ທະນາຄານໂລກ ສະໜອງເງິນກູ້ 18 ລ້ານໂດລາ ແກ່ລາວ ຕ້ານພະຍາດໂຄວິດ-19

ທະນາຄານໂລກ ສະໜອງເງິນກູ້ 18 ລ້ານໂດລາ ແກ່ລາວ ຕ້ານພະຍາດໂຄວິດ-19

7th April 2020 0 By Admin

ທະນາຄານ​ໂລກ (WB) ອະນຸມັດ​ເງິນ​ກູ້​ສຸກ​ເສີນ 18 ລ້ານ​ໂດ​ລາ​ສະຫະລັດ ຫຼື ປະມານ 161 ຕື້​ກີບ​ແກ່ ​ສປປ ລາວ ເພື່ອ​ຕອບ​ໂຕ້​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ໂຄວິດ-19 ໂດຍ​ພິທີ​ລົງ​ນາມ​ສັນຍາ​ກູ້​ຢືມ​ດັ່ງກ່າວ ຈັດ​ຂຶ້ນ​ວັນ​ທີ 7 ເມສາ 2020 ຢູ່​ກະຊວງ​ການ​ເງິນ ລະຫວ່າງ​ທ່ານ ບຸນ​ໂຈມ ອຸບົນ​ປະເສີດ ຮອງ​ລັດຖະມົນຕີ​ກະຊວງ​ການ​ເງິນ ແລະ ທ່ານ ນິ​ໂກ​ລາ ພອນ​ທາ​ຣາ ຫົວໜ້າ​ຫ້ອງການ WB ປະຈຳ ​ສປປ ລາວ ມີ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ພາບປະກອບຂ່າວ

ປັດຈຸບັນ ການ​ແຜ່​ລະບາດ​ຂອງ​ພະຍາດ ໂຄວິດ-19 ສົ່ງ​ຜົນ​ກະທົບ​ຕໍ່​ເສດຖະກິດ-ສັງຄົມ​ຂອງ 200 ກວ່າ​ປະເທດ ໃນ​ນີ້ ​ສປປ ລາວ ກໍ​ເປັນ​ປະເທດ​ໜຶ່ງ​ທີ່​ຮັບ​ຜົນ​ກະທົບ​ດັ່ງກ່າວ ເຊິ່ງ​ນັບ​ແຕ່​ພົບ​ຜູ້​ຕິດເຊື້ອ​ພະຍາດ ໂຄວິດ-19 ລັດຖະບານ​ກໍ​ໄດ້​ມີ​ວິທີ​ການ​ແກ້​ໄຂ​ຢ່າງ​ມີ​ປະ​ສິດທິ​ຜົນ ເພື່ອ​ຄວບ​ຄຸມ ສະກັດ​ກັ້ນ ແລະ ຕ້ານ​ການ​ແຜ່​ລະບາດ​ຂອງ​ພະຍາດ​ດັ່ງກ່າວ ຮັບປະກັນ​ຄວາມ​ປອດ​ໄພ​ໃຫ້​ປະຊາຊົນ ການ​ຊ່ວຍເຫຼືອ​ຄັ້ງ​ນີ້ ເພື່ອ​ກຽມ​ຄວາມ​ພ້ອມ​ຂອງ​ກິດຈະກຳ​ຕ່າງໆ​ໃນ​ການ​ຮັບ​ມື​ກັບ​ເຫດ​ສຸກ​ເສີນ ກໍ​ຄື​ການ​ປ້ອງ​ກັນ ແລະ ຄວບ​ຄຸມ​ການ​ຕິດເຊື້ອ ການ​ກວດ​ຫາ​ກໍລະນີ​ຕິດເຊື້ອ ແລະ ການ​ຄົ້ນ​ຫາ​ຜູ້​ທີ່​ໄດ້​ໃກ້ຊິດ​ກັບ​ຜູ້​ຕິດເຊື້ອ ການ​ຄຸ້ມ​ຄອງ​ກໍລະນີ​ຜູ້​ຕິດເຊື້ອ ແລະ ການ​ສື່ສານ​ໃຫ້​ຄວາມ​ຮູ້​ກ່ຽວ​ກັບ​ການ​ລະບາດ​ຂອງ​ພະຍາດໂຄວິດ-19 ທັງ​ຈະ​ຊ່ວຍ​ຍົກ​ລະດັບ​ຄວາມ​ສາມາດ​ໃນ​ການ​ເຝົ້າ​ລະວັງ ແລະ ທັກ​ສະການ​ປິ່ນປົວ​ຂອງ​ທີມ​ແພດ​ໝໍ​ລາວ ສ້າງ​ຄວາມ​ເຂັ້ມແຂງ​ໃຫ້​ລະບົບ​ສາທາລະນະ​ສຸກ ແລະ ສ້າງ​ຄວາມ​ສາມາດ​ໃນ​ການ​ຕອບ​ໂຕ້​ພະຍາດ​ດັ່ງກ່າວ ຕື່ມ​ອີກ.

ການ​ອະນຸມັດ​ເງິນ​ກູ້​ສຸກ​ເສີນ​ຂອງ WB ຕ້ານ​ການ​ລະບາດ​ຂອງ​ພະຍາດ ໂຄວິດ-19 ຖືກ​ຮ່າງ​ຂຶ້ນ​ມາ​ພາຍ​ໃຕ້​ຂອບ​ການ​ຊ່ວຍເຫຼືອ​ແບບ​ຮີບ​ດ່ວນ​ຕໍ່​ການ​ລະບາດ​ຂອງ​ພະຍາດ ໂຄວິດ-19 ໃນ​ທົ່ວ​ໂລກ ເພື່ອ​ຕອບ​ສະໜອງ​ຢ່າງ​ຮີບ​ດ່ວນ​ຕໍ່​ຄວາມ​ຕ້ອງການ​ໄລຍະ​ສັ້ນ ແລະ ຊ່ວຍເຫຼືອ​ບັນດາ​ປະເທດ ໃນ​ການ​ສ້າງ​ລະບົບ​ສາທາລະນະ​ສຸກ​ໃຫ້​ມີ​ຄວາມ​ເຂັ້ມແຂງ ເພື່ອ​ຮັບ​ມື​ກັບ​ເຫດ​ສຸກ​ເສີນ​ໃນ​ໄລຍະ​ຍາວ ກຸ່ມ WB ໄດ້​ອະນຸມັດ​ການ​ຊ່ວຍເຫຼືອ​ແບບ​ຮີບ​ດ່ວນ​ມູນ​ຄ່າ 14 ຕື້​ໂດ​ລາ​ສະຫະລັດ ຫຼື ປະມານ 125.236 ຕື້​ກີບ ເພື່ອ​ສ້າງ​ຄວາມ​ເຂັ້ມແຂງ​ໃນ​ການ​ຕອບ​ໂຕ້​ກັບ​ພະຍາດໂຄວິດ-19 ໃຫ້​ປະເທດ​ທີ່​ກຳລັງ​ພັດທະນາ ແລະ ຫຼຸດຜ່ອນ​ໄລຍະ​ເວລາ​ຂອງ​ການ​ຟື້ນ​ໂຕ ການ​ຊ່ວຍເຫຼືອ​ທັນທີ ລວມ​ມີ​ການ​ສະໜອງ​ທຶນ ໃຫ້​ຄຳ​ແນະນຳ​ດ້ານ​ນະໂຍບາຍ ແລະ ການ​ຊ່ວຍເຫຼືອ​ດ້ານ​ວິຊາ​ການ ເພື່ອ​ຊ່ວຍ​ບັນດາ​ປະເທດ​ດັ່ງກ່າວ​ຮັບ​ມື​ກັບ​ຜົນ​ກະທົບ​ທີ່​ມີ​ຕໍ່​ລະບົບ​ສາທາລະນະ​ສຸກ ແລະ ເສດຖະກິດ​ຈາກ​ການ​ລະບາດ​ຂອງ​ພະຍາດໂຄວິດ-19 ຄັ້ງ​ນີ້.

ພາບປະກອບຂ່າວ

ນອກ​ນີ້​ຫ້ອງການ IFC ຍັງ​ໄດ້​ສະໜອງ​ທຶນ 8 ຕື້​ໂດ​ລາ​ສະຫະລັດ ຫຼື ປະມານ 71.545 ຕື້​ກີບ ເພື່ອ​ຊ່ວຍ​ບັນດາ​ທຸລະ​ກິດ​ເອກະ​ຊົນ ທີ່​ໄດ້​ຮັບ​ຜົນ​ກະທົບ​ຈາກ​ການ​ລະບາດ​ຂອງ​ພະຍາດໂຄວິດ-19 ແລະ ຮັກສາ​ການ​ຈ້າງ​ງານ IBRD ແລະ IDA ໄດ້​ສະໜອງ​ທຶນ​ເບື້ອງ​ຕົ້ນ 6 ຕື້​ໂດ​ລາ​ສະຫະລັດ ຫຼື ປະມານ 53.667 ຕື້​ກີບ ສຳລັບ​ການ​ຕອບ​ໂຕ້​ດ້ານ​ສາທາລະນະ​ສຸກ ເນື່ອງ​ຈາກ​ຫຼາຍ​ປະເທດ​ຕ້ອງການ​ການ​ຊ່ວຍເຫຼືອ​ເປັນ​ວົງ​ກວ້າງ ກຸ່ມ WB ຈະ​ອະນຸມັດ​ງົບປະມານ 160 ຕື້​ໂດ​ລາ​ສະຫະລັດ ຫຼື ປະມານ 1.430.587 ຕື້​ກີບ ໃນ​ໄລຍະ 15 ເດືອນ​ຂ້າງ​ໜ້າ ໃນ​ການ​ປົກ​ປ້ອງ​ຄົນ​ທຸກ​ຈົນ ແລະ ຜູ້​ດ້ອຍ​ໂອກາດ ສົ່ງເສີມ​ພາກ​ທຸລະ​ກິດ ແລະ ໜູນ​ການ​ຟື້ນ​ໂຕ​ຂອງ​ເສດຖະກິດ.

ທີ່ມາ: vientianemai