ຂ່າວດີຕິດຕໍ່ກັນ 9 ມື້ແລ້ວ ລາວບໍ່ພົບຜູ້ຕິດເຊື້ອເພີ່ມ ແລະ ຄາດຈະມີຜູ້ອອກໂຮງໝໍເພີ່ມອີກ

ຂ່າວດີຕິດຕໍ່ກັນ 9 ມື້ແລ້ວ ລາວບໍ່ພົບຜູ້ຕິດເຊື້ອເພີ່ມ ແລະ ຄາດຈະມີຜູ້ອອກໂຮງໝໍເພີ່ມອີກ

21st April 2020 0 By Admin

ຂ່າວດີຢ່າງຕໍ່ເນື່ອງ 09 ມື້ຕິດຕໍ່ກັນ ທີ່ສປປ ລາວ ບໍ່ມີຜູ້ຕິດເຊື້ອໃໝ່ ເຮັດໃຫ້ຈໍານວນຜູ້ຕິດເຊື້ອທັງໝົດ 19 ຄົນ, ປິ່ນປົວດີ 2 ຄົນ ຍັງເຫຼືອ 17 ຄົນ, 3 ຄົນຢູ່ໂຮງໝໍແຂວງຫຼວງພະບາງ ເຫັນວ່າມີອາການຄົງຕົວ ຂັ້ນເບົາບາງ. ສ່ວນຈຳນວນ 14 ຄົນຢູ່ໂຮງໝໍມິດຕະພາບ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມການກວດຫາເຊື້ອເພື່ອຢັ້ງຢືນ ແລະ ໃນມື້ວານນີ້ໄດ້ເກັບຕົວຢ່າງມາກວດ ແລະ ມື້ນີ້ກໍ່ໄດ້ເກັບຕົວຢ່າງມາກວດຊໍ້າອີກ ຄາດວ່າຈະມີຜູ້ບໍ່ພົບເຊື້ອ 2 ຄັ້ງຕໍ່ກັນ ກໍ່ຈະໄດ້ມີຄົນອອກໂຮງໝໍເພີ່ມອີກ.

ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີ ກະຊວງສາທາລະນະສຸກ ຖະແຫຼງໃນວັນທີ 21 ເມສາ 2020 ວ່າ:  ໃນວັນທີ 20 ເມສາ 2020, ໄດ້ເກັບຕົວຢ່າງມາກວດທັງໝົດ 29 ຄົນ, ໃນນັ້ນມີຜູ້ສຳຜັດໃກ້ຊິດ ກັບຜູ້ຕິດເຊື້ອ 14 ຄົນ, ກໍລະນີມີອາການສົງໄສ 15 ຄົນ.

ເຊິ່ງໃນຈໍານວນ 29 ຄົນ ທີ່ມາກວດນັ້ນມີ ນະຄອນຫຼວງວຽງຈັນ 14 ຄົນ ແລະ ຕ່າງແຂວງ 15 ຄົນ ລາຍລະອຽດ ດັ່ງລຸ່ມນີ້:  ແຂວງໄຊສົມບູນ 10 ຄົນ (ກວດຄືນຫຼັງຄົບກຳນົດຕິດຕາມ 14 ວັນ); ແຂວງຫຼວງພະບາງ 05 ຄົນ ແມ່ນກໍລະນີສົງໃສ. ໂດຍຜົນກວດທັງໝົດ 29 ກໍລະນີ ບໍ່ພົບເຊື້ອ (ໝາຍຄວາມວ່າໃນວັນທີ 20 ເມສາ 2020 ບໍ່ມີກໍລະນີໃໝ່).

ນັບແຕ່ເດືອນມັງກອນ ຮອດ ວັນທີ 20 ເມສາ 2020 ໄດ້ເກັບຕົວຢ່າງມາກວດທັງໝົດ ມີ 1,378 ຄົນ, ກວດພົບເຊື້ອທັງໝົດ 19 ຄົນ (09 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ).

ສຳລັບຈໍານວນຜູ້ສໍາຜັດໃກ້ຊິດກັບຜູ້ຕິດເຊື້ອທັງໝົດ ທີ່ໄດ້ຕິດຕາມ ແຕ່ວັນທີ 09 ມີນາ – 20 ເມສາ 2020 ມີ ທັງໝົດ 313 ຄົນ, ໝົດກໍານົດຕິດຕາມ ທັງໝົດ 300 ຄົນ, ຍັງສືບຕໍ່ຕິດຕາມທັງໝົດ 13 ຄົນ ເຊິ່ງຕິດຕາມຢູ່ ນະຄອນຫຼວງວຽງຈັນ (ໃນນັ້ນ 08 ຄົນ ແມ່ນຕິດຕາມຢູ່ໂຮງໝໍ 103 ແລະ 05 ຄົນ ຕິດຕາມຢູ່ເຮືອນ), ໂດຍສະເລ່ຍ ຍັງອີກ 04 ມື້ ຈຶ່ງຄົບກຳນົດຕິດຕາມ 14 ວັນ, ຖືວ່າຜູ້ສໍາພັດໃກ້ຊີດກັບຄົນເຈັບທັງໝົດແມ່ນຢູ່ນະຄອນຫຼວງວຽງຈັນ.