ຄົບ​ວາ​ລະ​ແລ້ວ​ທີມ​ແພດ​ຈາກ ສ ປ ຈີນ ມາ​ຊ່ວຍ​ເຫຼືອ​ລາວ​ຕ້ານ​ໂຄວິດ ເດີນ​ທາງ​ກັບ​ປອດ​ໄພ​ ເຊຍໆ !

ຄົບ​ວາ​ລະ​ແລ້ວ​ທີມ​ແພດ​ຈາກ ສ ປ ຈີນ ມາ​ຊ່ວຍ​ເຫຼືອ​ລາວ​ຕ້ານ​ໂຄວິດ ເດີນ​ທາງ​ກັບ​ປອດ​ໄພ​ ເຊຍໆ !

12th April 2020 0 By Admin

2 ອາທິດແລ້ວ ຄົບ​ກຳນົດ​ທີ່ ທີມແພດຊ່ຽວຊານຈາກ ສປ ຈີນ ເດີນທາງມາຊ່ວຍເຫຼືອລາວຕ້ານໂຄວິດ-19 ຫຼັງໄດ້ມາຮ່ວມແລກປ່ຽນຖອດຖອນບົດຮຽນໃຫ້ກັບແພດໝໍລາວທັງໃນສູນກາງ ແລະທ້ອງຖິ່ນ ມື້ນີ້ ວັນທີ 12 ເມສາ 2020 ທີມ​ແພດ​ຈຳ​ນວນ 12 ທ່ານ ໄດ້ເດີນທາງກັບ ສປ ຈີນ ມີການນໍາຂອງລາວຮ່ວມສົ່ງທາງຢູ່ສະໜາມບິນສາກົນວັດໄຕຢ່າງສົມກຽດ.


ພາຍຫຼັງທີ່ ສປ ຈີນເລີ່ມຫຼຸດພົ້ນຈາກວິກິດໂຄວິດ-19 ບັນດາແພດໝໍຈີນແມ່ນບໍ່ໄດ້ພັກຜ່ອນນອນເຊົາເມື່ອຍແຕ່ຢ່າງໃດ ແຕ່ກົງກັນຂ້າມພວກເຂົາເດີນສາຍຊ່ວຍເຫຼືອຊາວໂລກໄປຫຼາຍປະເທດ ຄວບຄູ່ກັບການສົ່ງບຸກຄະລາກອນແພດໝໍໄປຊ່ວຍກູ້ຊີວິດແລ້ວທາງການຈີນຍັງຈັດເຄື່ອງມືອຸປະກອນການແພດພ້ອມເໝົາຍົນໄປລຳໄປສົ່ງເຖິງບ່ອນເຖິງທີ່ອີກດ້ວຍ ລວມເຖິງລາວເຮົາເອງ ເຊິ່ງທີມຊ່ຽວຊານແພດພ້ອມອຸປະກອນການແພດຊ່ວຍເຫຼືອໄດ້ເດີນທາງມາຮອດລາວຕັ້ງແຕ່ວັນທີ 29 ມີນາ 2020.


ນັບແຕ່ມາຮອດປະເທດເຮົາຄະນະແພດ ແລະຊ່ຽວຊານ ແມ່ນໄດ້ມາຮ່ວມເຮັດວຽກຢ່າງເອົາການເອົາງານມື້ລະຫຼາຍກວ່າ 10 ຊົ່ວໂມງ ເພື່ອແບ່ງປະສົບການກັບຝ່າຍລາວ ໃນການປ້ອງກັນ ແລະ ຄວບຄຸມພະຍາດດັ່ງກ່າວ, ກວດຄັດກອງຫາຜູ້ຕິດເຊື້ອ, ກວດວິເຄາະເຊື້ອພະຍາດຢູ່ຫ້ອງທົດລອງ ແລະປິ່ນປົວຄົນເຈັບ ພ້ອມທັງໄດ້ແລກປ່ຽນບົດຮຽນກັບກະຊວງສາທາລະນະສຸກ ແລະໂຮງໝໍສູນກາງຂອງ ສປປ ລາວ ລວມເຖິງທ້ອງຖິ່ນອີກ 2 ແຂວງຄື ຈຳປາສັກ ແລະຫຼວງພະບາງ.

ຕາມຂ່າວ cri ໃນໄລຍະທີ່ທີມແພດຈາກ ສປ ຈີນ ມາເຄື່ອນໄຫວວຽກຢູ່ລາວນັ້ນ ເລີ່ມຕົ້ນຈາກການປະຕິບັດວຽກງານໃນເບື້ອງຕົ້ນຢູ່ທີ່ນະຄອນຫຼວງວຽງຈັນ, ໃນວັນທີ 7 ເມສາ 2020 ຄະນະແພດຜູ້ຊ່ຽວຊານ ຈາກ ສປ ຈີນທັງ 12 ຄົນ ໄດ້ສືບຕໍ່ລົງເຄື່ອນໄຫວຢູ່ຕ່່າງແຂວງ ໂດຍໄດ້ແບ່ງເປັນ 2 ທີມເພື່ອລົງພື້ນທີ່ແຂວງຫຼວງພະບາງ ແລະ ແຂວງຈຳປາສັກ.

ໜ້າວຽກຫຼັກໃນໄລຍະທີ່ຜ່ານມາຂອງທີມແພດ ແລະຜູ້ຊ່ຽວຊານ ແມ່ນລົງພື້ນທີ່ເພື່ອຕິດຕາມ, ເກັບກຳຂໍ້ມູນ ແລະສຳຫຼວດຕາມຈຸດທີ່ມີຄວາມສ່ຽງຕໍ່ການແຜ່ລະບາດຂອງພະຍາດ ໂດຍສະເພາະກໍແມ່ນບັນດາໂຮງໝໍສູນກາງທີ່ຮັບຮອງຄົນເຈັບຜູ້ຕິດເຊື້ອພະຍາດ ແລະກໍລະນີສົງໄສ ເຊັ່ນ: ໂຮງໝໍ ມິດຕະພາບ, ໂຮງໝໍ 103, ໂຮງໝໍເສດຖາທີຣາດ. ນອກຈາກນັ້ນ, ກໍໄດ້ມີການປະຊຸມປຶກສາຫາລືກັບບັນດາເຈົ້າໜ້າທີ່ທີ່ກ່ຽວຂ້ອງ ເປັນຕົ້ນກໍແມ່ນ ກົມຄວບຄຸມພະຍາດຕິດຕໍ່, ສູນວິເຄາະ ແລະລະບາດວິທະຍາ, ກະຊວງສາທາລະນະສຸກ.

ແຕ່ດ້ວຍໄລຍະເວລາອັນສັ້ນ ສະນັ້ນການມາປະຕິບັດພາລະກິດໃນຄັ້ງນີ້ບໍ່ໄດ້ເນັ້ນໜັກການປິ່ນປົວຄົນເຈັບໂດຍກົງ ແຕ່ຄືການຖ່າຍທອດວິຊາການ ແລະປະສົບການແກ່ທີມແພດຝ່າຍລາວເພື່ອນຳໄປໝູນໃຊ້ໃນການປິ່ນປົວຄົນເຈັບ ເຊິ່ງຖືເປັນສິ່ງທີ່ມີຄວາມໝາຍຄວາມສຳຄັນ ແລະເປັນການຍົກລະດັບຄວາມຮູ້ຄວາມສາມາດໃຫ້ແກ່ບຸກຄະລາກອນທາງການແພດຂອງລາວ.


ເຖິງຢ່າງໃດກໍ່ຕາມ ມາຮອດມື້ນີ້ ຖືເປັນເວລາຄົບກໍານົດ 14ວັນພໍດີທີີ່ທີມແພດດັ່ງກ່າວ ໄດ້ເຂົ້າມາຊ່ວຍເຫຼືອຫຼາຍທຢ່າງແກ່ ສປປ ລາວ ແອັດມິນເອງໃນຖານະທີ່ເປັນຄົນລາວຜູ້ໜຶ່ງຂໍສະແດງຄວາມຂອບໃຈ ແລະ ຮູ້ບຸນຄຸນຢ່າງສູງຕໍ່ການຊ່ວຍເຫຼືອໃນຄັ້ງນີ້ ເຖິງແມ່ນວ່າຈະເປັນເວລາອັນສັ້ນແຕ່ມັນສະແດງເຖິງມິດຕະພາບ ໄມຕີຈິດອັນດີງາມຂອງ ສປປ ລາວ ແລະ ສປຈີນ ໂດຍສະເພາະໃນຍາມວິກິດແບບນີ້ ດັ່ງຄໍາຂວັນທີ່ວ່າ ຮ່ວມມືກັນຕ້ານພະຍາດ ຮ່ວມທຸກຮ່ວມຍາກ”.

ຂອບໃຈພາບຈາກ CRI, Johny