ຊົມເຊີຍ! ໄຟຟ້ານໍ້າງື່ມ 3 ມອບເງີນ 50 ລ້ານກີບ ຊ່ວຍແຂວງໄຊສົມບູນ ຕ້ານໂຄວິດ-19

ຊົມເຊີຍ! ໄຟຟ້ານໍ້າງື່ມ 3 ມອບເງີນ 50 ລ້ານກີບ ຊ່ວຍແຂວງໄຊສົມບູນ ຕ້ານໂຄວິດ-19

25th April 2020 0 By Admin

ໂດຍອີງໃສ່ສະພາບຫຼາຍປະເທດໃນທົ່ວໂລກ ພວມປະເຊີນໜ້າກັບການແຜ່ລະບາດ ຂອງພະຍາດໂຄວິດ 19 ຊຶ່ງມັນໄດ້ສົ່ງຜົນສະທ້ອນໃນທາງລົບ ຕໍ່ຊີວິດການເປັນຢູ່ຂອງມວນມະນຸດໂລກ ໃນຫຼາຍໆປະເທດ ໂດຍສະເພາະ ຢູ່ແຂວງໄຊສົມບູນ ກໍພວມຢືນຢູ່ຕໍ່ໜ້າຂອງຄວາມສ່ຽງດັ່ງກ່າວ. ຕໍ່ກັບສິ່ງທ້າທາຍທີ່ກ່າວມານັ້ນ ແຂວງໄຊສົມບູນ ກໍໄດ້ຮີບຮ້ອນສະກັດກັ້ນ ແລະ ຕອບໂຕ້ ແຕ່ຫົວທີ ໂດຍນໍາໃຊ້ມາດຕະການຕ່າງໆ ຢ່າງເຂັ້ມງວດ ໂດຍທຸກພາກສ່ວນໃນສັງຄົມ ຕ່າງກໍໃຫ້ການຮ່ວມມື ແລະ ປະກອບສ່ວນ ທາງດ້ານວັດຖຸ ແລະ ປັດໄຈ ເປັນຈຳນວນຫຼວງຫຼາຍ ພໍສົມຄວນ ເພື່ອນຳໃຊ້ເຂົ້າໃນການຄວບຄຸມ ແລະ ສະກັດກັ້ນ-ການແຜ່ລະບາດ ຂອງພະຍາດໂຄວິດ 19 ເພື່ອພ້ອມກັນກ້າວຜ່ານວິກິດການ ດັ່ງກ່າວນີ້ ໃຫ້ກັບສູ່ສະພາບປົກກະຕິ.


ໃນຕອນບ່າຍຂອງວັນທີ 24 ເມສາ 2020 ນີ້ ບໍລິສັດ ໄຟຟ້ານໍ້າງື່ມ 3 ພາວເວີ ຈຳກັດ ໄດ້ມອບເງິນ ຈຳ ນວນ 50,000,000 ກີບ ມາຊຸກຍູ້ແຂວງໄຊສົມບູນ ເພື່ອຕ້ານໂຄວິດ 19 ທີ່ຫ້ອງວ່າການແຂວງ ຊຶ່ງຕາງໜ້າໃຫ້ອົງ ການປົກຄອງ ແຂວງ ຂຶ້ນກ່າວຮັບໂດຍ ທ່ານ ແດງ ປະທຸມທອງ, ຮອງເຈົ້າແຂວງໄຊສົມບູນ ທັງເປັນຫົວໜ້າຄະນະສະເພາະກິດ ຂັ້ນແຂວງ ພ້ອມດ້ວຍທຸກພາກສ່ວນທີ່ກ່ຽວ ຂ້ອງ ເຂົ້າຮ່ວມ ເປັນສັກຂີພິຍານ.

ພ້ອມນີ້ ໃນນາມສ່ວນຕົວຂອງປະທານບໍລິສັດ ຈະເລີນເຊກອງ ພະລັງງານ ຈຳກັດ ກໍໄດ້ມອບຜ້າອັດປາກ ແລະ ເຈວລ້າງມືຈຳນວນໜຶ່ງ ໃຫ້ແຂວງໄຊສົມບູນ ເພື່ອປະກອບສ່ວນ ເຂົ້າໃນການປ້ອງກັນ, ຄວບຄຸມ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ 19 ຕື່ມອີກ.

ທ່ານ ແດງ ປະທຸມທອງ  ຫົວໜ້າຄະນະສະເພາະກິດ ເພື່ອການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ-19  ໄດ້ສະແດງຄວາມຂອບອົກຂອບໃຈ ແລະ ຍ້ອງຍໍຊົມເຊີຍ ຕໍ່ນໍ້າໃຈເສຍສະຫຼະ ອັນສູງສົ່ງ ຂອງບໍລິສັດ ໄຟຟ້ານໍ້າງື່ມ 3 ພາວເວີ ຈຳກັດ ທີ່ໄດ້ປະກອບສ່ວນອັນສຳຄັນ ເຂົ້າໃນການຮັບໃຊ້ວຽກງານສ່ວນລວມ ຄັ້ງນີ້ ໂດຍສະເພາະ ກໍຄືນໍາໃຊ້ປ້ອງກັນ, ຕ້ານ ແລະ ສະກັດກັ້ນ ພະຍາດໂຄວິດ 19 ຢູ່ແຂວງໄຊສົມບູນ ຊຶ່ງມັນໄດ້ສະແດງເຖິງຄວາມເປັນຫ່ວງເປັນໃຍ, ຄວາມສາມັກຄີ-ຮັກແພງ ຊ່ວຍເຫຼືອຊຶ່ງກັນ ແລະ ກັນ ໃນເງື່ອນໄຂ ທີ່ປະສົບກັບຄວາມຫຍຸ້ງຍາກ ດັ່ງປັດຈຸບັນ.

ເຊິ່ງໃນໂອກາດດັ່ງກ່າວ ຍັງໄດ້ມີການລົງນາມເຊັນບົດທັນທຶກ ລະຫວ່າງຫົວໜ້າໜ່ວຍງານປະຕິບັດການ ໂຄວິດ 19 ກັບ ບໍລິສັດ ເຂື່ອນໄຟຟ້ານໍ້າງື່ມ 3 ກ່ຽວກັບການຂໍອະນຸຍາດ ໃຫ້ບໍລິສັດກໍ່ສ້າງເຂື່ອນໄຟຟ້ານໍ້າງື່ມ 3 ພາວເວີ ຈຳກັດ ຂົນສົ່ງພາຫະນະກົນຈັກວັດຖຸ-ອຸປະກອນ ແລະ ພາຫະນະຮັບໃຊ້ ວຽກງານບໍລິຫານ ໂຄງການ ທັງນີ້ ກໍເພື່ອເປັນບ່ອນອີງ ໃຫ້ທັງສອງຝ່າຍ ໄດ້ຈັດຕັ້ງປະຕິບັດຕາມບົດບັນທຶກ ສະບັບນີ້ ຢ່າງເຂັ້ມງວດ ທັງໝົດນັ້ນ ກໍເພື່ອພ້ອມກັນສຸມໃສ່ ການປ້ອງກັນ ພະຍາດໂຄວິດ 19 ບໍ່ໃຫ້ແຜ່ລາມອອກເປັນວົງກວ້າງ ແລະ ເຮັດໃຫ້ແຂວງໄຊສົມບູນ ເຂົ້າສູ່ສະພາບປົກກະຕິໂດຍໄວ.

ທີ່ມາ: Media Laos