ຂອບໃຈເດີ້ ສົ່ງມາໃຫ້ອີກ! ລັດຖະບານຈີນ ສົ່ງອຸປະກອນການແພດ ໃຫ້ລາວອີກຊຸດໜຶ່ງຕ້ານໂຄວິດ-19

ຂອບໃຈເດີ້ ສົ່ງມາໃຫ້ອີກ! ລັດຖະບານຈີນ ສົ່ງອຸປະກອນການແພດ ໃຫ້ລາວອີກຊຸດໜຶ່ງຕ້ານໂຄວິດ-19

22nd April 2020 0 By Admin

ວັນທີ 21 ເມສາ 2020 ທ່ານ ຈ່ຽງຈ້າຍຕົ່ງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ໄດ້ໂອ້ລົມແລກປ່ຽນຄໍາເຫັນ ກ່ຽວກັບການຕ້ານພະຍາດປອດອັກເສບຈາກເຊື້ອຈຸລະໂລກສາຍພັນໃໝ່ໂຄວິດ-19 ກັບ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ຈ່ຽງຈ້າຍຕົ່ງ ໄດ້ກ່າວວ່າ: ລັດຖະບານຈີນໄດ້ຕົກລົງມອບອຸປະກອນການແພດເພື່ອຕ້ານພະຍາດໂຄວິດ-19 ໃຫ້ແກ່ລາວອີກຊຸດໜຶ່ງ.


ໂອກາດນີ້, ທ່ານ ຈ່ຽງຈ້າຍຕົ່ງ ໄດ້ກ່າວວ່າ: ໄລຍະນີ້ ຖືວ່າເປັນໄລຍະທີ່ສໍາຄັນສໍາລັບການປ້ອງກັນ ແລະຄວບຄຸມພະຍາດໂຄວິດ-19 ເຊິ່ງຍິ່ງຕ້ອງທໍາຄວາມພະຍາຍາມຫຼາຍຂຶ້ນກວ່າເກົ່າເພື່ອເປັນການສະໜັບສະໜູນຝ່າຍລາວຕ້ານກັບພະຍາດດັ່ງກ່າວ ກໍ່ຄືການຈັດຕັ້ງປະຕິບັດເນື້ອໃນຈິດໃຈ ຂອງການສົນທະນາທາງໂທລະສັບລະຫວ່າງການນໍາສູງສຸດຂອງສອງພັກ ລາວ-ຈີນ.

ສະນັ້ນ ລັດຖະບານຈີນ ຈິ່ງໄດ້ຕົກລົງຈະມອບອຸປະກອນການແພດເພື່ອຕ້ານພະຍາດໂຄວິດ-19 ອີກຊຸດໜຶ່ງໃຫ້ແກ່ລາວ ເຊິ່ງລວມມີ: ນ້ຳຢາກວດຫາເຊື້ອພະຍາດໂຄວິດ-19 ຈຳນວນ 50,000 ຊຸດ, ຊຸດປ້ອງກັນຕົວເອງ ຈຳນວນ 30,000 ຊຸດ, ຜ້າປິດປາກທົ່ວໄປ ຈຳນວນ 1,400,000 ອັນ, ຜ້າປິດປາກ N95 ຈຳນວນ 30,000 ອັນ, ແວ່ນຕາການແພດ ຈໍານວນ 30,000 ອັນ, ຖົງມືປ້ອງກັນທາງດ້ານການແພດ ຈໍານວນ 700,000 ຄູ່, ເຄື່ອງແທກອຸນຫະພູມ ຈໍານວນ 1,200 ອັນ.


ນອກນີ້, ທ່ານ ຈ່ຽງຈ້າຍຕົ່ງ ຍັງໄດ້ກ່າວວ່າ ຈີນມີແຜນຈະແຕ່ງຕັ້ງ ແລະ ສົ່ງຄະນະຊ່ຽວຊານແພດຈີນມາເຮັດວຽກຢູ່ລາວເປັນໄລຍະຍາວ ເພື່ອຮ່ວມກັບຝ່າຍລາວຕ້ານພະໂຄວິດ-19 ນໍາກັນ. ເຊິ່ງທ່ານຢໍ້າອີກວ່າ ຈີນ-ລາວ ເປັນຄູ່ຮ່ວມຊາຕາກໍາ, ໃນໄລຍະທີ່ຮີບດ່ວນທີ່ສຸດຂອງຈີນ, ວົງການຕ່າງໆຂອງລາວກໍ່ໄດ້ຊ່ວຍເຫຼືອຈີນຢ່າງຈິງໃຈ ຖານອ້າຍນ້ອງດຽວກັນ, ປະຊາຊົນຈີນໃຫ້ຄວາມສໍາຄັນແກ່ການຕອບບຸນແທນຄຸນ ເຊິ່ງໃນໄລຍະທີ່ລາວພວມປະເຊີນກັບຄວາມຫຍຸ້ງຍາກແລ້ວ, ຈີນຈະຢູ່ເສີຍບໍ່ໄດ້ຢ່າງເດັດຂາດ.

ທີ່ມາ: CRI-FM93