃຫ້ຖືກເປົ້າໝາຍ

.