ບໍລິສັດ ໄຟຟ້າຫົງສາ ຈຳກັດ ມອບອຸປະກອນການແພດ ໃຫ້ໂຮງໝໍຊຸມຊົນເມືອງຫົງສາ

ບໍລິສັດ ໄຟຟ້າຫົງສາ ຈຳກັດ ມອບອຸປະກອນການແພດ ໃຫ້ໂຮງໝໍຊຸມຊົນເມືອງຫົງສາ

14th April 2020 0 By Admin

ຕອນບ່າຍຂອງວັນທີ 14 ເມສາ 2020 ນີ້, ບໍລິສັດ ໄຟຟ້າຫົງສາ ຈຳກັດ ໄດ້ນຳເອົາເຄື່ອງອຸປະກອນການແພດ ມອບໃຫ້ໂຮງໝໍຊຸມຊົນເມືອງຫົງສາ ມູນຄ່າ 1 ລ້ານບາດ (ສະກຸນເງິນໄທ). ເຄື່ອງຊ່ວຍເຫລືອຄັ້ງນີ້, ປະກອບມີເຄື່ອງຊ່ວຍຫາຍໃຈ ຍີ່ຫໍ້ Ventilators ຈໍານວນ 1 ເຄື່ອງ, ອຸປະກອນປ້ອງກັນສ່ວນບຸກຄົນ (Personal Protective Equipment – PPE) ແລະ ຜ້າປິດປາກ-ດັງ,

.

ເຊິ່ງອຸປະກອນການແພດດັ່ງກ່າວຈະນໍາໃຊ້ເຂົ້າໃນການສະກັດກັ້ນ ແລະ ຕ້ານພະຍາດໂຄວິດ-19 ທີ່ກໍາລັງແຜ່ລະບາດຢູ່ໃນທົ່ວໂລກ ເວົ້າລວມ ເວົ້າສະເພາະ ເພື່ອຮັບໃຊ້ຄົນເຈັບຢູ່ 4 ເມືອງເໝືອຂອງແຂວງໄຊຍະບູລີ ເຊັ່ນ: ເມືອງຄອບ, ເມືອງຊຽງຮ່ອນ, ເມືອງເງິນ ແລະ ເມືອງຫົງສາ.

ຕາງໜ້າມອບເຄື່ອງໃນຄັ້ງນີ້, ໂດຍທ່ານ ຈິລະສັກ ທິບບໍາລຸງ ຮອງຜູ້ອໍານວຍການໃຫຍ່ ບໍລິສັດ ໄຟຟ້າ ຫົງສາ ຈໍາກັດ ຝ່າຍບໍ່ແຮ່ ຂອງບໍລິສັດ ໄຟຟ້າ ຫົງສາ ຈໍາກັດ ແລະ ກ່າວຮັບໂດຍ ທ່ານ ຄໍາຫຼ້າ ຜິວວັນນາ ເຈົ້າເມືອງຫົງສາ, ໃຫ້ກຽດເຂົ້າຮ່ວມຂອງທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

.
ທ່ານ ຄໍາຫຼ້າ ຜິວວັນນາ ເຈົ້າເມືອງຫົງສາ ກໍ່ໄດ້ສະແດງຄວາມຂອບໃຈ ແລະ ຮູ້ບຸນຄຸນມາຍັງບໍລິສັດ ໄຟຟ້າຫົງສາ ຈຳກັດ ທີ່ໄດ້ມອບອຸປະກອນການແພດທີ່ຈຳເປັນໃນຄັ້ງນີ້, ເພື່ອມາຊ່ວຍເຫລື່ອໃນການປ້ອງກັນ ແລະ ຕ້ານພະຍາດໂຄວິດ-19. ການຊ່ວຍເຫລືອຄັ້ງນີ້, ນອກຈາກຈະເປັນການຊ່ວຍຕ້ານພະຍາດທີ່ຮ້າຍແຮງດັ່ງກ່າວແລ້ວ ມັນຍັງເປັນການເສີມຂະຫຍາຍ ສາຍພົວພັນມິດຕະພາບ ລະຫວ່າງ ບໍລິສັດ ກັບ ເມືອງໃຫ້ນັບມື້ຂະຫຍາຍຕົວຍິ່ງໆ ຂຶ້ນ. ທ່ານຍັງກ່າວອີກວ່າ: ຈະນໍາເອົາອຸປະກອນດັ່ງກ່າວນີ້, ນໍາໃຊ້ໃຫ້ຖືກເປົ້າໝາຍ, ມີປະສິດທິຜົນສູງສຸດ.


ໃນໂອກາດດຽວກັນ, ທາງເມືອງ ກໍໄດ້ມອບໃບຍ້ອງຍໍໃຫ້ກັບ ບໍລິສັດ ໄຟຟ້າຫົງສາ ຈຳກັດ.

ຂ່າວ-ພາບ: ກິດຕິສັກ ບົວໄລ.