ສາມຫຼ່ຽມຄໍາ ມອບອຸປະກອນການແພດ ໃຫ້ກະຊວງປ້ອງກັນປະເທດ ຕ້ານພະຍາດ ໂຄວິດ -19

ສາມຫຼ່ຽມຄໍາ ມອບອຸປະກອນການແພດ ໃຫ້ກະຊວງປ້ອງກັນປະເທດ ຕ້ານພະຍາດ ໂຄວິດ -19

17th April 2020 0 By Admin

ເພື່ອເປັນສ່ວນໜຶ່ງໃນການຕ້ານ ແລະ ສະກັດກັ້ນ ການແຜ່ລະບາດຂອງພະຍາດ ໂຄວິດ -19, ເຂດເສດຖະກິດພິເສດ ສາມຫຼ່ຽມຄໍາ (ບໍລິສັດ ດອກງິ້ວຄໍາ) ໄດ້ນໍາເອົາອຸປະກອນການແພດທີ່ຈໍາເປັນຄື: ແຜອັດປາກ ຈໍານວນ 30.000 ອັນ, ລວມມູນຄ່າເປັນເງິນ 90 ລ້ານກີບ ມາມອບໃຫ້ກະຊວງປ້ອງກັນປະເທດ, ໃນວັນທີ 16 ເມສາ 2020, ຢູ່ສະໂມສອນຫ້ອງວ່າການກະຊວງປ້ອງກັນປະເທດ, ຕາງໜ້າ ເຂດເສດຖະກິດພິເສດ ສາມຫຼ່ຽມຄໍາ ກ່າວມອບໂດຍທ່ານ ສຸຫານ ຜູ້ຈັດການບໍລິສັດ ດອກງິ້ວຄໍາ ແລະ ຕາງໜ້າກະຊວງປ້ອງກັນປະເທດ ກ່າວຮັບໂດຍ ສະຫາຍ ພົນຈັດຕະວາ ທອງພັນ ສຸທໍາມະວົງ ຮອງຫົວໜ້າ ກົມໃຫຍ່ເຕັກນິກ ກອງທັບ, ມີພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພະຍານ.


ທ່ານ ສຸຫານ ໄດ້ກ່າວວ່າ: ນັບແຕ່ພະຍາດໂຄວິດ-19 ແຜ່ລະບາດຢູ່ ສປປ ລາວ ຂອງພວກເຮົາ ຄະນະເຂດເສດຖະກິດພິເສດ ສາມຫຼ່ຽມຄໍາ ກໍມີຄວາມເປັນຫ່ວງເປັນໃຍປະຊາຊົນລາວທຸກທົ່ວໜ້າກໍ່ຄືນາຍ ແລະ ພົນທະຫານກອງທັບປະຊາຊົນລາວ, ສະນັ້ນ ບໍລິສັດ ດອກງິ້ວຄໍາ ພວກເຮົາຈຶ່ງໄດ້ຫາວິທີທາງຊ່ວຍເຫຼືອ ແລະ ຮີບໂຮມໄດ້ອຸປະກອນການແພດທີຈໍາເປັນຈໍານວນໜຶ່ງມາມອບໃຫ້ກອງທັບປະຊາຊົນລາວ ແລະ ຫວັງວ່າ ເຄື່ອງທີ່ພວກເຮົາຊ່ວຍເຫຼືອຄັ້ງນີ້ ຈະເປັນການປະກອບສ່ວນຊ່ວຍຕ້ານການແຜ່ລະບາດພະຍາດໂຄວິດ -19 ໃນສປປລາວໄດ້ບໍ່ຫຼາຍກໍໜ້ອຍ ແລະ ຂໍໃຫ້ ປະເທດລາວເຮົາຜ່ານພົ້ນວິກິດນີ້ໄປດ້ວຍດີ.


ໂອກາດນີ້ ສະຫາຍ ພົນຈັດຕະວາ ທອງພັນ ສຸທໍາມະວົງ ຕາງໜ້າໃຫ້ກະຊວງປ້ອງກັນປະເທດ ໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນ ມາຍັງ ບໍລິສັດ ດອກງິ້ວຄໍາ ທີ່ໄດ້ມອບອຸປະກອນການແພດທີ່ຈຳເປັນມາມອບໃຫ້ ເພື່ອປ້ອງກັນ ແລະ ຕ້ານພະຍາດໂຄວິດ-19, ພ້ອມທັງໃຫ້ສັນຍາວ່າ ຈະນໍາເອົາອຸປະກອນດັ່ງກ່າວນີ້ ໄປນໍາໃຊ້ໃຫ້ຖືກຕ້ອງຕາມເປົ້າໝາຍ, ມີປະສິດທິຜົນສູງສຸດ.

ແສງເດືອນ