ປ້ອງກັນຕິດເຊື້ອອີກຄັ້ງ! ຜູ້ຕິດເຊື້ອໂຄວິດທີ່ປິ່ນປົວດີແລ້ວ ຕ້ອງກັກຕົວເອງອີກ 14-28 ວັນ ຕິດຕາມອາການ

ປ້ອງກັນຕິດເຊື້ອອີກຄັ້ງ! ຜູ້ຕິດເຊື້ອໂຄວິດທີ່ປິ່ນປົວດີແລ້ວ ຕ້ອງກັກຕົວເອງອີກ 14-28 ວັນ ຕິດຕາມອາການ

27th April 2020 0 By Admin

ອີງຕາມການລາຍງານຜົນການວິເຄາະ-ວິໄຈ ໃນຕ່າງປະເທດພົບວ່າ: ກຸ່ມຄົນຕິດເຊື້ອທີ່ບໍ່ສະ ແດງອາການມີອັດຕາກວມຫລາຍກວ່າ 70% ຂອງຈໍານວນຜູ້ຕິດເຊື້ອທັງໝົດ ແລະ ເປັນກຸ່ມຄົນທີ່ແຜ່ເຊື້ອດັ່ງກ່າວໄປໃສ່ຄົນອື່ນໄດ້ຢ່າງວ່ອງໄວ. ດັ່ງນັ້ນ, ຜູ້ທີ່ຕິດເຊື້ອໂຄວິດ-19 ແລະ ໄດ້ຮັບການປິ່ນປົວໃຫ້ຫາຍດີແລ້ວ ເມື່ອອອກໂຮງໝໍໄປ ກໍຕ້ອງໃຫ້ກັກຕົວຢູ່ເຮືອນຕື່ມອີກປະມານ 14-28 ວັນ ເພື່ອຕິດຕາມອາການ ເນື່ອງຈາກພະຍາດ ມັນອາດລີ້ຊ້ອນໃນຮ່າງກາຍຜູ້ຕິດເຊື້ອໄດ້ດົນເປັນເດືອນ ເຊື້ອຈຶ່ງຈາງຫາຍໝົດໄປ ແລະ ມີປະມານ 20-30% ຂອງຜູ້ທີ່ປິ່ນປົວຫາຍດີທັງໝົດແມ່ນໄດ້ກັບມາພົບເຊື້ອຄືນອີກ.


ທັງນີ້ ເນື່ອງຈາກ ໂຄວິດ-19 ມັນມີໂຄງສ້າງດ້ານສາຍພັນທີ່ລຶກລັບຊັບຊ້ອນ, ຜູ້ທີ່ຕິດເຊື້ອພະຍາດນີ້ມີທັງແບບສະແດງອາການ ແລະ ບໍ່ສະແດງອາການ, ໝາຍວ່າຜູ້ຕິດເຊື້ອທີ່ສະແດງອາການນັ້ນແມ່ນຈະມີໄຂ້ສູງ, ເຈັບຄໍ, ໄອ, ປວດຕົນໂຕ, ແລະ ຫາຍໃຈຍາກ ຊຶ່ງອາການທັງໝົດນີ້ຈະສະແດງອອກມາພາຍໃນໄລຍະເວລາ 14 ວັນ ພາຍຫລັງຮັບເຊື້ອ. ແຕ່ສໍາລັບກໍລະນີບໍ່ສະແດງອາການນັ້ນ, ແມ່ນພາຍຫລັງຕິດ ເຊື້ອເຂົ້າຮ່າງກາຍແລ້ວ ກໍຈະບໍ່ມີອາການຜິດປົກກະຕິຂອງຮ່າງກາຍແຕ່ຢ່າງໃດ, ໝາຍວ່າຜູ້ຕິດເຊື້ອແມ່ນຍັງເຄື່ອນໄຫວໄປມາ ແລະ ດໍາລົງຊີວິດແບບປົກກະຕິ.


ທ່ານ ດຣ. ມາຍຟອງ ມາຍຊາຍ ຮອງອະທິການບໍດີມະຫາວິທະຍາໄລວິທະຍາສາດ ແລະ ສຸຂະພາບ ໄດ້ຊີ້ໃຫ້ເຫັນວ່າ: ນີ້ແມ່ນບັນຫາທີ່ນັກວິທະຍາສາດ ຂອງວົງການແພດໃນທົ່ວໂລກ ກໍຄືຢູ່ປະ ເທດເຮົາມີຄວາມເປັນຫວ່ງ ແລະ ໄດ້ພະຍາຍາມຄົ້ນຄວ້າທາງດ້ານວິທະຍາ ສາດຢູ່ແຕ່ລະປະເທດ ໂດຍມີການປະສານສົມທົບແລກປ່ຽນຄວາມຮູ້ ເຊິ່ງກັນ ແລະ ກັນ ຢ່າງໃກ້ຊິດເພື່ອຊອກຫາວິທີປິ່ນປົວຜູ້ຕິດເຊື້ອໃຫ້ມີປະສິດທິຜົນສູງໂດຍໄວ.

ພ້ອມທັງຮຽກຮ້ອງໃຫ້ປະຊາຊົນບັນດາເຜົ່າ ຈົ່ງສືບຕໍ່ເອົາໃຈໃສ່ປະຕິ ບັດຄໍາສັ່ງເລກທີ 06/ນຍ ລວມເຖິງມາດຕະການອື່ນໆຂອງລັດຖະບານວາງອອກໃຫ້ເຂັ້ມງວດ ເພື່ອປ້ອງກັນການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ໂຄວິດ-19, ພາຍຫລັງເຫັນວ່າພະຍາດັ່ງກ່າວສາມາດແຜ່ເຊື້ອຕິດຕໍ່ຈາກຄົນສູ່ຄົນໄດ້ງ່າຍ, ແຕ່ວ່າການປິ່ນປົວໃຫ້ຫາຍດີໄວນັ້ນແມ່ນຍາກຫລາຍ.

ທີ່ມາ: ຂປລ