ດີ​ໃຈ​ນຳ ຜູ້​ປິ່ນ​ປົວ​ເຊົາ​ຈາກ​ໂຄວິດ​ຄົນ​ທຳ​ອິດ ໄດ້​ອອກ​ຈາກ​ໂຮງ​ໝໍ​ແລ້ວ

ດີ​ໃຈ​ນຳ ຜູ້​ປິ່ນ​ປົວ​ເຊົາ​ຈາກ​ໂຄວິດ​ຄົນ​ທຳ​ອິດ ໄດ້​ອອກ​ຈາກ​ໂຮງ​ໝໍ​ແລ້ວ

14th April 2020 0 By Admin

ເພຈສູນຂ່າວສານການແພດສຸຂະສຶກສາລາຍງານໃນວັນທີ14 ເມສາ 2020ວ່າ:  ຜູ້ຕິດພະຍາດໂຄວິດ-19 ກໍລະນີທີ 12  ອາຍຸ 20 ປີ ບ້ານນາໄຊ ເມືອງໄຊເສດຖາ ນະຄອນຫຼວງວຽງຈັນເຂົ້າໂຮງໝໍວັນທີ 6 ເມສາ 2020 ໄດ້ຮັບການປິ່ນປົວຫາຍດີ ແລະ ອອກໂຮງໝໍ ວັນທີ 14ເມສາ 2020 ເຊິ່ງເປັນຜູ້ທຳອິດທີ່ແພດໝໍຂອງສປປລາວປິ່ນປົວດີ ຈາກຄົນເຈັບທັງໝົດ19 ຄົນ.

ປະຫວັດການເດີນທາງກໍລະນີທີ 12 :ວັນທີ 22/3/2020 ເດີນທາງຈາກປະເທດອັງກິດ; ວັນທີ 23/3/2020 ເດີນທາງຮອດສະໜາມບິນວັດໄຕໂດຍຜ່ານ ສະໜາມບິນສຸວັນນະພູມ ດ້ວຍຖ້ຽວບິນ TG 574, ວັນທີ 24/3/2020 ເລີ່ມຈໍາກັດບໍລິເວນຕົນເອງຢູ່ເຮືອນສວນຂອງຜູ້ກ່ຽວ; ວັນທີ 5/4/2020 ເປັນມື້ທີ 13 ຜູ້ກ່ຽວເລີ່ມມີອາການເຈັບຄໍ, ເຈັບຫົວ, ຫາຍໃຈຍາກ ຈຶ່ງໄດ້ມາກວດຢູ່ໂຮງໝໍມິດຕະພາບ ແລະ ໄດ້ເກັບຕົວຢ່າງມາກວດ ແລະ ພົບວ່າຕິດເຊື້ອໂຄວິດ 19

ທ່ານ ດຣ ສະໜອງ ທອງຊະນະ ຜູ້ອຳນວຍການໂຮງໝໍມິດຕະພາບ ກ່າວໃນພິທີຖະແຫລງຂ່າວປະຈຳວັນທີ 14 ເມສາ 2020 ທີ່ກະຊວງສາທາລະນະສຸກວ່າ: ຈຳນວນ 16 ຄົນຢູ່ໂຮງໝໍມິດຕະພາບ ເຫັນວ່າ 1 ຄົນມີອາການປານກາງ, 15 ຄົນ ມີອາການເບົາບາງ.

ໃນນີ້ 1 ຄົນໄດ້ກວດວິເຄາະບໍ່ພົບເຊື້ອ 2 ຄັ້ງແລ້ວ ຊື່ງມື້ນີ້ໄດ້ພິຈາລະນາໃຫ້ອອກໂຮງໝໍ ໄປຕິດຕາມຕົນເອງ 14 ວັນ ,  ຈາກນັ້ນຈະນັດມາກວດອີກຄັ້ງໃນມື້ທີ14 ຫາກບໍ່ພົບເຊື້ອແລ້ວຈິ່ງຈະອະນຸຍາດໃຫ້ໃຊ້ຊີວິດປົກກະຕິໃນສັງຄົມ. ນອກນັ້ນຜູ້ປິ່ນປົວລາຍອື່ນໆອາຫານກໍດີຂຶ້ນເປັນລຳດັບ ແລະ ຄາດວ່າຈະມີຂ່າວດີມາລາຍງານໃນແຕ່ລະມື້ຕື່ມອີກ.

ທ່ານ ຮສ. ດຣ. ພູທອນ ເມືອງປາກ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດກ່າວໃນພິທີຖະແຫຼງຂ່າວວ່າ:ໃນວັນທີ 13 ເມສາ 2020, ໄດ້ ເກັບຕົວຢ່າງມາກວດທັງໝົດ 50 ຄົນ; ໃນນີ້ມີຜູ້ສຳຜັດໃກ້ຊິດ ກັບຜູ້ຕິດເຊື້ອ 6 ຄົນ, ກໍລະນີມີອາການສົງໄສ 44 ຄົນ, (ໃນນີ້ແຮງງານລາວ ທີ່ກັບມາແຕ່ໄທ 17 ຄົນ).  ຜົນກວດທັງໝົດ 50 ກໍລະນີ ແມ່ນບໍ່ພົບເຊື້ອ.

ຈໍານວນຜູ້ສໍາຜັດໃກ້ຊິດທັງໝົດ ທີ່ໄດ້ຕິດຕາມ ແຕ່ວັນທີ 23 ມີນາ ຫາ13 ເມສາ 2020 ມີ ທັງໝົດ 458 ຄົນ, ໝົດກໍານົດຕິດຕາມ ທັງໝົດ 387 ຄົນ, ຍັງສືບຕໍ່ຕິດຕາມທັງໝົດ 71 ຄົນ.

ເລີ່ມແຕ່ວັນທີ 20 ມີນາ 2020 ມີແຮງງານລາວຈໍານວນຫຼວງຫຼາຍຈາກປະເທດໄທໄດ້ກັບເຂົ້າມາລາວຕາມຈຸດຜ່ານແດນຕ່າງໆ ມີທັງໝົດ 113.404 ຄົນ, ເພື່ອຮອງຮັບສະຖານນະການດັ່ງກ່າວ ອໍານາດການປົກຄອງ ໄດ້ມີການຈັດຕຽມສະຖານທີຈໍາກັດບໍລິເວນໃນແຕ່ລະເມືອງ, ກຸ່ມບ້ານທົ່ວປະເທດມີ 2.142 ສູນ ເຊິ່ງຮອງຮັບແຮງງານທັງໝົດ 68.534 ຄົນ ແລະ ໄດ້ຈໍາກັດບໍລິເວນຕົນເອງຢູ່ເຮືອນ 44.870 ຄົນ ໂດຍມີຄອບຄົວເປັນຜູ້ຢັ້ງຢືນ.

ມາຮອດວັນທີ 14 ເມສາ 2020 ທົ່ວປະເທດ ຍັງມີ 1.735 ສູນ, ມີຜູ້ຈຳກັດບໍລິເວນຢູ່ສູນ 38.479 ຄົນ, ຈໍາກັດບໍລິເວນຢູ່ເຮືອນ 21.553 ຄົນ, ເກັບຕົວຢ່າງມາກວດວິເຄາະຫາເຊື້ອ ມີທັງໝົດ 113 ຄົນ ທັງໝົດບໍ່ພົບເຊື້ອ.