ວິ​ທີເຮັດ “ເສັ້ນເຂົ້າປຽກ” ງ່າຍໆໃຜ​ກໍ​ເຮັດ​ໄດ້​

ວິ​ທີເຮັດ “ເສັ້ນເຂົ້າປຽກ” ງ່າຍໆໃຜ​ກໍ​ເຮັດ​ໄດ້​

15th April 2020 0 By Admin

ຄືທີ່ເຮົາຮູ້ກັນວ່າຊ່ວງນີ້ ຫຼາຍໆຄົນບໍ່ຢາກອອກໄປນອກເຮືອນ ເພື່ອຫຼຸດຄວາມສ່ຽງໃນການຮັບເຊື້ອພະຍາດໂຄວິດ-19 ທັງນີ້, ກໍ່ເພື່ອປະຕິບັດຕາມມາດຕະການຂອງລັດຖະບານ ປ້ອງກັນການລະແຜ່ລະບາດຂອງພະຍາດໂຄວິດ-19

.

ແລະ ຊ່ວງນີ້ ຫຼາຍໆຄົນກໍ່ມີເວລາວ່າງຫຼາຍຂຶ້ນ ຈຶ່ງມີບາງຄົນທີ່ຫາສູດອາຫານມາເຮັດກິນເອງຢູ່ເຮືອນ, ມຶ້ນີ້ອິນໄຊລາວເລີຍນຳເອົາສູດເຮັດເສັ້ນເຂົ້າປຽກມາຝາກ ໂດຍມີສ່ວນປະກອບ ແລະ ວິທີເຮັດດັ່ງນີ້:

ສ່ວນປະກອບ:

ແປ້ງເຂົ້າຈ້າວ 1ຖົງ (400ກຮາມ)
ແປ້ງມັນສຳປະລັງ ຫລື(ແປ້ງສິງກະໂປ)ເຄີ່ງຖົງ(200ກຮາມ)
ນ້ຳຮ້ອນ (ຝົດໆ) 2 ຈອກ ຕາມພາບ ຫຼື ( 600 ml )

.
ວິທີເຮັດ:

ເອົາທັງ 2 ແປ້ງໃສ່ຊາມ ຄົນໃຫ້ເຂົ້າກັນ ແລ້ວເອົານ້ຳທີ່ຕົ້ມຝົດໆ ຖອກໃສ່ ເອົາບ່ວງຄົນໆ ໃຫ້ແປ້ງເຂົ້າກັນດີ
ຫລັງຈາກນັ້ນເອົາມືນວດແປ້ງຕອນຍັງຮ້ອນກາງໆ

(ຢ່າໃຫ້ແປ້ງເຢັນ)ໃຫ້ເຂົ້າກັນຈົນນຽນ

ແລ້ວຈະປັ້ນເປັນກ້ອນ( ຕາມພາບ) ເພື່ອເວລາຮີດແປ້ງມັນຈື່ງງ່າຍ ຫລື ຈະເຮັດກ້ອນໃຫ່ຍກ້ອນດຽວເລີຍກະໄດ້ຕາມຖະນັດ ແລ້ວເອົາໃສ່ກ່ອງເອົາຝາປິດ.

.
ຫລັງຈາກນັ້ນ, ເອົາອອກມາຮີດແບອອກ (ໂຮຍດ້ວຍແປ້ງສິງກະໂປເພື່ອບໍ່ໃຫ້ຕິດ ພື້ນ ແລະຮີດງ່າຍ ແຕ່ຢ່າໂຮຍຫລາຍເພາະມັນຈະເຮັດໃຫ້ເສັ້ນເຂົ້າປຽກແຂງໄດ້) ຈະຮີດ ບາງ ຫຼື ໜາຕາມຕົນເອງມັກກິນ ແລ້ວຊອຍເສັ້ນໃຫ່ຍ ຫຼື ນ້ອຍຕາມໃຈມັກ

(ເວລາຊອຍໃຫ້ເອົາແປ້ງ ສິງກະໂປໂຮຍໃສ່ເສັ້ນເຂົ້າປຽກນຳເພື່ອບໍ່ໃຫ້ເສັ້ນຕິດກັນ)

* ຂໍ້ຄວນລະວັງ ເວລາໃສ່ນ້ຳຮ້ອນຝົດໆໃນແປ້ງຕ້ອງຫາໄມ້ ຫຼື ບ່ວງ ຄົນໃຫ້ແປ້ງເຂົ້າກັນກ່ອນ ໃຫ້ພໍດີຍັງຮ້ອນກາງໆຈື່ງເອົາມືນວດໄດ້ (ຖ້າເອົາມືນວດຕອນໃສ່ນ້ຳຮ້ອນໃນແປ້ງໃຫມ່ໆມັນຈະລວກມືເດີ) ທາງທີ່ດີຄວນຫາຖົງມືໃສ່ກັນຮ້ອນ