ທຸກຊີວິດສຳຄັນ! ກອງພົນທີ 2 ຍົກສູງຕໍ່ວຽກງານຕ້ານສະກັດກັ້ນພະຍາດລະບາດ ໂຄວິດ-19

ທຸກຊີວິດສຳຄັນ! ກອງພົນທີ 2 ຍົກສູງຕໍ່ວຽກງານຕ້ານສະກັດກັ້ນພະຍາດລະບາດ ໂຄວິດ-19

8th April 2020 0 By Admin

ເພື່ອສະກັດກັ້ນ ແລະ ຄວບຄຸມ ບໍ່ໃຫ້ເຊື້ອພະຍາດໂຄວິດ-19 ແພ່ລະບາດເປັນວົງກວ້າງຢູ່ໃນປະເທດເຮົາ, ລັດຖະບານ ກໍ່ຄືຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແພ່ລະບາດຂອງພະຍາດໂຄວິດ-19 ໄດ້ວາງຫຼາຍມາດຕະການເຂັ້ມງວດ ໃນການປ້ອງກັນ ໂດຍແຈ້ງການໃຫ້ຫຼາຍໜ່ວຍງານຂອງລັດ ແລະ ເອກະຊົນ ວາງມາດຕະການເຂັ້ມງວດສະກັດກັ້ນເຊື້ອພະຍາດດັ່ງກ່າວ.

ຄຽງຄູ່ກັບ ປະຕິບັດຕາມຄຳສັ່ງນາຍົກລັດຖະມົນຕີ ແຫ່ງ ສປປລາວ ວ່າດ້ວຍການເພີ້ມທະວີມາດຕະການສະກັດກັ້ນຕ້ານພະຍາດລະບາດ ໂຄວິດ-19 .ອີງຕາມການແຈ້ງການຂອງກະຊວງປ້ອງກັນປະເທດ ສະບັບເລກທີ 1712/ກປທ ລົງວັນທີ 26/3/2020 ວ່າດ້ວຍການຮັບມືກັບການແຜ່ລະບາດຂອງເຊື້ອພະຍາດ ໂຄວິດ-19 ແລະ ອິງຕາມການແຈ້ງການຂອງຄະນະສະເພາະກິດ ເພື່ອປ້ອງກັນຄວບຄຸມ ແລະ ຕອບໂຕ້ຕ້ານການລະບາດພະຍາດ ໂຄວິດ-19 ໃນຕົນ ເດືອນເມສາ 2020 ນີ້.

ກອງພົນທີ 2 ຈື່ງຮີບຮ້ອນອອກຄຳສັ່ງແຈ້ງການພາຍໃນກົມກອງຂອງຕົນ ແລະ ແຕ່ງຕັ້ງຄະນະຮັບຜິດຊອບ ຕ້ານພະຍາດ ໂຄວີດ-19 ເຊິ່ງໄດ້ແຕ່ງຄະນະຮັບຜິດຊອບລົງຊີ້ນຳຕົວຈີງແບ່ງອອກເປັນ 3 ໜ່ວຍງານ ຄື ໜ່ວຍງານທີ 1 ລົງໄປທາງທິດ ກອງພັນໃຫຍ່ 201 , ໜ່ວຍງານທີ 2 ລົງໄປທິດ ກອງພັນໃຫຍ່ 202 , ໜ່ວຍງານທີ 3 ກວດກາພະນັກງານ-ນັກຮົບ ເຂົ້າ-ອອກປະຕູໂຂງໃຫຍ່ຂອງກອງພົນ. ເພື່ອກວດຄັດກອງຫາຄົນປ່ວຍ ຜູ້ທີ່ສົງໄສຕິດເຊື່ອພະຍາດ ໂຄວິດ-19 ເພື່ອບໍ່ໃຫ້ເກີດມີການຕິດເຊື້ອໃນກຳລັງປ້ອງກັນຊາດ ຮັບປະກັນສຸຂະພາບຂອງຄະນະນຳ, ພະນັກງານ-ນັກຮົບໃຫ້ແຂງແຮງ.

ຜ່ານການກວດກາຄັດກອງ ເຫັນວ່າບໍ່ມີພະນັກງານ-ນັກຮົບ ທີ່ມີອຸນຫະພູມສູງຜິດປົກກະຕິ ແລະ ຄາດວ່າບໍ່ມີຜູ້ຕິດເຊື້ອພະຍາດ ໂຄວິດ-19.

ໂດຍ ສຸວັນໂນ ທະລັງສີ