ເມືອງປາກທາ ສືບຕໍ່ປະຕິບັດຕາມຄຳສັ່ງ 06/ນຍ ພ້ອມທັງຊຸກຍູ້ປະຊາຊົນຕ້ອງຜະລິດກຸ້ມຕົນເອງ

ເມືອງປາກທາ ສືບຕໍ່ປະຕິບັດຕາມຄຳສັ່ງ 06/ນຍ ພ້ອມທັງຊຸກຍູ້ປະຊາຊົນຕ້ອງຜະລິດກຸ້ມຕົນເອງ

21st April 2020 0 By Admin

ການຈັດຕັ້ງປະຕິບັດວຽກງານຂອງຄະນະສະເພາະກິດດພື່ອປ້ອງກັນ, ຄວບຄຸມການລະບາດຂອງພະຍາດໂຄວິດ 19 ຢູ່ເມືອງປາກທາ ແຂວງບໍ່ແກ້ວ ຍັງເຂັ້ມງວດ ແລະ ຈະສືບຕໍ່ເພີ່ມມາດຕະການປ້ອງກັນ, ຂະນະທີ່ລັດຖະບານຕໍ່ເວລາການຈັດຕັ້ງປະຕິບັດຄຳສັງເລກທີ 06/ນຍ ຮອດວັນທີ 3 ພຶດສະພາ. ສະນັ້ນ, ເພື່ອຮັບປະກັນຄວາມປອດໄພຂອງພໍ່ແມ່ປະຊາຊົນໃນທົ່ວເມືອງໃຫ້ຫ່າງໄກຈາກພະຍາດຮ້າຍ ພ້ອມທັງເປັນເຈົ້າການ ແນະນຳປະຊາຊົນເພີ່ມພູນຜະລິດຜົນປູກພືດ ແລະ ລ້ຽງສັດໃຫ້ກຸ້ມຕົນເອງພາຍໃນຄອບຄົວ.


ທ່ານ ນ.ຈັນສຸກ ວັນນະວົງ ຫົວໜ້າຄະນະສະເພາະກິດຄວບຄຸມ, ປ້ອງກັນການລະບາດຂອງພະຍາດໂຄວິດ 19 ເມືອງປາກທາໄດ້ກ່າວວ່າ: ການຈັດຕັ້ງປະຕິບັດວຽກງານຂອງຄະນະສະເພາະກິດນັບແຕ່ວັນທີ 1 – 16 ເມສາ 2020 ໄດ້ເອົາໃຈໃສ່ເຝົ້າລະວັງຕິດຕາມ, ກວດກາ ຄົນເຂົ້າ-ອອກເມືອງ, ແຕ່ງຕັ້ງທີມງານແພດໝໍປະຈຳຢູ່ຈຸດກວດກາ, ວັດແທກອຸນຫະພູມຄົນເຂົ້າອອກ, ໄດ້ຕິດຕາມບຸກຄົນທີ່ມາຈາກຕ່າງແຂວງ, ຕ່າງປະເທດເຂົ້າສູນກັກຕົວຊົ່ວຄາວ 60 ຄົນ, ຍິງ 35 ຄົນ, ຕິດຕາມອາການຄົບ 14 ວັນ ແລະມອບໃບຢັ້ງຢືນ 56 ຄົນ, ຍັງອີກ 4 ຄົນ ແມ່ນຈະສືບຕໍ່ຕິດຕາມອາການໃຫ້ຄົບກຳນົດ.

ນອກຈາກນັ້ນ, ຄະນະສະເພາະກິດພວກເຮົາໄດ້ອອກແຈ້ງການໃຫ້ປິດບ້ານ, ປິດເມືອງ ຄົນໃນບໍ່ໃຫ້ອອກຄົນນອກບໍ່ໃຫ້ເຂົ້າ ເຊິ່ງເລີ່ມຈັດຕັ້ງປະຕິບັດມາແຕ່ວັນທີ 10 ເມສາ ພ້ອມທັງລົງຊຸກຍູ້ຢູ່ຂັ້ນຮາກຖານບ້ານ, ລົງໂຄສະນາເຄື່ອນທີ່ໂດຍນຳໃຊ້ເຄື່ອງຂະຫຍາຍສຽງຕິດລົດເຊິ່ງໄດ້ເຄື່ອນໄຫວປົກກະຕິຢູ່ 21 ບ້ານ.


ຄຽງຄູ່ກັບການຈັດຕັ້ງປະຕິບັດມາດຕະການດັ່ງກ່າວຂັ້ນເມືອງປາກທາຍັງໄດ້ຫ້າມນຳເຂົ້າສິນຄ້າປະເພດພືດຜັກຈາກປະເທດອື່ນ, ຫັນມາສົ່ງເສີມໃຫ້ພໍ່ແມ່ປະຊາຊົນພາຍໃນເມືອງໃຫ້ເພີ່ມພູນຜະລິດຜົນ, ລ້ຽງສັດ, ປູກພືດຜັກໃຫ້ກຸ້ມຕົນເອງພາຍໃນຄອບຄົວ ນອກຈາກນັ້ນກໍ່ຂາຍອອກເປັນສິນຄ້າ ເພື່ອຮັບປະກັນສະບຽງອາດຫານຢູ່ພາຍໃນເມືອງຢ່າງພໍພຽງ ແລະ ທົ່ວເຖິງ.

ຫ້ອງການ ຖະແຫຼງຂ່າວ ເມືອງປາກທາ ຖວທ