ຂ່າວດີຕໍ່ເນື່ອງເລີຍ! 17 ມື້ແລ້ວ ລາວບໍ່ພົບຜູ້ຕິດເຊື້ອເພີ່ມ, ຄາດຄົນທີ 8 ກຽມອອກໂຮງໝໍໄວໆນີ້

ຂ່າວດີຕໍ່ເນື່ອງເລີຍ! 17 ມື້ແລ້ວ ລາວບໍ່ພົບຜູ້ຕິດເຊື້ອເພີ່ມ, ຄາດຄົນທີ 8 ກຽມອອກໂຮງໝໍໄວໆນີ້

29th April 2020 0 By Admin

ສປປ ລາວ 17 ມື້ແລ້ວ ທີ່ບໍ່ມີຜູ້ຕິດເຊື້ອໃໝ່. ໃນຈໍານວນຜູ້ຕິດເຊື້ອສະສົມ 19 ຄົນ ກໍ່ໄດ້ອອກໂຮງໝໍແລ້ວ 08 ຄົນ ແລະ ຍັງເຫຼືອ 11 ຄົນ ທີ່ຈະໄດ້ສືບຕໍ່ຕິດຕາມ ປິ່ນປົວຕາມອາການຢ່າງໃກ້ຊິດ. ເຖິງສະພາບການລະບາດຜ່ອນຄາຍລົງຄືແນວນີ້ ແຕ່ພວກເຮົາກໍ່ບໍ່ໄດ້ປະໝາດ ແລະ ມີການເຝົ້າລະວັງຢ່າງໃກ້ຊິດ ເພື່ອສະກັດກັ້ນ ບໍ່ໃຫ້ມີການລະບາດຄືນຄັ້ງທີ 2.

ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ຜູ້ປະຈໍາການ ຄະນະສະເພາະກິດ ຖະແຫຼງໃນວັນທີ 29 ເມສາ 2020 ວ່າ: ໃນວັນທີ 28 ເມສາ 2020, ໄດ້ເກັບຕົວຢ່າງມາກວດທັງໝົດ 33 ຄົນ, ໃນນັ້ນ ຜູ້ມີອາການສົງໄສມາກວດຢູ່ໂຮງໝໍ 11 ຄົນ, ເກັບຕົວຢ່າງຜູ້ຕິດເຊື້ອມາກວດຄືນ 03 ຄົນ ແລະ ແຮງງານລາວທີ່ກັບມາຈາກປະເທດໄທ 19 ຄົນ (ແຮງງານທັງໝົດແມ່ນບໍ່ມີອາການ).  ໃນຈໍານວນຜູ້ມີອາການສົງໄສ 11 ຄົນຄື: ນະຄອນຫຼວງວຽງຈັນ 09 ຄົນ; ຈຳປາສັກ 01 ຄົນ; ຄຳມ່ວນ 01 ຄົນ

ສຳລັບແຮງງານລາວ ຈຳນວນ 19 ຄົນ ລາຍລະອຽດດັ່ງລຸ່ມນີ້:  ສະຫວັນນະເຂດ 11 ຄົນ ແລະ ຈຳປາສັກ 08 ຄົນ ເຊິ່ງຜົນກວດທັງໝົດ 33 ຄົນ ບໍ່ພົບເຊື້ອ. ໝາຍຄວາມວ່າໃນວັນທີ 28 ເມສາ 2020 ບໍ່ມີກໍລະນີໃໝ່.

ນັບແຕ່ເດືອນມັງກອນ ຮອດ ວັນທີ 27 ເມສາ 2020 ໄດ້ເກັບຕົວຢ່າງມາກວດທັງໝົດ ມີ 1,917 ຕົວຢ່າງ, ກວດພົບເຊື້ອສະສົມ 19 ຄົນ (17 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ). ສຳລັບຜູ້ສຳຜັດໃກ້ຊິດກັບຜູ້ຕິດເຊື້ອທັງໝົດມີ 313 ຄົນ ໄດ້ຄົບກຳນົດຕິດຕາມແລ້ວ.

ປະຈຸບັນ ມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍແຕ່ 12 ຄົນ. ຢູ່ໂຮງໝໍແຂວງຫຼວງພະບາງ ມີ 01 ຄົນ ເປັນເພດຊາຍ ໄດ້ກວດຫາເຊື້ອ 2 ຄັ້ງຕິດຕໍ່ກັນໃນ 24 ຊົ່ວໂມງ ບໍ່ພົບເຊື້ອ ຈະໄດ້ໃຫ້ອອກໂຮງໝໍໄປຕິດຕາມຢູ່ເຮືອນ. ສ່ວນຢູ່ໂຮງໝໍມິດຕະພາບ ມີ 11 ຄົນ ທັງໝົດເຫັນວ່າ ມີອາການເບົາບາງ, ຍັງຕິດຕາມເພື່ອກວດວິເຄາະຢັ້ງຢືນການບໍ່ພົບເຊື້ອ ຈຶ່ງໃຫ້ອອກໂຮງໝໍ.