ດ່ວນທີ່ສຸດຈາກສຳນັກງານນາຍົກ! ຫ້າມເກັບເງິນຄ່າທໍານຽມ, ເອກະສານເຂົ້າ-ອອກບ້ານ ນໍາປະຊາຊົນ

ດ່ວນທີ່ສຸດຈາກສຳນັກງານນາຍົກ! ຫ້າມເກັບເງິນຄ່າທໍານຽມ, ເອກະສານເຂົ້າ-ອອກບ້ານ ນໍາປະຊາຊົນ

13th April 2020 0 By Admin

ໂດຍອີງຕາມຄໍາສັ່ງຂອງທ່ານ ນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍ ການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຕ້ອບດ້ານ ເພື່ອຕ້ານພະຍາດ ໂຄວິດ-19; ອີງຕາມການສະເຫນີ ຂອງກອງປະຊຸມຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ ໂຄວິດ-19 ໃນວັນທີ 11 ເມສາ 2020 ແລະ ອີງຕາມການຕົກລົງ ແລະ ຊີ້ນໍາ ຂອງທ່ານນາຍົກລັດຖະມົນຕີ ໃນວັນທີ 11 ເມສາ 2020.

ພາບປະກອບຂ່າວ

ຫ້ອງວ່າການສໍານັກງານນາຍົກລັດຖະມົນຕີ ອອກແຈ້ງການ ສະບັບເລກທີ 479/ສຫນຍ ລົງວັນທີ 13 ເມສາ 2020 ເຖິງທ່ານ ເຈົ້າຄອງນະຄອນຫຼວງວຽງຈັນ ແລະ ບັນດາທ່ານເຈົ້າແຂວງ ທົ່ວປະເທດ; ທ່ານ ລັດຖະມົນຕີກະຊວງປ້ອງກັນຄວາມສະຫງົບ. ເລື່ອງ: ຫ້າມເກັບເງິນຄ່າທໍານຽມຕ່າງໆ ໃນການອອກເອກະສານເຂົ້າ-ອອກ ເມືອງ ແລະ ບ້ານ ນໍາປະຊາຊົນ.

ພາບປະກອບຂ່າວ

ໂດຍແຈ້ງການລະບຸວ່າ: ຫ້ອງວ່າການສໍານັກງານນາຍົກລັດຖະມົນຕີ ຂໍຖືເປັນກຽດແຈ້ງການຕົກລົງ ແລະ ຊີ້ນໍາຂອງທ່ານ ນາຍົກ ລັດຖະມົນຕີ ມາຍັງທ່ານຊາບ ດັ່ງນີ້: ຫ້າມບໍ່ໃຫ້ອົງການປົກຄອງທ້ອງຖິ່ນທຸກຂັ້ນ ເກັບເງິນຄ່າທໍານຽມຕ່າງໆ ໃນການໃຫ້ບໍລິການອອກເອກະສານ ຫຼື ບັດເຂົ້າ-ອອກ ເມືອງ ແລະ ບ້ານ ນໍາປະຊາຊົນ ໃນຊ່ວງໄລຍະຈັດຕັ້ງປະຕິບັດ ຄໍາສັ່ງ ຂອງທ່ານນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ ໂຄວິດ-19 ຢ່າງເດັດຂາດ.


ສະນັ້ນ, ມອບໃຫ້ທ່ານເຈົ້າຄອງນະຄອນຫຼວງວຽງຈັນ ແລະ ບັນດາທ່ານເຈົ້າແຂວງ ທົ່ວປະເທດ ຊີ້ນໍາບັນດາ ທ່ານເຈົ້າເມືອງ ແລະ ນາຍບ້ານ ທີ່ຢູ່ໃນພາຍໃຕ້ການຊີ້ນໍາຂອງຕົນ ຈັດຕັ້ງປະຕິບັດຢ່າງເຂັ້ມງວດ, ຖ້າເມືອງໃດ ຫລື ບ້ານໃດ ໄດ້ຕົກລົງໃຫ້ມີການເກັບເງິນຄ່າອອກກະສານດັ່ງກ່າວ ແມ່ນໃຫ້ລົບລ້າງທັນທີ.

ພາບປະກອບຂ່າວ

ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ປະຕິບັດຕາມເນື້ອໃນແຈ້ງການສະບັບນີ້ດ້ວຍ