ພົນລະເມືອງຢີ່ປຸ່ນ ເດີນທາງກັບປະເທດດ້ວຍຄວາມປອດໄພ ໂດຍຖ້ຽວບິນພິເສດຂອງການບິນລາວ

ພົນລະເມືອງຢີ່ປຸ່ນ ເດີນທາງກັບປະເທດດ້ວຍຄວາມປອດໄພ ໂດຍຖ້ຽວບິນພິເສດຂອງການບິນລາວ

6th April 2020 0 By Admin

ວັນທີ 6 ເມສາ 2020  ພົນລະເມືອງຢີ່ປຸ່ນ ຈຳນວນ 119 ຄົນ ໄດ້ເດີນທາງກັບປະເທດຕົນ ໂດຍຖ້ຽວບິນພິເສດຂອງ ການບິນລາວ, ຫຼັງ ສປປ ລາວ ເກີດມີການແພ່ລະບາດຂອງໂຄວິດ-19 ເຮັດໃຫ້ ລັດຖະບານ ຕ້ອງອອກມາດຕະການເຝົ້າລະວັງຢ່າງເຂັ້ມງວດ ເພື່ອຄວບຄຸມເຊື້ອພະຍາດດັ່ງກ່າວບໍ່ໃຫ້ແພ່ລາມເປັນວົງກວ້າງ ຈຶ່ງໄດ້ມີການປິດດ່ານຊາຍແດນ, ດ່ານທ້ອງຖິ່ນ ພ້ອມທັງຂົນສົ່ງທາງອາກາດ ຈຶ່ງເຮັດໃຫ້ພົນລະເມືອງ ບໍ່ສາມາດເດີນທາງອອກນອກປະເທດໄດ້ ລວມທັງພົນລະເມືອງຢູ່ປຸ່ນ ທີ່ມາທ່ອງທ່ຽວ ແລະ ເຮັດວຽກຢູ່ ສປປ ລາວ.

ໂດຍເພື່ອຕອບສະໜອງຕໍ່ການຮ້ອງຂໍຈາກ ສະຖານທູດຍີ່ປຸ່ນ ປະຈໍາ ສປປ ລາວ, ການບິນລາວ ໄດ້ເຫັນດີຈັດຖ້ຽວບິນພິເສດທີ່ບິນກົງໄປຍັງ ສະໜາມບິນນາຣິຕະ (ແຂວງຈິບະ) ຢູ່ ຍີ່ປຸ່ນ ເຊິ່ງໄດ້ເດີນທາງອອກຈາກ ນະຄອນຫຼວງວຽງຈັນ ກ່ອນຮຸ່ງເຊົ້າຂອງວັນຈັນທີ່ຜ່ານມາ. ເຊິ່ງປັດຈຸບັນ ພົນລະເມືອງໄດ້ເດີນທາງຮອດສະໜາມບິນ ນາຣິຕະ (ແຂວງຈິບະ) ປະເທດຍີ່ປຸ່ນ ດ້ວຍຄວາມສະຫວັດດີພາບ.

ທ່ານ ທາເກວະກະ ເຄໂຊ, ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ, ໄດ້ຕ້ອນຮັບຈຸບິນຂອງຖ້ຽວບິນທີ່ເດີນທາງກັບມາຈາກ ຍີ່ປຸ່ນ ພ້ອມກັບ ທ່ານ ບຸນມາ ຈັນທະວົງສາ, ຜູ້ອຳນວຍການບໍລິສັດການບິນລາວ, ຢູ່ທີ່ ສະໜາມບິນສາກົນວັດໄຕ ໃນຕອນຄໍ່າຂອງ ວັນຈັນ. ທ່ານທູດໄດ້ກ່າວສະແດງຄວາມຂອບໃຈເປັນຢ່າງສູງຕໍ່ກັບຈຸບິນ ແລະ ພະນັກງານຂອງ ການບິນລາວ ທີ່ເຮັດວຽກຢ່າງໜັກທັງເວັນ ແລະ ຄືນເພື່ອເຮັດໃຫ້ຖ້ຽວບິນພິເສດນີ້ເກີດຂຶ້ນ.

ປີນີ້ແມ່ນວາລະຄົບຮອບ 65 ປີ ຂອງສາຍພົວພັນທາງການທູດລະຫວ່າງ ຍີ່ປຸ່ນ ແລະ ສປປ ລາວ. ການຮ່ວມມືຂອງສອງຝ່າຍຢ່າງບໍ່ຄາດຄິດໃນຖ້ຽວບິນພິເສດນີ້ຖືເປັນສັນຍາລັກແຫ່ງມິດຕະພາບລະຫວ່າງສອງປະເທດຂອງພວກເຮົາຢ່າງແທ້ຈິງ ແລະ ໄດ້ສະແດງໃຫ້ເຫັນເຖິງຄວາມມຸ່ງໝັ້ນອັນເຂັ້ມແຂງຂອງພວກເຮົາໃນການຕໍ່ສູ້ຕ້ານພະຍາດໂຄວິດ-19 ຮ່ວມກັນ.

ຂໍ້ມູນ: ສະຖານທູດຍີ່ປຸ່ນປະຈໍາ ສປປລາວ