ຊົມເຊີຍ! ສະຕຣາໂທລະຄົມ ສະໜັບສະໜູນເງິນ 2,8 ຕື້ກີບ ຊ່ວຍລັດຖະບານຕ້ານໂຄວິດ-19

ຊົມເຊີຍ! ສະຕຣາໂທລະຄົມ ສະໜັບສະໜູນເງິນ 2,8 ຕື້ກີບ ຊ່ວຍລັດຖະບານຕ້ານໂຄວິດ-19

8th April 2020 0 By Admin

ບໍລິສັດ ສະຕຣາໂທລະຄົມ ຫລື UNITEL. ໄດ້ປະກອບສ່ວນຊ່ວຍເຫລືອ ລັດຖະບານ ແຫ່ງ ສປປ ລາວ ເພື່ອຄວບຄຸມການລະບາດຂອງເຊື້ອໄວຣັສ ໂຄວິດ 19 ລວມມູນຄ່າ 2,8 ຕື້ກວ່າກີບ, ໃນນັ້ນປະກອບມີ ເບີໂທລະສັບ ຈໍານວນ 53 ເບີ ໃຫ້ແກ່ສຳນັກງານນາຍົກລັດຖະມົນຕີ ພ້ອມມູນຄ່າໂທ 300,000 ກີບ/ເບີ/ເດືອນ ແລະ ເບີດັ່ງກ່າວໄດ້ຮັບດາຕ້າຕື່ມ 30GB ເບີ/ເດືອນ ມູນຄ່າເງິນ ແລະ ດາຕ້າ ມອບໃຫ້ ແຕ່ເເດືອນເປັນເວລາ 6 ເດືອນ ແລະ ສະໜັບສະໜູນງົບປະມານໃນການຕິດຕັ້ງລະບົບກອງປະຊຸມທາງໄກຢູ່ສຳນັກງານນາຍົກລັດຖະມົນຕີ ເພື່ອເຊື່ອມຕໍ່ກັບ 18 ແຂວງ ແລະ 148 ເມືອງໃນຂອບເຂດທົ່ວປະເທດ.

ມອບເບີໂທລະສັບຈໍານວນ 300 ຊິມ ໃຫ້ແກ່ ກະຊວງສາທາລະນະສຸກພ້ອມມູນຄ່າໂທ 300,000 ກີບ/ເບີ/ເດືອນ ແລະ ເບີດັ່ງກ່າວໄດ້ຮັບດາຕ້າຕື່ມ 30GB ເບີ/ເດືອນ ມູນຄ່າເງິນ ແລະ ດາຕ້າ ມອບໃຫ້ ແຕ່ລະເດືອນເປັນເວລາ 6 ເດືອນ ແລະ ສະໜັບສະໜູນ ລະບົບສົ່ງຂໍ້ຄວາມເຄື່ອງໝາຍການຄ້າ (SMS Brandname) ໄດ້ສົ່ງຂໍ້ຄວາມແບບໂອໂຕມະຕິກ ເຖິງເລກໝາຍ ໂທລະສັບ ຫຼາຍກວ່າ 3,5 ລ້ານຄົນ, ເພື່ອໂຄສະນາ ແລະ ແຈ້ງເຕືອນທັນເວລາ ກ່ຽວກັບສະພາບການລະບາດພະຍາດ.


ພິທີມອບ-ຮັບໄດ້ຈັດຂຶ້ນ ໃນຕອນບ່າຍວັນທີ 6 ເມສາ 2020 ຜ່ານມາ ຢູ່ສຳນັກງານນາຍົກລັດຖະມົນຕີ ໂດຍແມ່ນ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ທັງເປັນຫົວໜ້າຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດ ອັກເສບປອດຈາກເຊື້ອຈຸລະໂຣກສາຍພັນໃໝ່ ເປັນຜູ້ກ່າວຮັບຈາກ ທ່ານ ລີວ ແມ໋ງ ຮ່າ ຜູ້ອໍານວຍການໃຫຍ່ ບໍລິສັດສະຕາໂທລະຄົມ ໂດຍມີພາກສ່ວນກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານ.

ທັງນີ້ ກໍ່ເພື່ອເປັນການປະກອບສ່ວນໃຫ້ແກ່ວຽກງານຂອງລັດຖະບານ ໂດຍສະເພາະແມ່ນວຽກງານການສື່ສານ ການຊີ້ນໍາພາລົງເຖິງຂັ້ນທ້ອງຖິ່ນ ໄດ້ຈັດຕັ້ງປະຕິບັດໂດຍໄວ ໂດຍສະເພາະແມ່ນວຽກງານການປ້ອງກັນການລະບາດ ແລະ ລະບຽບການຕ່າງໆ ທັງເປັນການຊ່ວຍຫລຸດຜ່ອນຄ່າໃຊ້ຈ່າຍດ້ານງົບປະມານຕ່າງໆທີ່ພາກລັດຖະບານສະໜອງຊ່ວຍເຫລືອແກ່ປະຊາຊົນ.

ໃນໂອກາດນີ້ ທ່ານ ສົມດີ ດວງດີ ໄດ້ສະແດງຄວາມຂອບໃຈ ຕໍ່ບັນດາບໍລິສັດດັ່ງກ່າວ ທີ່ເຫັນຄວາມສຳຄັນ ແລະ ສະໜັບສະໜູນ ລັດຖະບານລາວ ໃນການຕ້ານການແຜ່ລະບາດຂອງເຊື້ອໄວຣັດໂຄວິດ-19 ຢູ່ ສປປ ລາວ ພ້ອມທັງຢືນຢັນວ່າ ຈະນຳເງິນດັ່ງກ່າວ ໄປນຳໃຊ້ເຂົ້າໃນວຽກງານດັ່ງກ່າວໃຫ້ເກີດຜົນປະໂຫຍດສູງສຸດ.