ພົບ​ຜູ້​ຕິດ​ເຊື້ອ​ໂຄວິດ​ລາຍ​ທີ 11 ! ຄາດຈະມີຜູ້ໃກ້ຊິດ, ພົວພັນກັບຜູ້ກ່ຽວ ປະມານອີກຫຼາຍຄົນ

ພົບ​ຜູ້​ຕິດ​ເຊື້ອ​ໂຄວິດ​ລາຍ​ທີ 11 ! ຄາດຈະມີຜູ້ໃກ້ຊິດ, ພົວພັນກັບຜູ້ກ່ຽວ ປະມານອີກຫຼາຍຄົນ

5th April 2020 0 By Admin

ຂ່າວດ່ວນ ! ກວດພົບຜູ້ຕິດເຊື້ອໂຄວິດ-19 ເພີ່ມຂຶ້ນ 1 ຄົນ ເປັນຊາວຕ່າງປະເທດ ທີ່ເຮັດວຽກ ຢູ່ ສປປ ລາວ, ເຮັດໃຫ້ ຍອດລວມສະສົມ ຜູ້ຕິດເຊື້ອທັງໝົດ ໃນປະເທດເພີ່ມຂຶ້ນເປັນ 11 ກໍລະນີ !!!

ວັນທີ 5 ເມສາ 2020 ເວລາ 14:30 ທີ່ສູນປະຕິບັດງານ ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການແຜ່ລະບາດ ຂອງພະຍາດ ໂຄວິດ-19 ຖະແຫຼງຂ່າວໃຫ້ຮູ້ວ່າ ມາຮອດມື້ນີ້ ໄດ້ກວດພົບ ຜູ້ຕິດເຊື້ອ ໂຄວິດ-19 ລາຍໃໝ່ ຢູ່ສປປ ລາວ ເພີ່ມຂຶ້ນ 1 ຄົນ ເປັນຊາວ ປາປົວນິວກີເນຍ 🇵🇬 ເພດຊາຍ ອາຍຸ 55 ປີ ພະນັກງານ ຂອງບໍລິສັດ ພູເບ້ຍ ມາຍນິງ ໂດຍຜູ້ກ່ຽວ ມີອາການ ໄຂ້ ໄອ ແລະ ເປັນຫວັດ ຈຶ່ງໄດ້ມາກວດເຊື້ອ ຢູ່ໂຮງໝໍມິດຕະພາບ, ຜ່ານການເກັບຕົວຢ່າງ ກວດສອບ ພົບວ່າ ຜູ້ກ່ຽວແມ່ນຕິດເຊື້ອ ໂຄວິດ-19 ແລະ ກາຍເປັນຜູ້ຕິດເຊື້ອ ຄົນທີ່ 11 ໃນ ສປປ ລາວ.

ຜູ້ກ່ຽວ ມີປະຫວັດເດີນທາງ ມາຈາກປະເທດ ປາປົວນິວກີເນຍ ຜ່ານປະເທດ ສິງກະໂປ ໃນວັນທີ 22 ມີນາ ແລ້ວມາລົງຜ່ານ ປະເທດໄທ ໃນວັນທີ 23 ມີນາ ກ່ອນເດີນທາງ ມາພັກ ຢູ່ໂຮງແຮມ ຄຣາວພລາຊ້າ ໃນວັນດຽວກັນ. ຈາກນັ້ນ ຈຶ່ງຂຶ້ນລົດຕູ້ ມີຜູ້ໂດຍສານ 11 ຄົນ ອອກໄປສະໜາມ ຢູ່ ພູເບ້ຍ.

ສະຖານະການ ການແຜ່ລະບາດ ຂອງເຊື້ອ ໂຄວິດ-19 ໃນທົ່ວໂລກ 205 ປະເທດ, ຕິດເຊື້ອ 1.2 ລ້ານຄົນ, ເສຍຊີວິດ 12,000 ກ່ວາຄົນ ຊຶ່ງແມ່ນຍັງມີແນວໂນ້ມ ເພີ່ມສູງຂຶ້ນ ຢ່າງຕໍ່ເນື່ອງ ແລະ ນ່າຢ້ານກົວທີ່ສຸດ, ຮຽກຮ້ອງໃຫ້ ປະຊາຊົນລາວບັນດາເຜົ່າ ຈົ່ງເພີ່ມທະວີ ເອົາໃຈໃສ່ ຮັກສາຕົນເອງ ແລະ ປະຕິບັດຕາມມາດຕະຖານ ການປ້ອງກັນ ຂອງລັດຖະບານລາວ ວາງອອກ ຢ່າງເຄັ່ງຄັດ, ພ້ອມທັງກັກຕົນເອງຢູ່ເຮືອນ ບໍ່ອອກໄປໃສ ຍົກເວັ້ນກໍລະນີ ຈໍາເປັນ ແນ່ໃສ່ຕ້ານ ແລະ ຄວບຄຸມ ເຊື້ອໄວຣັສນີ້ ບໍ່ໃຫ້ເພີ່ມຂຶ້ນຕື່ມ ໃນ ສປປ ລາວ.

ຈາກ: FM 90