​ໃກ້​ແລ້ວ​ ໃກ້​ຈະ​ກັບ​ມາ​ເປັນ​ປົກ​ກະ​ຕິ​ແລ້ວ 14 ມື້​ລຽນ ບໍ່​ພົບ​ຜູ້​ຕິດ​ເຊື້ອ​ໂຄວິດ ຍັງ​ພຽງ 12 ຄົນ​ເທົ່າ​ນັ້ນ

​ໃກ້​ແລ້ວ​ ໃກ້​ຈະ​ກັບ​ມາ​ເປັນ​ປົກ​ກະ​ຕິ​ແລ້ວ 14 ມື້​ລຽນ ບໍ່​ພົບ​ຜູ້​ຕິດ​ເຊື້ອ​ໂຄວິດ ຍັງ​ພຽງ 12 ຄົນ​ເທົ່າ​ນັ້ນ

26th April 2020 0 By Admin

ວັນທີ 26 ເມສາ 2020 ຄະນະສະເພາະກິດລາຍງານ ບໍ່ມີກໍລະນີຕິດເຊື້ອໂຄວິດ-19ໃໝ່ ເຊິ່ງເປັນມື້ທີ14ແລ້ວ. ຢ່າງໃດກໍຕາມ ຄະນະສະເພາະກິດຮຽກຮ້ອງໃຫ້ທຸກໆຄົນ ເອົາໃຈໃສ່ໃນການຈັດຕັ້ງປະຕິບັດ ຄຳສັ່ງ ເລກທີ 06/ ນຍ ຢ່າງເຂັ້ມງວດຈົນຮອດວັນທີ 3 ພຶດສະພາ.

ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ – 19 ໄດ້ຖະແຫຼງຂ່າວປະຈຳວັນທີ 26 ເມສາ 2020 ທີ່ກະຊວງສາທາລະນະສຸກ ໂດຍມີ ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ ພ້ອມຄະນະເຂົ້າຮ່ວມ.

.

ທ່ານ ຮສ. ດຣ. ພູທອນ ເມືອງປາກ ກ່າວວ່າ: ໃນວັນທີ 25 ເມສາ 2020 ໄດ້ເກັບຕົວຢ່າງມາກວດທັງໝົດ 74 ຄົນ, ໃນນັ້ນ ຜູ້ມີອາການສົງໄສມາກວດຢູ່ໂຮງໝໍ 14 ຄົນ, ແຮງງານລາວທີ່ກັບມາຈາກປະເທດໄທ 60 ຄົນ (ແຮງງານທັງໝົດແມ່ນບໍ່ມີອາການ); ໃນຈໍານວນຜູ້ມີອາການສົງໄສ 14 ຄົນ ແມ່ນຢູ່ ນະຄອນຫຼວງວຽງຈັນ 12 ຄົນ ຄື: ໂຮງໝໍ ມິດຕະພາບ 9 ຄົນ , ໂຮງໝໍ ເຊດຖາທິຣາດ 2 ຄົນ, ໂຮງໝໍ 103 ມີ 1 ຄົນ, ຢູ່ແຂວງ ສະຫວັນນະເຂດ 2 ຄົນ. ຜົນກວດທັງໝົດ 74 ຄົນ ບໍ່ພົບເຊື້ອ, ໝາຍຄວາມວ່າໃນວັນທີ 25 ເມສາ 2020 ບໍ່ມີກໍລະນີໃໝ່

ມາຮອດວັນທີ 25 ເມສາ 2020 ທົ່ວປະເທດ ຍັງມີ ສູນຈໍາກັດບໍລິເວນ ທັງໝົດ 211 ສູນ ມີຜູ້ຈຳກັດບໍລິເວນຢູ່ສູນ 943 ຄົນ, ຈໍາກັດບໍລິເວນຢູ່ເຮືອນ 666 ຄົນ, ເກັບຕົວຢ່າງມາກວດວິເຄາະຫາເຊື້ອ 475 ຄົນ  ທັງໝົດບໍ່ພົບເຊື້ອ.

.

ປະຈຸບັນ ມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍພຽງແຕ່ 12 ຄົນ, ຢູ່ໂຮງໝໍແຂວງຫຼວງພະບາງ ມີ 1 ຄົນ ເປັນເພດຊາຍ, ເຫັນວ່າມີອາການຄົງຕົວ ຂັ້ນເບົາບາງ ແລະ ຍັງຕິດຕາມປິ່ນປົວຕາມອາການ, ຢູ່ໂຮງໝໍມິດຕະພາບ ມີ 11 ຄົນ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມປິ່ນປົວຕາມອາການ.

ເພື່ອເປັນການສືບຕໍ່ເຝົ້າລະວັງຢ່າງເຂັ້ມງວດຕໍ່ຜູ້ທີ່ຈະເດີນທາງເຂົ້າມາ ສປປລາວ ຈາກຕ່າງປະເທດລວມທັງແຮງງານລາວທີ່ຈະມາຈາກປະເທດໄທ ຫ້ອງວ່າການສຳນັກງານນາຍົກລັດຖະມົນຕີ ຈຶ່ງມີແຈ້ງການ ເລກທີ 507/ຫສນຍ ວັນທີ 24 ເມສາ 2020 ແລະ ແຈ້ງການຂອງຄະນະສະເພາະກິດ ເລກທີ 037/ສພກ, ລົງວັນທີ 24 ເມສາ 2020 ເຖິງເຈົ້າຄອງນະຄອນຫຼວງ ແລະ ບັນດາເຈົ້າແຂວງທົ່ວປະເທດ ໃຫ້ກະກຽມສະຖານທີ່ ຈຳກັດບໍລິເວນ ຜູ້ເດີນທາງມາຈາກຕ່າງປະເທດ ໃຫ້ຖືກຕ້ອງຕາມມາດຕະຖານການປ້ອງກັນການແຜ່ເຊື້ອ.

.

ສະນັ້ນ ຈຶ່ງຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າ, ອົງການຈັດຕັ້ງທຸກພາກສ່ວນ ຈົ່ງສືບຕໍ່ຮ່ວມໄມ້ຮ່ວມມື ເປັນເຈົ້າການຈັດຕັ້ງປະຕິບັດຄຳສັ່ງ ເລກທີ 06/ນຍ ແລະ ບັນດາຂໍ້ແນະນຳຕ່າງໆຢ່າງຖືກຕ້ອງ ແລະ ເຂັ້ມງວດ ຈົນຮອດວັນທີ 03 ພຶດສະພາ 2020.