ສສ ຫວຽດນາມ ຢືນຢັນຈະໃຫ້ທຶນການສຶກສາແຂວງເຊກອງ ເປັນປົກກະຕິ

ສສ ຫວຽດນາມ ຢືນຢັນຈະໃຫ້ທຶນການສຶກສາແຂວງເຊກອງ ເປັນປົກກະຕິ

15th November 2019 0 By Admin

ໃນໂອາກາດ ທີ່ທ່ານຫວຽນບ໋າຮຸງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳລາວ ພ້ອມດ້ວຍຄະນະໄດ້ເດີນທາງມາພົບປະຢ້ຽມຢາມ ແລະ ເຮັດວຽກຢູ່ແຂວງເຊກອງຢ່າງເປັນທາງການ ໃນວັນທີ 12 ພະຈິກ 2019 ຜ່ານມາ, ໂດຍເປັນກຽດກ່າວຕ້ອນຮັບຂອງ ທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງ ພ້ອມດ້ວຍຄະນະ ດ້ວຍໄມຕີຈິດມິດຕະພາບອັນອົບອຸ່ນ.

ໃນໂອກາດເດີນທາງມາພົບປະຢ້ຽມຢາມ ແລະ ເຮັດວຽກຢູ່ແຂວງ ເຊກອງ ທັງສອງຝ່າຍກໍ່ໄດ້ມີ ຕີລາຄາສາຍພົວພັນການຮ່ວມມືໃນໄລຍະຜ່ານມາ. ຈາກນັ້ນ, ທ່ານເຈົ້າແຂວງເຊກອງ ກໍ່ໄດ້ລາຍງານກ່ຽວກັບສະພາບການພັດທະນາເສດຖະກິດ – ສັງຄົມຂອງແຂວງເຊກອງໄລຍະຜ່ານມາ ໂດຍໄດ້ຍົກໃຫ້ເຫັນ ສາຍພົວພັນມິດຕະພາບຄວາມສາມັກຄີພິເສດລະຫວ່າງສອງພັກ, ສອງລັດກໍ່ຄືປະຊາຊົນສອງຊາດລາວ – ຫວຽດນາມ, ຫວຽດນາມ-ລາວ ອ້າຍນ້ອງເວົ້າລວມ, ເວົ້າສະເພາະແຂວງເຊກອງ ( ສປປ ລາວ ) ກັບບັນດາແຂວງໃກ້ຄຽງຂອງ ສສ ຫວຽດນາມ ທີ່ມີຊາຍແດນຕິດຈອດກັນ, ໃນການຮ່ວມມືແລກປ່ຽນບົດຮຽນ, ໃຫ້ການຊ່ວຍເຫຼືອດ້ານຕ່າງໆເຊິ່ງກັນ ແລະ ກັນຕະຫຼອດມາ.


ຈາກນັ້ນ, ກໍ່ໄດ້ຍົກໃຫ້ເຫັນເຖິງສະພາບເງືອນໄຂທີ່ພົບຄວາມຫຍຸ້ງຍາກໃນການພັດທະນາ ເປັນຕົ້ນ ປີ 2019 ແຂວງເຊກອງໄດ້ປະເຊີນກັບຜົນກະທົບທາງທໍາມະຊາດ ທີ່ໄດ້ເກີດຂຶ້ນເຊັ່ນ: ບັນຫາການລະບາດຂອງພະຍາດອະຫິວາໝູອາຟຣິກາ ແລະ ບັນຫາອຸທົກກະໄພ ( ນໍ້າຖ້ວມ ) ເຊິ່ງມັນໄດ້ສົ່ງຜົນກະທົບຫຼາຍຢ່າງຕໍ່ກັບການພັດທະນາເສດຖະກິດ – ສັງຄົມຂອງແຂວງ, ເຖິງຢ່າງໃດກໍ່ຕາມ ສໍາລັບການພົວພັນຮ່ວມມືລະຫວ່າງແຂວງເຊກອງ ( ສປປ ລາວ ) ແລະ ບັນດາແຂວງຕ່າງໆຂອງ (ສສ ຫວຽດນາມ ) ກໍ່ໄດ້ມີການຮ່ວມມືຢ່າງຕໍ່ເນື່ອງໂດຍສະເພາະໄດ້ເອື້ອອໍານວຍຄວາມສະດວກ ແລະ ເປີດກວ້າງໃຫ້ແກ່ນັກທຸລະກິດສສ ຫວຽດນາມ ເຂົ້າມາລົງທຶນຢູ່ແຂວງເຊກອງໃຫ້ຫຼາຍຂຶ້ນ.


ໂອກາດນີ້, ທ່ານ ຫວຽນບ໋າຮຸງ ກໍ່ໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງຄະນະນຳແຂວງເຊກອງຢ່າງສູງ ແລະ ກໍ່ໄດ້ຕີລາຄາຄືນການຮ່ວມມືໃນຕະຫຼອດໄລຍະຜ່ານມາ, ໂດຍສະເພາະທາງ ສສ ຫວຽດນາມ ຈະໃຫ້ທຶນດ້ານການສຶກສາແກ່ແຂວງເຊກອງຢ່າງເປັນປົກກະຕິ.