ຊົມເຊີຍສຸດໃຈ! ຄອບຄົວທ່ານ ໄຊສົງຄາມ ວໍລະຈິດ ມອບລົດກະບະ  2 ຄັນ ໃຫ້ກະຊວງປ້ອງກັນປະເທດ

ຊົມເຊີຍສຸດໃຈ! ຄອບຄົວທ່ານ ໄຊສົງຄາມ ວໍລະຈິດ ມອບລົດກະບະ 2 ຄັນ ໃຫ້ກະຊວງປ້ອງກັນປະເທດ

6th April 2020 0 By Admin

ເພື່ອປະກອບສ່ວນຊ່ວຍເຫຼືອສັງຄົມ ວັນທີ 6 ເມສາ 2020 ຄອບຄົວ ທ່ານ ໄຊສົງຄາມ ວໍລະຈິດ ໄດ້ປະກອບສ່ວນສົມທົບ ລົດກະບະ 2 ຄັນ, ຜ້າປິດປາກ-ດັງ ຈໍານວນ 4 ແກັດ, ນໍ້າດືມລາວາ ຈໍານວນ 40 ແກັດ ລວມມູນຄ່າ 527,480,000 ກີບ ໃຫ້ກະຊວງປ້ອງກັນປະເທດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19, ຢູ່ທີ່ກະຊວງປ້ອງກັນປະເທດ, ເຊິ່ງກ່າວມອບໂດຍ ທ່ານ   ໄຊສົງຄາມ ວໍລະຈິດ ແລະ ກ່າວຮັບໂດຍ ສະຫາຍ ພົນຕີ ແອສະໄໝ ເລືອງວັນໄຊ ຮອງລັດຖະມົນຕີກະຊວງປ້ອງກັນປະເທດ, ເຂົ້າຮ່ວມເປັນສັກຂີ່ພິຍານໂດຍມີ ສະຫາຍ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ.

ທ່ານ ໄຊສົງຄາມ ວໍລະຈິດ ໄດ້ ກ່າວວ່າ: ການມອບລົດ ແລະ ຜ້າປິດປາກ-ດັງ, ນໍ້າດຶ່ມ ໃຫ້ແກ່ກະຊວງປ້ອງກັນປະເທດ ໃນຄັ້ງນີ້ ແມ່ນຍ້ອນມີຄວາມເປັນຫ່ວງເປັນໄຍ ພໍ່ແມ່ປະຊາຊົນທຸກທົ່ວໜ້າ ແລະ ເປັນສ່ວນໜຶ່ງໃນການປະກອບ ສ່ວນເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19. ໃນ ສປປ ລາວ.

ຂະນະດຽວກັນນັ້ນ ສະຫາຍ ພົນເອກ ຈັນສະໝອນ ຈັນຍາລາດ ກໍໄດ້ຂອບໃຈນຳ ຄອບຄົວ ໄຊສົງຄາມ ວໍລະຈິດ ທີ່ເປັນສ່ວນໜຶ່ງໃນການປະກອບສ່ວນໃນ ການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19, ຈະນຳເຄື່ອງທີ່ມາມອບ ຈໍານວນດັ່ງກ່າວນີ້ໄປເປັນສ່ວນໜຶ່ງໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງ ພະຍາດໂຄວິດ-19, ເພື່ອເຮັດໃຫ້ ສປປ ລາວ ຂອງພວກເຮົາຜ່ານວິກິດຄັ້ງນີ້ຜ່ານໄປດ້ວຍດີ.

ໂດຍ: ບຸນຊ້ອຍ