ຄືເປັນແນວນີ້ນໍ! 2 ກໍລະນີທີ່ຕິດເຊື້ອໂຄວິດ ມື້ນີ້ເປັນໝູ່ຢູ່ນຳກັນ ແລະ ມີຜູ້ໃກ້ຊິດລວມ 6 ຄົນ

ຄືເປັນແນວນີ້ນໍ! 2 ກໍລະນີທີ່ຕິດເຊື້ອໂຄວິດ ມື້ນີ້ເປັນໝູ່ຢູ່ນຳກັນ ແລະ ມີຜູ້ໃກ້ຊິດລວມ 6 ຄົນ

11th April 2020 0 By Admin

ກາຍເປັນຂ່າວຮ້າຍອີກມື້ ຫຼັງກະຊວງສາທາລະນະສຸກ ຢືນຢັນລາວມີຜູ້ຕິດເຊື້ອ ໂຄວິດ-19 ເພີ່ມ 2 ຄົນ ລວມທັງໝົດ 18 ຄົນ
ໂດຍ 2 ກໍລະນີຫຼ້າສຸດ ແມ່ນຜູ້ສຳຜັດໃກ້ຊິດກັບ ກໍລະນີທີ່ 16 ລາຍລະອຽດດັ່ງນີ້:

ກໍລະນີ ທີ່ 17: ເພດຍິງ ອາຍຸ 32 ປີ, ອາຊີບ: ຫວ່າງງານ, ໜ່ວຍ 01, ຢູ່ຫ້ອງແຖວ ຂື້ນກັບບ້ານໜອງດ້ວງທົ່ງ, ເມືອງສີໂຄດຕະບອງ, ນະຄອນຫຼວງວຽງຈັນ (ຢູ່ຫ້ອງແຖວ ເບີ 7). ໄດ້ສໍາຜັດໃກ້ຊິດກັບກໍລະນີທີ 16 (ເພດຍິງ ອາຍຸ 23 ປີ ຢູ່ຫ້ອງແຖວດຽວກັນ, ຫ້ອງແຖວເບີ 8).

ວັນທີ 4 ເມສາ 2020: ຜູ້ກ່ຽວໄດ້ກີນເຂົ້າຮ່ວມກັບ ກໍລະນີທີ 16 ຢູ່ຫ້ອງແຖວດຽວກັນ ຫ້ອງເບີ 8 (ກິນນຳກັນທັງໝົດ 4 ຄົນ: ຜູ້ກ່ຽວ, ເພດຊາຍ 2 ຄົນ ແລະ ກໍລະນີຢັ້ງຢືນທີ 16)

ວັນທີ 5-6 ເມສາ 2020: ເຂົາເຈົ້າຍັງໄດ້ມີການພົວພັນໄປມາຫາສູ່ກັນເປັນປົກກະຕິ.

ວັນທີ 7 ເມສາ 2020: ຜູ້ກ່ຽວເລີ່ມຮູ້ສຶກຄີງຮ້ອນ, ໄອແຫ້ງ ແລະ ປວດຕົນໂຕ, ໄດ້ໄປຊື້ຢາຢູ່ຮ້ານຂາຍຢາມາກິນເອງ ແລະ ຍັງໄດ້ກິນເຂົ້າກັບເພື່ອນຢູ່ຫ້ອງແຖວດຽວກັນຈໍານວນ 04 ຄົນ.

ວັນທີ 08-09 ເມສາ 2020 : ຍັງມີອາການບໍ່ດີຂື້ນ ແຕ່ຜູ້ກ່ຽວໄດ້ພັກຜ່ອນຢູ່ຫ້ອງແຖວ ແລະ ວັນທີ 10 ເມສາ 2020: ພາຍຫຼັງທີ່ກໍລະນີທີ່ 16 ຖືກຢັ້ງຢືນວ່າຕິດເຊື້ອໃນວັນທີ 09 ເມສາ ທີມງານແພດໄດ້ໂທຕິດຕໍ່ຫາຜູ້ກ່ຽວ ແລະ ສົ່ງລົດອໍາບູລັງ ໄປຮັບເອົາຜູ້ກ່ຽວມາກວດຫາເຊື້ອ ແລະ ເຂົ້ານອນຕິດຕາມ, ປິ່ນປົວ ຢູ່ໂຮງໝໍມິດຕະພາບ.

ໂດຍສັງລວມແລ້ວ ຜູ້ສໍາຜັດໃກ້ຊິດກັບກໍລະນີີທີ 17 ມີທັງໝົດມີ 6 ຄົນ (ເຊີ່ງເປັນໝູ່ຢູ່ຫ້ອງແຖວດຽວກັນ ທີ່ກິນເຂົ້າຮ່ວມກັນ ແລະ ໝູ່ທີ່ກິນເຂົ້ານຳກັນຢູ່ບ້ານສາລາຄຳ)

ສ່ວນກໍລະນີທີ 18: ເພດຍິງ, ອາຍຸ 32 ປີ, ອາຊີບ: ຫວ່າງງານ (ເປັນໝູ່ໃກ້ຊິດໃຊ້ຊິວິດຮ່ວມກັນ ຢູ່ຫ້ອງດຽວກັນ ກັບກໍລະນີຢັ້ງຢືນຜູ້ທີ 17 ) ການເຄື່ອນໄຫວທັງໝົດ ແມ່ນຄືກັນ, ລົດໄດ້ຮັບໄປໂຮງໝໍໃນເວລາດຽວກັນ.

ດັ່ງນັ້ນ, ນັບແຕ່ເດືອນມັງກອນ ຮອດ ວັນທີ 10 ເມສາ 2020 ໄດ້ມີການເກັບຕົວຢ່າງມາກວດ ທັງໝົດ 1.094 ຄົນ, ກວດພົບເຊື້ອທັງໝົດ 18 ຄົນ ແລະ ທັງໝົດ ແມ່ນນອນປິ່ນປົວ – ຕິດຕາມ ຢູ່ໂຮງໝໍ.

ສຳລັບຈໍານວນຜູ້ສໍາຜັດໃກ້ຊິດທັງໝົດ ທີ່ໄດ້ຕິດຕາມ ແຕ່ວັນທີ 23 ມີນາ – 10 ເມສາ 2020 ມີ ທັງໝົດ 388 ຄົນ, ໝົດກໍານົດຕິດຕາມທັງໝົດ 307 ຄົນ, ຍັງສືບຕໍ່ຕິດຕາມທັງໝົດ 81 ຄົນ ໃນນັ້ນມີ ນະຄອນຫຼວງວຽງຈັນ 40 ຄົນ, ໄຊສົມບູນ 36 ຄົນ, ຫຼວງພະບາງ 2, ຄຳມ່ວນ 2, ແຂວງວຽງຈັນ 1 ຄົນ.

 

ທີ່ມາ: ຂ່າວສານປະເທດລາວ