ຊົມເຊີຍ! ປີໂຕຣລ້ຽມເທຣດດິ້ງລາວ ມອບອຸປະກອນການແພດ 1,1 ຕື້ກີບ ຊ່ວຍລັດ ຕ້ານໂຄວິດ-19

ຊົມເຊີຍ! ປີໂຕຣລ້ຽມເທຣດດິ້ງລາວ ມອບອຸປະກອນການແພດ 1,1 ຕື້ກີບ ຊ່ວຍລັດ ຕ້ານໂຄວິດ-19

7th April 2020 0 By Admin

ໃນວັນທີ 6 ເມສາ 2020 ທີ່ສໍານັກງານນາຍົກລັດຖະມົນຕີ, ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ ເຊິ່ງເປັນໜຶ່ງໃນບໍລິສັດ ໃນເຄືອ ພົງສະຫວັນກຣູບ ໄດ້ເຂົ້າມອບມອບເຄື່ອງອຸປະກອນການແພດ ແລະ ເຄື່ອງອຸປະໂພກ-ບໍລິໂພກ ເພື່ອສົມທົບຕ້ານການແຜ່ລະບາດ ຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ ໂຄວິດ-19 ໃຫ້ລັດຖະບານ ກໍ່ຄື ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນ  ລວມມູນຄ່າ 1,100,000,000 ກີບ (1,1 ຕື້ກີບ)

ສຳລັບເຄື່ອງອຸປະກອນທີ່ນຳມາຊ່ວຍເຫຼືອປະກອບມີ: ຜ້າອັດປາກ ອະນາໄມ ຈຳນວນ 250,000 ອັນ; ນ້ຳຢາ Alcohol 90 ຈຳນວນ 50 ແກັດ; ຖົງມືແພດ ຈຳນວນ 50 ແກັດ; ປາກະປ່ອງ ຈຳນວນ 240 ແກັດ; ໝີ່ ຈຳນວນ 400 ແກັດ  ລວມມູນຄ່າທັງໝົດ 1,100,000,000 ກີບ (1,1 ຕື້ກີບ).

ຕາງໜ້າມອບໂດຍ ທ່ານ ບຸນຖັນ ຈິດຕະວົງ ຜູ້ອຳນວຍການ ຝ່າຍປະຕິບັດການ ບໍລິສັດ ປີໂຕຣລ້ຽມເທຣດດິ້ງລາວ ມະຫາຊົນ ພ້ອມດ້ວຍຄະນະ ແລະ ໃຫ້ກຽດຮັບໂດຍ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ທັງເປັນຫົວໜ້າສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່.


ຕະຫຼອດໄລຍະການດຳເນີນທຸລະກິດຂອງ ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ ມາເປັນເວລາຍາວນານກວ່າ 12 ປີ, ຍາມໃດບໍລິສັດກໍ່ຄວາມຮັບຜິດຊອບຕໍ່ສັງຄົມສະເໝີມາ ເຊິ່ງວຽກງານນີ້ ກໍແມ່ນວຽກງານໜຶ່ງທີ່ນອນຢູ່ໃນພາລະບົດບາດຂອງ ປີໂຕຣເທຣດ ເຊິ່ງໄດ້ໃຫ້ຄວາມສໍາຄັນ ແລະ ໃຫ້ການສະໜັບສະໜູນ ການເຄື່ອນໄຫວວຽກງານຕ່າງໆ ຂອງທັງພາກລັດຖະບານ, ເອກະຊົນ ແລະ ສັງຄົມມາໂດຍຕະຫຼອດ. ຕົກມາໃນຄັ້ງນີ້ຍ້ອນສະພາບການແຜ່ລະບາດຂອງເຊື້ອພະຍາດ ໂຄວິດ-19 ໄດ້ກະຈາຍເປັນວົງກວ້າງ ແລະ ແຜ່ລາມຢ່າງວ່ອງໄວໄປຫຼາຍປະເທດໃນທົ່ວໂລກ ອັນໄດ້ສ້າງຄວາມເສຍຫາຍຢ່າງໃຫຍ່ຫຼວງຕໍ່ສະພາບເສດຖະກິດ ແລະ ສຸຂະພາບຂອງປະຊາຊົນໃນທົ່ວໂລກ ລວມທັງຊີວິດ ແລະ ຊັບສິນຂອງປະຊາຊົນລາວບັນດາເຜົ່າ.

ຕໍ່ໜ້າສະພາບການທີ່ສັງຄົມກໍາລັງກັງວົນ ແລະ ສັບສົນນີ້ ປີໂຕຣເທຣດ ກໍບໍ່ໄດ້ນີ້ງນອນໃຈໄດ້ສຸມທຸກຄວາມພະຍາຍາມ ແລະ ຄວາມສາມາດຂອງຕົນເຂົ້າໃນການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດດັ່ງກ່າວພາຍໃນອົງກອນຂອງຕົນເອງຕັ້ງແຕ່ຫົວທີ ແລະ ໄດ້ໃຫ້ຄວາມຮ່ວມມືກັບ ກະຊວງສາທາລະນະສຸກ ໃນການໂຄສະນາ-ປະຊາສໍາພັນ ເພື່ອເຜີຍແຜ່ຄວາມຮູ້ພື້ນຖານຕ່າງໆ ທີ່ມີປະໂຫຍດກ່ຽວກັບຜົນຮ້າຍ, ວິທີການປ້ອງກັນ ໃຫ້ຮ່າງຈາກການຕິດເຊື້ອໂຄວິດ-19 ດັ່ງກ່າວອີກດ້ວຍ.

ຂໍ້ມູນ: PetroTrade