ພິທີໄປຕັກນ້ຳຂອງເທວະດາຫລວງ ປູ​ເຍີ​ຍ່າ​ເຍີ ເພື່ອກຽມໄວ້ໄປສົ່ງນ້ຳພຣະບາງ

ພິທີໄປຕັກນ້ຳຂອງເທວະດາຫລວງ ປູ​ເຍີ​ຍ່າ​ເຍີ ເພື່ອກຽມໄວ້ໄປສົ່ງນ້ຳພຣະບາງ

13th April 2020 0 By Admin

ພິທີເທວະດາຫລວງ (ປູເຍີ-ຍ່າເຍີ) ໄປຕັກນ້ຳ ເພື່ອເກັບໄວ້ໄປສົງນ້ຳພຣະບາງ ໃນວັນທີ 17/04/2019

ວັນທີ່ 14 ເມສາ 2019 ເວລາ 16:00 ໂມງ ເທວະດາຫລວງ ປູເຍີ-ຍ່າເຍີ ໄປຕັກນ້ຳອອກບໍ່ ທີ່ບໍ່ລິເວນຫ້ວຍປາກມາວ ປ່ອງໃສ່ນ້ຳຄານ ໃສ່ໄຫ ເພື່ອກະກຽມໄວ້ໄປສົງນ້ຳພຣະບາງ ທີ່ວັດໃຫມ່ ສຸວັນນະພູມມາຣາມ ນະຄອນຫລວງພຣະບາງ

ໃນສະໄຫມບູຮານນະການ ເທວະດາຫລວງຈະມີພິທີອອກໄປຕັກນ້ຳຈາກບໍ່ຕ່າງໆ ( ຖ້າເພິ່ນບໍ່ໄປຈະມີການທຽມໃຫ້ຄົນອື່ນ ຫລືພະຍາໃນເຂດນັ້ນໆ ຕັກມາໃຫ້ ) ຫລັກຂອງການເອົານ້ຳໃນເຂດຫລວງພຣະບາງ ເພື່ອກະກຽມໄວ້ສົງນ້ຳພຣະບາງ ແມ່ນ ມີ 4 ຈຸດ ຄື :

1 ນ້ຳບໍ່ທິບ ໃນຖ້ຳນາງອັ່ນ ( ເຂດບ້ານໂສມ-ບ້ານນາ ຝາກເມືອງຊຽງແມນ ).
2 ຖ້ຳນ້ຳທ່ຽງ ໃນຖ້ຳສັກກະຣິນ ວັດຖ້ຳ ເມືອງຊຽງແມ່ນ ( ຝາກຂອງກົງກັນຂ້າມກັບວັດຊຽງທອງ)
3 ນ້ຳບໍ່ແກ້ວ ເຊິ່ງເປັນນ້ຳຜຸດອອກມານ້ຳຄານ ເຂດເມືອງຊຽງເງິນ .
4 ນ້ຳອອກບໍ່ ທີເຂດຜາບັ້ງ ນ້ຳຄານ ເຂດຂົວເກົ່າຫລວງພຣະບາງ.

ມື້ວັນທີ່ 15 ເມສາ 2019 ເທວະດາຫລວງ ປູເຍີ-ຍ່າເຍີ ສິງແກ້ວສິງຄຳ ຈະເລິ່ມຕົ້ນເຂົ້າຂະບວນແຫ່ຫວໍ່ ເພື່ອໄປຄາຣະວະ່ ເຂດຫົວເມືອງ ຄື ວັດຊຽງທອງ ໂດຍແຫ່ຂະບວນອອກຈາກວັດທາຕຸນ້ອຍ ຍ່າງໄປທາງເຫນືອ ຈົນຮອດຫນ້າພຣະຣາຊວັງ (ຫໍພິພິຕະພັນຫລວງພຣະບາງ ) ເມື່ອຍ່າງມາຮອດຈຸດນີແລ້ວ ຈະຍ່າງຂຶ້ນໄປຄາຣະວະບ່ອນທີ່ເປັນອະດິດຂອງວັດສາວຫລຽວ (ທາຕຸດຳໆ ກ່ອນຂຶ້ນພູສີ ) ບ່ອນຄະນະການນຳນັ່ງຊົມນັ້ນ ໂດຍຂຶ້ນໄປແລ້ວຈະກ່າວຄຳວ່າ : ນ້ອງຢາກເຫັນຫນ້າອ້າຍໃຫ້ໄປເບິ່ງຊຽງທອງ ສັງຂານເນົາ ພີ່ຈະໄປນຳນ້ຳ…

ຈາກນັ້ນກໍ່ຈະຍ່າງລົງບໍລິເວນນັ້ນແລ້ວຍ່າງໄປທາງເຫນືອ ຈົນຮອດເຂດຊຽງທອງ ກ່ອນຈະເຂົ້າວັດຊຽງທອງ ແມ່ນຈະໄປຄາຣະວະຫໍນ້ອຍໆໃນເຂດວັດສຸວັນນະຄີລີ ( ເຊິ່ງມີຄວາມເຊື່ອວ່າເປັນຫໍ່ຜີເສື້ອເມືອງໃນເຂດຫົວເມືອງຫລວງພຣະບາງໃນເມື່ອກ່ອນ ) ເຊິ່ງຈະຢຸດແລະຄາຣະວະຢູ່ເຂດກຳແພງວັດສຸວັນນະຄີລີ ກົງກັນຂ້າມກັບທາງເຂົ້າປະຕູໂຂງເຂົ້າວັດຊຽງທອງ ຈາກນັ້ນກໍ່ຈະເຂົ້າໄປເອົາວັນດອກໄມ້ ໄປຄາຣະວະໃນວັດຊຽງທອງແລະຟ້ອນລຳຖວາຍເຊິ່ງປຽບສະເໝືອນຫລັກຫົວເມືອງ ເພື່ອໃຫ້ບ້ານເມືອງສະຫງົບ ສຸຂຊຸ່ມກຸ່ມເຢັນ ດິນດຳນ້ຳຊຸ່ມ ໄພ່ຟ້າມີຄວາມຢູ່ດີກິນດີ ສະຫງົບຮົ່ມເຢັນ…

ມື້ວັນທີ່ 16 ເມສາ 2019 ແມ່ນ ເທວະດາຫລວງ ປູເຍີ-ຍ່າເຍີ ສິງແກ້ວສິງຄຳ ຈະເຂົ້າຂະບວນແຫ່ຫວໍອອກຈາກວັດຊຽງທອງ ໂດຍຂະບວນຍ່າງລົງກັບຄືນຫາງເມືອງ ໄປຄາຣະວະບູຊາດ້ວຍວັນດອກໄມ້ແລະກ່າວຄຳອວຍພອນເພື່ອໃຫ້ບ້ານເມືອງສະຫງົບ ສຸກຊຸ່ມກຸ່ມເຢັນ ດິນດຳນ້ຳຊຸ່ມ ທີ່ຈຸດບ່ອນສະຖານທີ່ ທີ່ເປັນບ່ອນທໍລະນີສົງຂອງວັດແກ້ວ ( ວັດແກ້ວ ໃນອະດິດແມ່ນຕັ້ງຢູ່ເຂດທາງເຫນືອປ້ຳນ້ຳມັນ ລານເດິ່ນບ່ອນນັ່ງ ທາດຫລວງ ວັດແກ້ວເປັນວັດຫາງເມືອງ ຂອງຫລວງພຣະບາງໃນອະດິດ ໂດຍມີພຣະມະຫາສະມິດ ເຖຣະເຈົ້າ ເພິ່ນເປັນພຣະນ້ອງຂອງພຣະມະຫາປາສະມັນ ທີ່ຖືກນິມົນມາຈາກຂະເໜນ ຈຳພັນສາຢູ່່ວັດແຫ່ງນີ້ ) ປູ່ເຍີ-ຍ່າເຍີ ສິງແກ້ວ-ສິງຄຳ ຫລັງຈາກໄປຟ້ອນຄາຣະວະສົມມາຈາກວັດຊຽງທອງແລ້ວ ກໍ່ຍ່າງມາຄາຣະວະໃນສະຖານທີ່ດິນແດນຂອງວັດແກ້ວແຫ່ງນີ້ ປະຈຸບັນແມ່ນວ່າບໍ່ມີວັດແລ້ວ ກໍ່ຍັງສຶບຮີດຄອງນີ້ຈົນຮອດປະຈຸບັນ ຈາກນັ້ນກໍ່ຈະແຫ່ໄປຄາຣະວະທີ່ວັດທາຕຸນ້ອຍ ແລະຟ້ອນບູຊາຢູ່ທາງຫນ້າທາຕຸ ຫລັງຈາກນັ້ນກໍ່ແຫ່ກັບໄປວັດອາຮາມຕໍ່ໄປ.

ມື້ວັນທີ່ 17/04/2019 ແມ່ນຈະມີພິທີອະຣາດທະນາພຣະບາງລົງແລະມີຂະບວນແຫ່ແຫນເປັນຂະບວນ ໂດຍມີພຣະເຖຣານຸເຖຣະ ການນຳ ເຖົ້າແກ່ແນວໂຮມ ຜູ້ຄົນທີໃສ່ຊຸດປະເພນີຖືກຂັນດອກໄມ້ ທູບ ທຽນ ນ້ຳອົບນ້ຳຫອມ ເພື່ອກຽມພ້ອມໄປວັນທາຂາບໄຫວ້ ແລະຫົດສົ່ງພຣະບາງເຈົ້າ ທີ່ວັດໃຫມ່ ສຸວັນນະພູມມາຣາມ ໃນພິທີນີ້ ຫລັງຈາກມີການປະດິດສະຖານພຣະບາງ ແລະມີການສູດຈາກພຣະສົງແລ້ວ ເທວະດາຫລວງ ຫລືວ່າ ປູເຍີ-ຍ່າເຍີ ຈະຂຶ້ນສົງນ້ຳພຣະບາງກ່ອນທຸກຄົນອົງ ທຸກໆຄົນ ຈາກນັ້ນກໍ່ແມ່ນ ພຣະສົງ ຂຶ້ນຫົດສົງ ໂຫຣາຈາຣຍ໌ ແລະຕໍ່ດ້ວຍນາງສັງຂານ ຜູ້ນຳ ແລະປະຊາຊົນທົ່ວໆໄປ ເປັນອັນດັບຕໍ່ໆໄປ

ນຳສະເໜີໂດຍ : ນະຄອນຫລວງພຣະບາງ Luangprabang City