ກະຊວງປ້ອງກັນປະເທດ ເຂັ້ມງວດກວດສຸຂະພາບ ນາຍ ແລະ ພົນທະຫານ ເຂົ້າ-ອອກ ປະຕູໂຂງ

ກະຊວງປ້ອງກັນປະເທດ ເຂັ້ມງວດກວດສຸຂະພາບ ນາຍ ແລະ ພົນທະຫານ ເຂົ້າ-ອອກ ປະຕູໂຂງ

4th April 2020 0 By Admin

ກະຊວງປ້ອງກັນປະເທດ ກໍຄື ໜ່ວຍງານສະເພາະກິດ ແພດໝໍ ຫ້ອງວ່າການ ກະຊວງ ໄດ້ເຂັ້ມງວດ ໃນການກວດສຸຂະພາບ ນາຍ ແລະ ພົນທະຫານ ທີ່ ເຂົ້າມາພົວພັນ ແລະ ເຮັດວຽກຢູ່ພາຍໃນສຳນັກງານ, ອົງການ, ກອງ, ຫ້ອງການ ຫລື ເຂົ້າມາເຮັດວຽກໂດຍກົງກັບຜູ້ບັນຊາ ກໍຄື ການນໍາຂັ້ນສູງ ຕ້ອງປະຕິບັດຢ່າງເຂັ້ມງວດຕາມລະບຽບຫລັກການຂອງແພດ ເພື່ອປ້ອງກັນພະຍາດ ໂຄວິດ -19 ໂດຍມີການຈັດຕັ້ງແບ່ງໜ່ວຍງານແພດ ຕິດຕາມແຕ່ລະຈຸດເຂົ້າ-ອອກ ກະຊວງປ້ອງກັນປະເທດ ເຊີ່ງໄດ້ກວດວັດອຸນຫະພູມ ເພື່ອຮັບປະກັນເພີ່ມທະວີມາດຕະການສະກັດກັ້ນ, ກັນການລະບາດຂອງພະຍາດຢ່າງເຂັ້ມງວດຮັດກຸມ.


ສະຫາຍ ພັນໂທ ຄໍາຜິວ ມິດສຸພົນ ຫົວໜ້າ ພະແນກເສນາຮັກ ຫ້ອງວ່າການກະຊວງປ້ອງກັນປະເທດ ທັງເປັນຫົວໜ້າຊີ້ນຳລວມ ໜ່ວຍງານຮັບຜິດຊອບກວດສຸຂະພາບ ນາຍ ແລະ ພົນທະ ຫານ ເຂົ້າ-ອອກ ສຳນັກງານກະຊວງປ້ອງກັນປະເທດໃຫ້ສຳພາດວ່າ:

ໂດຍປະຕິບັດຄຳສັ່ງຂອງຂັ້ນເທິງ ໃນການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດອັກເສບປອດ ໂຄວິດ-19 ກະຊວງປ້ອງກັນປະເທດກໍຄື ຄະນະສະເພາະກິດ ຊີ້ນຳໃຫ້ພະແນກເສນາຮັກ, ບັນດາກົມໃຫຍ່, ຫ້ອງວ່າການ ຈັດຕັ້ງກວດ, ຄັດກອງ ນາຍ ແລະ ພົນທະຫານທີ່ ເຂົ້າ-ອອກ ສຳນັກງານກະຊວງປ້ອງກັນປະເທດ ໂດຍແບ່ງອອກເປັນສອງຈຸດໃຫຍ່ຄື:

ຈຸດທີ 1 ຢູ່ດ້ານໜ້າປະຕູໂຂງໃຫຍ່ ປະກອບມີ 3 ຈຸ,ຈຸດທີ 2 ຢູ່ດ້ານຫລັງປະຕູໂຂງນ້ອຍ ປະກອບມີ 5 ຈຸ ເຮັດໜ້າທີ່ກວດ, ວັດແທກອຸນຫະພູມ, ຄັດກອງ ຢ່າງເຂັ້ມງວດ ຕໍ່ນາຍ ແລະ ພົນທະຫານທີ່ ເຂົ້າ-ອອກ ຕະຫລອດເຖິງແຂກທີ່ເຂົ້າມາພົວພັນເຮັດວຽກຢູ່ພາຍໃນສຳນັກງານ, ອົງການ, ກອງ, ຫ້ອງການ ຫລື ເຂົ້າມາເຮັດວຽກ ໂດຍກົງກັບຜູ້ບັນຊາ ກໍຄື ການນຳຂັ້ນສູງ ຕ້ອງປະຕິບັດຢ່າງເຂັ້ມງວດຕາມລະບຽບຫຼັກການຂອງແພດ ຖ້າກວດພົບເຫັນກໍລະນີສົງໃສ ຫລື ເຂົ້າຕາມຫຼັກການຂອງການເຝົ້າລະວັງພະຍາດ ໂຄວິດ-19 ກໍຈະໄດ້ກັກຕົວ ແລະ ປະຕິ ບັດຕາມຂັ້ນຕອນການແພດຕໍ່ໄປ.

ໂດຍ: ໂຊເລ້ ບຸນເຮືອງ