ຂ່າວດີ 5 ມື້ລຽນ ລາວ ບໍ່ພົບຜູ້ຕິດເຊື້ອໄວຣັດໂຄວິດ-19 ເພີ່ມ, ຂະນະຜູ້ຕິດເຊື້ອແມ່ນຢູ່ຂັ້ນເບົາບາງ

ຂ່າວດີ 5 ມື້ລຽນ ລາວ ບໍ່ພົບຜູ້ຕິດເຊື້ອໄວຣັດໂຄວິດ-19 ເພີ່ມ, ຂະນະຜູ້ຕິດເຊື້ອແມ່ນຢູ່ຂັ້ນເບົາບາງ

17th April 2020 0 By Admin

ນັບວ່າເປັນຂ່າວດີ 5 ມື້ຕິດຕໍ່ກັນແລ້ວ ທີ່ກະຊວງສາທາລະນະສຸກຢືນຢັນວ່າ ສປປ ບໍ່ພົບກໍລະນີຜູ້ຕິດເຊື້ອໄວຣັດໂຄວິດ-19 ເພີ່ມຂຶ້ນ, ໃນຄະນະທີ່ມີຜູ້ຕິດເຊື້ອປິ່ນປົວຫາຍດີແລ້ວ 2 ຄົນ, ຕົວເລກຜູ້ຕິດເຊື້ອຍັງເຫລືອ 17 ກໍລະນີ, ຈາກ 19 ກໍລະນີ, ປັດຈຸບັນ ອາການຜູ້ຕິດເຊື້ອແມ່ນຄົງຕົວ ຂັ້ນເບົາບາງ ຍັງຕິດຕາມການກວດຫາເຊື້ອເພື່ອຢັ້ງຢືນ.

ທ່ານ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ໄດ້ລາຍງານໃຫ້ຮູ້ໃນພິທີຖະແຫລງຂ່າວ ໃນວັນທີ 17 ເມສາ 2020 ນີ້ວ່າ: ໃນວັນທີ 16 ເມສາ 2020, ໄດ້ເກັບຕົວຢ່າງມາກວດທັງໝົດ 10 ຄົນ, ໃນນີ້ຢູ່ນະຄອນຫລວງວຽງຈັນ 8 ຄົນ ແລະ ສະຫວັນນະເຂດ 2 ຄົນ ເຊິ່ງແມ່ນແຮງງານລາວ ທີ່ກັບມາແຕ່ໄທ, ຜົນກວດທັງໝົດ 10 ກໍລະນີ ບໍ່ພົບເຊື້ອ.

ນັບແຕ່ເດືອນມັງກອນ ຮອດ ວັນທີ 16 ເມສາ 2020 ໄດ້ເກັບຕົວຢ່າງມາກວດ ທັງໝົດ ມີ 1.291 ຄົນ, ກວດພົບເຊື້ອທັງໝົດ 19 ຄົນ (ປິ່ນປົວດີ ອອກໂຮງໝໍແລ້ວ 2 ຄົນ).


ປັດຈຸບັນ ຍັງມີຜູ້ຕິດເຊື້ອນອນປິ່ນປົວຢູ່ໂຮງໝໍທັງໝົດ 17 ຄົນ. ໃນນັ້ນ, 3 ຄົນຢູ່ໂຮງໝໍ ແຂວງ ຫລວງພະບາງ (ອາການຄົງຕົວ ຂັ້ນເບົາບາງ ຍັງຕິດຕາມການກວດຫາເຊື້ອເພື່ອຢັ້ງຢືນ), 14 ຄົນ ຢູ່ໂຮງໝໍມິດຕະພາບ ນະຄອນຫລວງວຽງຈັນ ທັງໝົດເຫັນວ່າ ມີອາການເບົາບາງ ແລະ ຍັງຕິດ ຕາມການກວດຫາເຊື້ອເພື່ອຢັ້ງຢືນ.

ທີ່ມາ: ຂ່າວສານປະທດ