ຊົມເຊີຍ! ບໍລິສັດກຸ່ມນະຄອນຊັບ ມອບຜ້າອັດປາກ 80 ພັນອັນ ໃຫ້ກະຊວງປ້ອງກັນປະເທດ

ຊົມເຊີຍ! ບໍລິສັດກຸ່ມນະຄອນຊັບ ມອບຜ້າອັດປາກ 80 ພັນອັນ ໃຫ້ກະຊວງປ້ອງກັນປະເທດ

21st April 2020 0 By Admin

ເພື່ອເປັນການປະກອບເຂົ້າໃນການຕ້ານ ແລະ ສະກັດກັ້ນ ການແຜ່ລະບາດຂອງພະຍາດ ໂຄວິດ -19  ບໍລິສັດກຸ່ມນະຄອນຊັບຈຳກັດໄດ້ມອບຜ້າອັດປາກ ຈໍານວນ 80.000 ອັນ, ມູນຄ່າ 40.000 ໂດລາສະຫະລັດໃຫ້ກະຊວງປ້ອງກັນປະເທດ, ໃນວັນທີ 20 ເມສາ ຜ່ານມານີ້, ຢູ່ທີ່ສະໂມສອນຫ້ອງວ່າການກະຊວງປ້ອງກັນປະເທດ, ຕາງໜ້າບໍລິສັດກ່າວມອບໂດຍ ທ່ານ ປາຍຈາງຢຸນ ແລະ ຕາງໜ້າກະຊວງປ້ອງກັນປະເທດ ກ່າວຮັບໂດຍ ທ່ານ ພັນເອກ ໄພວັນ ຈັນທະພົມມາ ຮອງຫົວຫນ້າຫ້ອງວ່າການກະຊວງປ້ອງກັນປະເທດ, ມີພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພະຍານ.


ທ່ານ ປາຍຈາງຢຸນ ໄດ້ກ່າວວ່າ: ນັບແຕ່ພະຍາດໂຄວິດ-19 ໄດ້ມີລະບາດຢູ່ ສປປ ລາວ ທາງກຸ່ມບໍລິສັດຂອງພວກເຮົາກໍມີຄວາມເປັນຫ່ວງເປັນໃຍປະຊາຊົນລາວທຸກທົ່ວໜ້າກໍ່ຄືນາຍ ແລະ ພົນທະຫານກອງທັບປະຊາຊົນລາວ, ສະນັ້ນ ບໍລິສັດກຸ່ມນະຄອນຊັບພວກເຮົາຈຶ່ງໄດ້ຫາວິທີທາງຊ່ວຍເຫຼືອ ແລະ ຮີບໂຮມໄດ້ອຸປະກອນການແພດທີມີຄວາມຈໍາເປັນຈໍານວນໜຶ່ງມາມອບໃຫ້ກອງທັບປະຊາຊົນລາວ ແລະ ຫວັງວ່າເຄື່ອງຈຳນວນນີ້ຈະເປັນການປະກອບສ່ວນຊ່ວຍຕ້ານການແຜ່ລະບາດພະຍາດໂຄວິດ -19 ໃນສປປລາວ ຂໍໃຫ້ ປະເທດລາວເຮົາຜ່ານພົ້ນວິກິດນີ້ໄປດ້ວຍດີ.

*
ໂອກາດນີ້ ທ່ານ ພັນເອກ ໄພວັນ ຈັນທະພົມມາ ຕາງໜ້າໃຫ້ຄະນະນຳກະຊວງປ້ອງກັນປະເທດກໍ່ຄືນາຍແລະພົນທະຫານ,ພະນັກງານແພດຫມໍໃນທົ່ວກອງທັບ ໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນ ມາຍັງ ບໍລິສັດຂອງພວກທ່ານທີ່ໄດ້ປະກອບສ່ວນສຳຄັນເຂົ້າໃນຂົງເຂດວຽກງານດັ່ງກ່າວແລະເຫັນໄດ້ຄວາມຫມາຍສຳຄັນຈຳເປັນທີ່ມອບອຸປະກອນການແພດ,ເວົ້າສະເພາະແມ່ນຜ້າອັດປາກໃນຄັ້ງນີ້ເພື່ອເປັນການປ້ອງກັນ ແລະ ຕ້ານການແຜ່ລະບາດຂອງພະຍາດໂຄວິດ-19, ພ້ອມທັງໃຫ້ສັນຍາວ່າ ຈະນໍາເອົາອຸປະກອນດັ່ງກ່າວນີ້ ໄປນໍາໃຊ້ໃຫ້ຖືກຕ້ອງຕາມເປົ້າໝາຍ ແລະ ມີຜົນປະໂຫຍດສູງ ພ້ອມນັ້ນຍັງໄດ້ມອບໃບກຽດຕິຄຸນໃຫ້ບໍລິສັດດັ່ງກ່າວອີກດ້ວຍ.

*

ທີ່ມາ: Media Laos