ຊົມເຊີຍ! ການຄ້າສາລະວັນເຂັ້ມງວດ ລົງກວດກາສິນຄ້າໃນຕະຫຼາດ ກັນການສວຍໂອກາດ

ຊົມເຊີຍ! ການຄ້າສາລະວັນເຂັ້ມງວດ ລົງກວດກາສິນຄ້າໃນຕະຫຼາດ ກັນການສວຍໂອກາດ

7th April 2020 0 By Admin

ເພື່ອປ້ອງກັນສະກັດກັ້ນການສວຍໂອກາດຂຶ້ນລາຄາສິນຄ້າ ຂອງພໍ່ຄ້າແມ່ຄ້າຫົວໃສຈຳນວນນຶ່ງ ທີ່ຫາຜົນປະໂຫຍດສ່ວນຕົວ ໂດຍບໍ່ວ່າສິ່ງທີ່ເຮັດນັ້ນຈະຜິດລະບຽບ ໂດຍສະເພາະ ໃນໄລຍະທີ່ມີການແຜ່ລະບາດຂອງເຊື້ອພະຍາດອັກເສບປອດສາຍພັນໃໝ່ (ໂຄວິດ-19). ສະນັ້ນ, ເຈົ້າໜ້າທີ່ໃນແຕ່ລະທ້ອງຖິ່ນ ໄດ້ເອົາໃຈໃສ່ຕິດຕາມກວດກາ ການຊື້ຂາຍສິນຄ້າຕາມທ້ອງຕະຫຼາດ ເພື່ອກັນການສວຍໂອກາດ. ຫຼ້າສຸດ ເຈົ້າໜ້າທີ່ການຄ້າແຂວງ ສາລະວັນ ກໍ່ໄດ້ລົງຕິດຕາມກວດກາສິນຄ້າຕາມທ້ອງຕະຫຼາດ  ທັງເປັນການປະຕິບັດຕາມຄໍາສັ່ງ ຂອງນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍ ການເພີ່ມທະວີມາດຕະການສະກັດກັ້ນ, ກັນການແຜ່ລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ ໂຄວິດ-19.

ທ່ານ ສະເຫຼີມໄຊ ສຸລິຍະວົງສັກ ຫົວໜ້າຫ້ອງການອຸດສາຫະກໍາ ແລະ ການຄ້າເມືອງສາລະວັນ ທັງເປັນຄະນະໜ່ວຍສະເພາະກິດເພື່ອປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫລື ໂຄວິດ-19 ໃຫ້ຮູ້ວ່າ: ພາຍຫຼັງທີ່ມີຄໍາສັ່ງອອກມາ ທາງຫ້ອງການອຸດສາຫະກໍາ ແລະ ການຄ້າເມືອງສາລະວັນ ຂອງພວກເຮົາ ກໍໄດ້ມີການແຕ່ງຕັ້ງພະນັກງານຕິດຕາມກວດກາ, ຄຸ້ມຄອງລາຄາສິນຄ້າ ຢ່າງເຂັ້ມງວດ ແລະ ເປັນປົກກະຕິ. ນອກນີ້, ຍັງໄດ້ລົງຊຸກຍູ້ຫົວໜ່ວຍທຸລະກິດບໍ່ໃຫ້ສວຍໃຊ້ໂອກາດຂຶ້ນລາຄາສິນຄ້າ ຫຼື ກັກຕຸນສິນຄ້າຢ່າງເດັດຂາດ ຕໍ່ກັບວຽກງານຄຸ້ມຄອງລາຄາສິນຄ້າ ແມ່ນອີງໃສ່ດໍາລັດຂອງນາຍົກລັດຖະມົນຕີ ສະບັບເລກທີ 474/ນຍ, ລົງວັນທີ 18 ຕຸລາ 2010 ວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ, ໂດຍສະເພາະສິນຄ້າທີ່ລັດຄວບຄຸມ 4 ປະເພດ 14 ລາຍການ ໂດຍສະເພາະແມ່ນສິນຄ້າທີ່ມີຜົນກະທົບໄວຕໍ່ຊີວິດການເປັນຢູ່ຂອງປະຊາຊົນຄື: ປະເພດນ້ຳມັນເຊື້ອໄຟ, ເຂົ້າ, ປາ, ຊີ້ນໝູ, ຊີ້ນງົວ ແລະ ຊີ້ນຄວາຍ.

ໃນໄລຍະຜ່ານມາຫ້ອງການອຸດສາຫະກຳການຄ້າເມືອງສາລະວັນ ຮ່ວມກັບພະແນກ ອຸດສາຫະກໍາ ແລະ ການຄ້າແຂວງສາລະວັນ, ຂະແໜງການທີ່ກ່ຽວຂ້ອງ ຂັ້ນເມືອງເອົາໃຈໃສ່ກວດກາຢ່າງເປັນປົກກະຕິ ສະພາບລາຄາທີ່ລັດຄວບຄຸມກໍເຫັນວ່າຢູ່ໃນເກນປົກກະຕິ, ທັງນີ້ກໍເພື່ອປົກປ້ອງຜູ້ບໍລິໂພກ.

ຖ້າຫາກວ່າພົບເຫັນໃນກໍລະນີມີການລະເມີດທາງຫ້ອງການອຸດສາຫະກໍາ ແລະ ການຄ້າ ເມືອງສາລະວັນ ກໍໄດ້ມີມາດຕະການຄື: ການລະເມີດຄັ້ງທີໜຶ່ງ ແລະ ຄັ້ງທີສອງ: ແມ່ນຈະໄດ້ມີການປັບໃໝຕາມກໍລະນີໜັກເບົາ ພ້ອມທັງຂຽນໃບປະຕິຍານ, ການລະເມີດຄັ້ງທີສາມ:ໃຫ້ດໍາເນີນການປັບໃໝ ສອງເທົ່າຕົວ ຂອງການປັບໃໝຄັ້ງທີສອງ ຕໍ່ຄັ້ງຕໍ່ລາຍການ ພ້ອມທັງຢຸດໂຈະທະບຽນວິສາຫະກິດ ແລະ ຢຶດສິນຄ້າເປັນຂອງລັດ.


ທ່ານ ຫົວໜ້າພະແນກ ອຸດສະຫະກໍາການຄ້າເມືອງສາລະວັນ ຍັງຮຽກຮ້ອງມາຍັງບັນດາຫົວໜ່ວຍທຸລະກິດ, ຜູ້ປະກອບການຊາວຄ້າຂາຍ ໃນຊ້ວງທີ່ທາງພັກ-ລັດກໍາລັງຕັ້ງໜ້າຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ 19 ຈົ່ງໃຫ້ຄວາມຮ່ວມມືໃນການຈໍາໜ່າຍ ສິນຄ້າທີ່ມີຄຸນນະພາບ ແລະ ຖືກກັບລາຄາທີ່ລັດວາງອອກຖ້າຫາກວ່າບໍ່ປະຕິບັດຕາມ ແມ່ນຈະໄດ້ໃຊ້ມາດຕະການຢ່າງເຂັ້ມງວດ, ຕະຫຼອດຮອດພໍ່ແມ່ປະຊາຊົນຖ້າພົບເຫັນການລະເມີດຈົ່ງເປັນເຈົ້າການນໍາກັນ ໃຫ້ຄວາມຮ່ວມມືໃນການແຈ້ງມາຍັງຄະນະຄຸ້ມຄອງລາຄາສິນຄ້າຂັ້ນເມືອງໂດຍສະເພາະຫ້ອງການອຸດສາຫະກໍາ ແລະ ການຄ້າເມືອງ.

ທີີ່ມາ, medialaos