ຄະນະຜູ້ແທນຕໍາຫຼວດ ແຂວງຫູນານ ພົບປະຢ້ຽມຢາມ ແລະ ເຮັດວຽກງານຢູ່ ປກສ ນວ

ຄະນະຜູ້ແທນຕໍາຫຼວດ ແຂວງຫູນານ ພົບປະຢ້ຽມຢາມ ແລະ ເຮັດວຽກງານຢູ່ ປກສ ນວ

15th November 2019 0 By Lao Admin

ໃນຕອນເຊົ້າວັນທີ 14 ພະຈິກ 2019, ຢູ່ຫ້ອງປະຊຸມກອງບັນຊາການ ປກສ ນວ, ຄະນະຜູ້ແທນ ກອງບັນຊາການຕໍາຫຼວດ ແຂວງຫູນານ ສາທາລະນະລັດ ປະຊາຊົນຈີນ, ນໍາໂດຍ ທ່ານ ຈ້າວ ໂຍມີ່ງ ຫົວໜ້າຫ້ອງການ ຜູ້ຊີ້ນໍາວຽກງານສືບສວນ-ສອບສວນ, ຫົວໜ້າຄະນະຜູ້ແທນກອງບັນຊາການການຕໍາຫຼວດ ແຂວງຫູນານ ພ້ອມຄະນະ ໄດ້ເຂົ້າພົບປະຢ້ຽມຢາມ ແລະ ປຶກສາຫາລືວຽກງານສືບສວນ-ສອບສວນ ກັບຄະນະນໍາ ປກສ ນະຄອນຫຼວງວຽງຈັນ ໃຫ້ກຽດຕ້ອນຮັບໂດຍ ພັທ ຈັນຫອມ ແກ້ວສຸລະໄຊ ຮອງຫົວໜ້າກອງບັນຊາການ ປກສ ນວ ພ້ອມດ້ວຍຄະນະ.

ໃນການພົບປະຢ້ຽມຢາມ ແລະ ເຮັດວຽກຂອງ 2 ກອງບັນຊາການ ໃນຄັ້ງນີ້ ພັທ ຈັນຫອມ ແກ້ວສຸລະໄຊ ຮອງຫົວໜ້າກອງບັນຊາການ ປກສ ນວ ໄດ້ລາຍງານສະພາບຈຸດພິເສດ, ທີ່ຕັ້ງ ຂອງນະຄອນຫຼວງວຽງຈັນ ໃຫ້ຄະນະຜູ້ແທນ ກອງບັນຊາການຕໍາຫຼວດ ແຂວງຫູນານ ສປ ຈີນ ຮັບຮູ້ວ່າ: ປັດຈຸບັນ ມີພົນລະເມືອງຈີນ ເຂົ້າມາດຳເນີນທຸລະກິດ, ລົງທຶນສ້າງບໍລິສັດເຖິງ 20 ກວ່າບໍລິສັດ, ສ້າງສູນການຄ້າ-ຕະຫຼາດມີ 6 ແຫ່ງ ແລະ ພິເສດ ແມ່ນການລົງທຶນກໍ່ສ້າງເສັ້ນທາງລົດໄຟລາວ-ຈີນ ແລະ ທາງດ່ວນ ນະຄອນຫຼວງວຽງຈັນ ຫາ ເມືອງວັງວຽງ ແຂວງວຽງຈັນ; ເຊິ່ງກໍາລັງດໍາເນີນການກໍ່ສ້າງຢູ່; ໃນນີ້ຖືວ່າເປັນການປະກອບສ່ວນສໍາຄັນ ໃນການສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງສີວິໄລ. ຄຽງຄູ່ກັນນີ້ ຍັງມີຄົນຕ່າງປະເທດຈໍານວນໜຶ່ງ ລັກລອບເຂົ້າເມືອງແບບຜິດກົດໝາຍ, ປະກອບອາຊີບບໍ່ຖືກຕ້ອງ, ສໍ້ໂກງຊັບ ແລະ ອື່ນໆ;

ເຊິ່ງໄລຍະຜ່ານມາ ປກສ ນວ ໄດ້ເອົາໃຈໃສ່ແກ້ໄຂມ້າງໄດ້ຫຼາຍເລື່ອງ ແລະ ໄດ້ຈັດສົ່ງໃຫ້ທາງຕໍາຫຼວດ ສປ ຈີນ ເພື່ອກັບໄປດໍາເນີນຄະດີທັງໝົດ.
ໃນໂອກາດນີ້ ທ່ານ ຈ້າວ ໂຍມີ່ງ ຫົວໜ້າຫ້ອງການ ຜູ້ຊີ້ນໍາວຽກງານສືບສວນ-ສອບສວນ, ຫົວໜ້າຄະນະຜູ້ແທນກອງບັນຊາການການຕໍາຫຼວດ ແຂວງຫູນານ ສປ ຈີນ ໄດ້ກ່າວຍ້ອງຍໍຊົມເຊີຍຕໍ່ຜົນງານການປະຕິບັດໜ້າທີ່ໃນໄລຍະຜ່ານມາ; ພ້ອມທັງເຊີນຊວນໃຫ້ຄະນະນໍາ ປກສ ນວ ໄປຢ້ຽມຢາມ, ແລກປ່ຽນບົດຮຽນ ດ້ານວຽກງານວິຊາສະເພາະຢູ່ແຂວງຫູນານ; ພ້ອມກ່າວຂອບໃຈຕໍ່ຄະນະນໍາ ປກສ ນວ ທີ່ໃຫ້ການຕ້ອນຮັບຢ່າງອົບອຸ່ນ ແລະ ອວຍພອນໃຫ້ ພະນັກງານທຸກສະຫາຍ ຈົ່ງມີສຸຂະພາບແຂງແຮງ ປະສົບຜົນສໍາເລັດໃນໜ້າທີ່ການງານ;

 

ສືບຕໍ່ຮັດແໜ້ນສາຍພົວພັນອັນດີງາມຂອງຂອງ ປກສ ນະຄອນຫຼວງວຽງຈັນ ກັບຕໍາຫຼວດ ແຂວງຫູນານ ກໍຄື 2 ຊາດລາວ-ຈີນ ໃຫ້ນັບມື້ມີຄວາມແໜ້ນແຟ້ນຍິ່ງໆຂຶ້ນ.

 

ທີ່ມາ: ປ້ອງກັນຄວາມສະຫງົບນະຄອນຫຼວງວຽງຈັນ