ບົວລະພາ ປິດການເຂົ້າ-ອອກ ເມືອງຊົ່ວຄາວ ປ້ອງກັນໂຄວິດ-19

ບົວລະພາ ປິດການເຂົ້າ-ອອກ ເມືອງຊົ່ວຄາວ ປ້ອງກັນໂຄວິດ-19

9th April 2020 0 By Admin

ພາຍຫຼັງ ສປປ ລາວ ພົບຜູ້ຕິດເຊື້ອໂຄວິດ-19 ທັງໝົດ 16 ກໍລະນີ ຍິ່ງເຮັດໃຫ້ລັດຖະບານ ກໍ່ຄືຄະນະສະເພາະກິດ ປ້ອງກັນ ແລະ ຄວບຄຸມ ພະຍາດອັກເສບປອດຈາກເຊື່ອພະຍາດໂຄວິດ 19 ຢູ່ສູນກາງ ກໍ່ຄືທ້ອງຖິ່ນ ໄດ້ເພີ່ມທະວີຄວາມເຂັ້ມງວດ ໃນການເອົາໃຈໃສ່ປະຕິບັດຕາມຄຳສັ່ງຂອງນາຍົກ ເລກທີ 06 ຢ່າງເຄັ່ງຄັດ ເຊິ່ງມີຫຼາຍແຂວງ ແລະ ຫຼາຍເມືອງ ຕ່າງກໍ່ປິດການເຂົ້າ-ອອກ ໂດຍຫ້າມປະຊາຊົນອອກຈາກບ້ານໄປເຂດອື່ນຢ່າງເດັດຂາດ ໂດຍຫຼ້າສຸດ ເມືອງ ບົວລະພາ ແຂວງ ຄຳມ່ວນ ກໍ່ໄດ້ມີການປິດການເຂົ້າ-ອອກ  ຊົ່ວຄາວ ເປັນທີ່ຮຽບຮ້ອຍແລ້ວ.


ໃນຕອນເຊົ້າຂອງວັນທີ 9 ເມສາ 2020 ທີ່ບ້ານ ນາເປງ ເມືອງບົວລະພາ ທ່ານ ສຸກຂະເສີມ ແກ້ວຈັນທະລາ ຮອງເຈົ້າເມືອງໆບົວລະພາ ຫົວໜ້າຄະນະສະເພາະກິດປ້ອງກັນ ແລະ ຄວບຄຸມພະຍາດອັກເສບປອດຈາກເຊື່ອພະຍາດໂຄວິດ 19 ຂັ້ນເມືອງ ໄດ້ຈັດພິທີ ປິດເມືອງບົວລະພາຊົ່ວຄາວ. ເຂົ້າຮ່ວມມີບັນດາ ຄະນະປະຈຳພັກເມືອງ ຄະນະພັກເມືອງ ຫົວໜ້າຫ້ອງການ ພະນັກງານວິຊາການທີ່ກຽ່ວຂ້ອງ ນາຍ ແລະ ພົນທະຫານ,ນາຍ ແລະ ພົນຕຳຫຼວດ,ຕະຫຼອດຮອດ ຄະນະທີມງານກໍ່ສ້າງຮາກຖານການເມືອງ ນາຍບ້ານ, ຮອງນາຍບ້ານ ແລະ ບ້ານທີ່ໄກ້ຄຽງ ເຂົ້າຮ່ວມນຳຢ່າງພ້ອມພຽງ.


ໃນການປິດການ ເຂົ້າ – ອອກ ເມືອງບົວລະພາ ຄັ້ງນີ້ກໍ່ເພື່ອຈັດຕັ້ງປະຕິບັດຜັນຂະຫຍາຍຄຳສັ່ງແນະນຳ ເລກທີ 06/ນຍ, ຄຳສັ່ງແນະນຳຂອງ ເຈົ້າແຂວງໆ ຄຳມ່ວນ ເລກທີ 02/ຈຂ,ຄມ ແລະ ຄຳສັ່ງແນະນຳຂອງ ເຈົ້າເມືອງໆ ບົວລະພາ ໃຫ້ໄດ້ຮັບການຈັດຕັ້ງຢ່າງເຂັ້ມງວດ ແລະ ສາມາດຕິດຕາມການເຂົ້າ – ອອກ ຂອງພໍ່ແມ່ປະຊາຊົນ ເພື່ອບໍ່ໃຫ້ມີການແຜ່ລະບາດພະຍາດດັ່ງກ່າວ ເຖິງແມ່ນວ່າມາຮອດປະຈຸບັນຍັງບໍ່ມີອາການເຂົ້າຂ່າຍຕິດເຊື້ອພະຍາດໂຄວິດ-19 ແລ້ວກໍ່ຕາມ ແຕ່ເພື່ອຄວາມປອດໄພຂອງປະຊາຊົນ ທາງການນຳເມືອງໄດ້ຕັ້ງດ່ານກວດກາ  3 ຈຸດຄື: ຈຸດຊາຍແດນ ມະຫາໄຊ, ຊາຍແດນເມືອງຍົມມາລາດ ແລະ ຊາຍແດນເມືອງວິລະບູລີ

ທີ່ມາ: ຫ້ອງການ ຖວທ ເມືອງບົວລະພາ ແຂວງຄຳມ່ວນ