4 ເມ​ສາ ລາວ ບໍ່​ພົບ​ຜູ້​ຕິດ​ເຊື້ອ​ໂຄວິ​ດ​ເພີ່ມ ​ຂ່າວ​ດີ 3 ມື້​ລຽນ

4 ເມ​ສາ ລາວ ບໍ່​ພົບ​ຜູ້​ຕິດ​ເຊື້ອ​ໂຄວິ​ດ​ເພີ່ມ ​ຂ່າວ​ດີ 3 ມື້​ລຽນ

4th April 2020 0 By Admin

ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ – 19 ໄດ້ຖະແຫຼງຂ່າວປະຈຳວັນທີ 4 ເມສາ 2020 ທີ່ກະຊວງສາທາລະນະສຸກ ໂດຍລາຍງານບໍ່ພົບຜູ້ຕິດເຊື້ອເພີ່ມ ຍອດລວມຍັງຄົງທີ່10 ກໍລະນີ. ພ້ອມຮຽກຮ້ອງໃຫ້ ທຸກພາກສ່ວນໃນສັງຄົມມີສ່ວນຮ່ວມຢ່າງເປັນເຈົ້າການດ້ວຍຄວາມ ຮັບຜິດຊອບສູງ ໃນການປະຕິບັດຄຳສັ່ງເລກທີ06/ນຍ.

ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ ກ່າວວ່າ:ໃນວັນທີ 3 ເມສາ 2020, ໄດ້ມີກໍລະນີສົງໃສ ແລະ ເກັບຕົວຢ່າງມາກວດ 53 ຄົນ ໄດ້ແກ່ ນະຄອນຫຼວງວຽງຈັນ 39 ຄົນ ໃນນັ້ນ(ເປັນຄົນລາວ 38 ຄົນ ແລະ ເປັນຄົນຈີນ 1 ຄົນ); ແຂວງບໍ່ແກ້ວ 6 ຄົນ; ບໍລິຄຳໄຊ ແລະ ຄຳມ່ວນ ແຂວງລະ 3 ຄົນ; ແຂວງ ວຽຈັນ ແລະ ແຂວງສະຫວັນນະເຂດ ແຂວງລະ 1 ຄົນ.ທັງໝົດໄດ້ເກັບຕົວຢ່າງ ແລະ ຜົນກວດເປັນລົບ ຖືວ່າມື້ນີ້ກໍຍັງບໍ່ມີກໍລະນີໃໝ່.

ເລີ່ມແຕ່ເດືອນມັງກອນ ຮອດວັນທີ 3 ເມສາ 2020 ໄດ້ເກັບຕົວຢ່າງມາກວດທັງໝົດ 573 ຄົນ, ກວດພົບເຊື້ອ 10 ຄົນ.

ປະຈຸບັນຈຳນວນກໍລະນີໃກ້ຊິດສຳພັດກັບຄົນເຈັບ ທີ່ກຳລັງຕິດຕາມມີ 216 ຄົນຄື ນະຄອນຫຼວງ 141 ຄົນ, ຫຼວງພະບາງ 49 ຄົນ, ອຸດົມໄຊ 24 ຄົນ, ຄຳມ່ວນ 2 ຄົນ.

ຕໍ່ກັບຜູ້ສຳຜັດໃກ້ຊິດດັ່ງກ່າວ ພວກເຮົາໄດ້ໃຫ້ເຂົາເຈົ້າກັກບໍລິເວນຕົນເອງຢູ່ເຮືອນຂອງເຂົາເຈົ້າ ແລະ ມີແພດເຮົາໄປຕິດຕາມອາການທຸກມື້ ຖ້າຫາກມີອາການ ຫຼື ກວດພົບວ່າເປັນບວກກໍຕ້ອງໄດ້ນຳມາ ປິ່ນປົວຢູ່ໂຮງໝໍຕາມຫຼັກການຂອງການປິ່ນປົວໂຄວິດ-19.

ຄະນະສະເພາະກິດ ຍັງຮຽກຮ້ອງໃຫ້ ທຸກພາກສ່ວນໃນສັງຄົມມີສ່ວນຮ່ວມຢ່າງເປັນເຈົ້າການດ້ວຍຄວາມ ຮັບຜິດຊອບສູງ ເປັນຕົ້້ນຕໍ່ເຈົ້າໜ້າທີ່ຢູ່ດ່ານຊາຍແດນ, ຜູ້ຖືກແນະນຳ ໃຫ້ຈຳກັດບໍລິເວນຕົນເອງ, ຄອບຄົວຂອງຜູ້ຖຶກແນະນຳຈຳກັດຕົນເອງ, ອຳນາດການປົກຄອງທ້ອງຖິ່ນ, ສະເພາະແພດໝໍ, ພະຍາບານຂອງພວກເຮົາກໍຈະໃຊ້ຄວາມພະຍາຍາມສູງ ເພື່ອປິ່ນປົວຄົນເຈັບຕາມຫຼັກວິທະຍາສາດ ເພື່ອໃຫ້ຫາຍດີໄວ.

ຈາກ: https://laoedaily.com.la