ຂອບໃຈ ທະນາຄານ ICBC ມອບອຸປະກອນການແພດ ຕ້ານໂຄວິດ-19 ໃຫ້ກະຊວງສາທາ

ຂອບໃຈ ທະນາຄານ ICBC ມອບອຸປະກອນການແພດ ຕ້ານໂຄວິດ-19 ໃຫ້ກະຊວງສາທາ

8th April 2020 0 By Admin

ບໍ່ຍາມໃດ ສາຍສຳພັນການຮ່ວມມືຊ່ວຍເຫຼືອເຊິ່ງກັນ ແລະ ກັນ ລະຫວ່າງປະຊາຊົນສອງຊາດລາວ-ຈີນ, ຈີນ-ລາວ ຕ່າງກໍ່ໃຫ້ຊ່ວຍເຫຼືອ. ຫຼ້າສຸດ, ທະນາຄານອຸດສາຫະກຳ ແລະ ການຄ້າຈີນ ຈຳກັດ (ICBC) ປະຈຳລາວ ກໍ່ໄດ້ນຳເອົາເຄື່ອງອຸປະກອນການແພດມອບໃຫ້ກະຊວງສາທາລະນະສຸກ ຂອງ ສປປ ລາວ ມູນຄ່າ 117.500 ໂດລາສະຫະລັດ ໃນວັນທີ 8 ເມສາ 2020 ທີ່ກະຊວງສາທາລະນະສຸກ ເພື່ອປະກອບສ່ວນຊ່ວຍເຫຼືອ ສປປ ລາວ ຕ້ານໂຄວິດ-19.

ສຳລັບເຄື່ອງນຳມ່ຊ່ວຍເຫຼືອປະກອບມີ ມີຜ້າອັດປາກອະນາໄມສຳລັບການແພດ ຈຳນວນ 150.000 ອັນ ແລະ ເຄື່ອງກວດຫາເຊື້ອໄວຣັດໂຄວິດ-19 ຈຳນວນ 2 ເຄື່ອງ ເພື່ອນໍາໃຊ້ເຂົ້າໃນການສະກັດກັ້ນ ແລະ ຕ້ານພະຍາດໂຄວິດ-19 ທີ່ກຳລັງແຜ່ລະບາດຢູ່ໃນທົ່ວໂລກ. ເຊິ່ງຕາງໜ້າມອບໂດຍ ທ່ານ ຊຸ່ນ ເຝີງເລີຍ ອຳນວຍການທະນາຄານ ICBC ສາຂານະຄອນຫລວງວຽງຈັນ ແລະ ກ່າວຮັບໂດຍທ່ານ ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ມີທ່ານ ຫວັງ ຊີຮຸ່ຍ ທູດເສດຖະກິດຈີນປະຈຳ ສປປ ລາວ ພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ສປປ ລາວ ໄດ້ປະກາດເປັນທາງການວ່າມີຜູ້ຕິດເຊື້ອ ໂຄວິດ-19 ຄົນທໍາອິດໃນວັນທີ 24 ມີນາ 2020 ຜ່ານມາ, ທ່ານສີຈິ້ນຜິງ ເລຂາທິການໃຫຍ່ ສປ ຈີນ ໄດ້ມີຄວາມຫ່ວງໄຍເປັນຢ່າງຍິ່ງ ຕໍ່ກັບຄວາມຫຍຸ້ງຍາກໃນການຄວບຄຸມ ແລະ ປ້ອງກັນການລະບາດຂອງ ໂຄວິດ-19 ຢູ່ ສປປ ລາວ, ທ່ານໄດ້ມີຄໍາສັ່ງໃຫ້ຈັດຕັ້ງຄະນະຊ່ຽວຊານເພື່ອໄປເຮັດວຽກຊ່ວຍ ສປປ ລາວ ໃຫ້ໄວທີ່ສຸດ, ພ້ອມທັງໄດ້ຊ່ວຍເຫລືອອຸປະກອນການແພດ ໂດຍອີງຕາມສະພາບຈໍາເປັນຕົວຈິງຂອງ ສປປ ລາວ ຝ່າຍຈີນ ຈະສືບຕໍ່ໃຫ້ການສະໜັບສະໜັບໜູນ ແລະ ຊ່ວຍເຫລືອຢ່າງຮອບດ້ານ.


ທ່ານ ຊຸ່ນ ເຝີງເລີຍ ໄດ້ກ່າວວ່າ: ທະນາຄານ ໄອຊີບີຊີ ໄດ້ປຸກລະດົມສາຂາທົ່ວ ສປ ຈີນ ເພື່ອຊ່ວຍຊອກຫາແຫລ່ງຈໍາໜ່າຍອຸປະກອນ, ແຕ່ລະສາຂາກໍ່ໄດ້ຕອບສະໜອງຢ່າງຕັ້ງໜ້າ, ພາຍໃນໜຶ່ງມື້ ສາຂາຈ່ຽງຊີກໍຈັດຊື້ຜ້າອັດປາກອະນາໄມສໍາລັບທາງການແພດໄດ້ 150.000 ອັນ. ພາຍໃຕ້ການປະສານງານຊ່ວຍເຫລືອຈາກສໍານັກງານໃຫຍ່, ທະນາຄານ ໄອຊີບີຊີ ສາຂານະຄອນຫລວງວຽງຈັນ ແລະ ສາຂາຈ່ຽງຊີ ສາມາດປະສານງານກັນໄດ້ຢ່າງວ່ອງໄວ, ເຮັດໃຫ້ການຈັດຊື້ ແລະ ການຂົນສົ່ງຜ່ານໄປໄດ້ຢ່າງລຸລ່ວງ. ທະນາຄານ ໄອຊີບີຊີ ໄດ້ປະຕິບັດພັນທະຕໍ່ສັງຄົມຢ່າງຕັ້ງໜ້າ, ການຮ່ວມມືກັບສັງຄົມລາວຕ້ານ COVID-19 ແມ່ນການສະແດງອອກທີ່ເປັນຮູບປະທໍາຂອງຄູ່ຮ່ວມຊະຕາກໍາ. ຄືດັ່ງກັບຄໍາເວົ້າຂອງທ່ານ ຈຽງຈ້າຍຕົ່ງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ທີ່ວ່າ: ພະຍາດເຖິງຈະຮ້າຍແຮງປານໃດ, ແຕ່ຄວາມຮັກແພງຈະເອົາຊະນະໄດ້, ການທີ່ມີພູຜາສາຍນໍ້າຕິດຈອດກັນ, ຕ່າງຊ່ວຍຊູ້ຍູ້ໜູນ ເປັນພຶດຕິກໍາຕົວຈິງທີ່ສ່ອງແສງໃຫ້ເຫັນເຖິງຄູ່ຮ່ວມຊະຕາກໍາລາວ-ຈີນຢ່າງແທ້ຈິງ, ລາວ-ຈີນ ຈະມີອະນາຄົດທີ່ສົດໃສກວ່າເກົ່າ.


ໃນໂອກາດດຽວກັນນີ້, ທ່ານ ດຣ ບຸນກອງ ໄດ້ສະແດງຄວາມຂອບໃຈມາຍັງທະນາຄານ ICBC ພ້ອມທັງປະຊາຊົນຈີນ ກໍຄືລັດຖະບານຈີນ ທີ່ໄດ້ໃຫ້ການຊ່ວຍເຫລືອຕະຫລອດມາ. ຍາມໃດ ຈີນ-ລາວ ກໍໄດ້ຮ່ວມສະຕາກຳດຽວກັນ ແລະ ນີ້ກໍແມ່ນນໍ້າໃຈໜຶ່ງຂອງປະຊາຊົນຈີນ ທີ່ມີຕໍ່ປະຊາຊົນລາວ ແລະ ໄດ້ຄຽງບ່າຄຽງໄຫລກັບປະຊາຊົນລາວຕະຫລອດມາ, ເຊິ່ງການຊ່ວຍເຫລືອນີ້ ບໍ່ສາມາດວັດເປັນມູນຄ່າໄດ້ ແລະ ເຄື່ອງຊ່ວຍຄັ້ງນີ້ ທາງກະຊວງສາທາລະນະສຸກ ຈະໄດ້ນຳເອົາໄປແຈກໃຫ້ແກ່ບັນດາໂຮງໝໍຕ່າງໆ ເພື່ອນຳໃຊ້ເຂົ້າໃນການປ້ອງກັນ, ຄວບຄຸມ ແລະ ສະກັດກັ້ນການລະບາດຂອງພະຍາດໂຄວິດ-19 ນີ້.

ທີ່ມາ, ຂ່າວສານປະເທດລາວ