ສະຫວັນນະເຂດ! ກຽມຈັດງານເທສະການສະຫວັນສຸກສັນຫັນສາ ເພື່ອດຶງດູດນັກທ່ອງທ່ຽວ

ສະຫວັນນະເຂດ! ກຽມຈັດງານເທສະການສະຫວັນສຸກສັນຫັນສາ ເພື່ອດຶງດູດນັກທ່ອງທ່ຽວ

16th November 2019 0 By Admin

ທ່ານ ນາງ ວິໄລວັນ ຈັນທະວົງ ປະທານກຸ່ມບໍລິສັດທ່ອງທ່ຽວແຂວງສະຫວັນນະເຂດ ໄດ້ໃຫ້ສຳພາດຕໍ່ນັກຂ່າວຂອງພວກເຮົາກ່ຽວກັບງານເທສະການສະຫວັນສຸກສັນຫັນສາວ່າ: ຈຸດປະສົງຂອງການຈັດງານກໍ່ເພື່ອສົ່ງເສີມການທ່ອງທ່ຽວເພື່ອໂປຮໂໝດ ຕົວເມືອງເກົ່າຂອງນະຄອນໄກສອນພົມວິຫານ ເພື່ອໃຫ້ນັກທ່ອງທ່ຽວທັງພາຍໃນ ແລະຕ່າງປະເທດໄດ້ຮັບຮູ້, ເພາະຜ່ານມາແມ່ນຍັງບໍ່ເຄີຍມີການຈັດງານແບບນີ້ມາກ່ອນ.

ສະນັ້ນ, ທາງກຸ່ມທຸລະກິດທ່ອງທ່ຽວໄດ້ເຫັນຄວາມສຳຄັນແລະໄດ້ເຫັນຄວາມງາມຂອງຕົວເມືອງເກົ່າຈຶ່ງໄດ້ຮ່ວມມືກັນກັບພະແນກຖວທ ແຂວງ, ນະຄອນໄກສອນພົມວິຫານແລະພາກສ່ວນທີ່ກ່ຽວຂ້ອງ ໄດ້ຈັດງານເທສະການສະຫວັນສຸກສັນຫັນສາ ທີ່ຈະມີຂຶ້ນໃນວັນທີ 22-24 ພະຈິກ 2019 ນີ້.

ຖືເປັນງານທີ່ຈັດເປັນຄັ້ງທໍາອິດແລະເປັນສິ່ງທີ່ທ້າທາຍ ເພາະຢາກໃຫ້ຕົວເມືອງຂອງແຂວງສະຫວັນນະເຂດເວົ້າລວມ, ເວົ້າສະເພາະກໍ່ແມ່ນນະຄອນໄກສອນພົມວິຫານ, ໄດ້ເປັນທີ່ຮັບຮູ້ຂອງຜູ້ຄົນຫຼາຍຂຶ້ນເຊິ່ງໃນງານແມ່ນຈະໄດ້ມີກິດຈະກຳຫຼາຍຢ່າງ, ທີ່ເປັນການຢ້ອນຍຸກ ແລະ ກິດຈະກໍາທີ່ຈະຈັດເແມ່ນເວທີໃຫຍ່ຕໍ່ໜ້າໂບດເດີ່ນຕະຫຼາດສະຫວັນກາງຄືນ, ພ້ອມທັງມີການສະແດງສິລະປະພື້ນບ້ານ, ມີດົນຕີທັງສາກົນ ແລະພາຍໃນປະເທດສົມທົບກັນ, ໃນງານຈະມີການວາງສະແດງຮູບພາບ, ປະກວດເກົ້າຜົມ ແລະ ການແຕ້ມຮູບເໝືອນ, ການວາງສະແດງຂາຍສິນຄ້າພຶ້ນເມືອງຂອງພາຍໃນແຂວງ ແລະ ຕ່າງປະເທດ, ມີໂຊນຂາຍເຄື່ອງ, ໂຊນອາຫານ ແລະ ໂຊນຂາຍເຄື່ອງທົ່ວໄປ ເຊິ່ງໃນການຈັດໂຊນ ແມ່ນມີຢູ່100 ບຸດ.

ດັ່ງນັ້ນ, ເຊີນຊວນຜູ້ຄົນທັງພາຍໃນແລະຕ່າງປະເທດ, ຢາກໃຫ້ມາສຳພັດເບິ່ງ,ມາທ່ຽວຊົມເຂດຕົວເມືອງເກົ່ານະຄອນໄກສອນພົມວິຫານແຂວງສະຫວັນນະເຂດຂອງພວກເຮົາໃນມື້ງານວັນທີ 22-24 ພະຈິກ 2019 ນີ້.

ໂອກາດນີ້, ທ່ານ ນາງວິໄລວັນ ຈັນທະວົງ ກໍ່ຍັງໄດ້ຮຽກຮ້ອງມາຍັງປະຊາຊົນໃນເຂດຕົວເມືອງເກົ່າ ຈົ່ງຮັກສາອານາໄມບໍລິເວນໜ້າເຮືອນຂອງຕົນໃຫ້ສະອາດງາມຕາ ເພື່ອໃຫ້ນັກທ່ອງທ່ຽວທີ່ເຂົ້າມາທ່ຽວຕົວເມືອງເກົ່າໄດ້ເຫັນຄວາມສວຍງາມ.

Cr. ວິທະຍຸກະຈາຍສຽງ ສະຫວັນນະເຂດ