ມິດຕະພາບບໍ່ເຄີຍເຫືອດແຫ້ງ! ຫວຽດນາມມອບເຄື່ອງຊ່ວຍເຫຼືອ 1 ແສນໂດລາແກ່ລາວ ຕ້ານໂຄວິດ

ມິດຕະພາບບໍ່ເຄີຍເຫືອດແຫ້ງ! ຫວຽດນາມມອບເຄື່ອງຊ່ວຍເຫຼືອ 1 ແສນໂດລາແກ່ລາວ ຕ້ານໂຄວິດ

3rd April 2020 0 By Admin

ໃນວັນທີ 3 ເມສາ 2020 ຢູ່ທີ່ກະຊວງການຕ່າງປະເທດຫວຽດນາມໄດ້ມີພິທີມອບ-ຮັບ ເຄື່ອງຊ່ວຍເຫຼືອອຸປະກອນການແພດ ຈາກລັດຖະບານແຫ່ງ ສສ ຫວຽດນາມໃຫ້ແກ່ ລັດຖະບານແຫ່ງ ສປປ ລາວ ໃນມູນຄ່າ 100.000 ໂດລາສະຫະລັດ ຈາກກະຊວງສາທາລະນະສຸກຫວຽດນາມ 5 ຕື້ດົງ ແລະ ຈາກກະຊວງວິທະຍາສາດ ແລະ ເຕັກໂນໂລຊີຫວຽດນາມ 250 ລ້ານດົງ. ຕາງໜ້າລັດຖະບານຫວຽດນາມ ກ່າວມອບໂດຍ ທ່ານ ຫງວຽນກ໋ວກຊູງ ຮອງລັດຖະມົນຕີກະຊວງການຕ່າງປະເທດຫວຽດນາມ ແລະ ຕ່າງໜ້າລັດຖະບານແຫ່ງ ສປປ ລາວ ກ່າວຮັບ ໂດຍ ທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍພະນັກງານທັງສອງຝ່າຍເຂົ້າຮ່ວມເປັນພິຍານ.

ເຖິງວ່າ ສສ ຫວຽດນາມ ຍັງປະສົບກັບຄວາມຍຸ້ງຍາກຫຼາຍປະການໂດຍສະເພາະກຳລັງປະເຊີນໜ້າກັບພະຍາດໂຄວິດ-19 ທີ່ກໍາລັງແພ່ລະບາດໜັກພໍສົມຄວນ, ແຕ່ບົນຈິດໃຈການພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ, ກໍ່ຄືນ້ຳໃຈສາກົນກຳມະຊີບອັນສູງສົງຂອງຕົນລັດຖະບານ ແລະ ປະຊາຊົນຫວຽດນາມ ຍັງໄດ້ບິແບ່ງວັດຖຸປັດໃຈມາຊ່ວຍລັດຖະບານ ກໍ່ຄືປະຊາຊົນລາວໃນການຕ້ານພະຍາດໂຄວິດ-19.

ໃນໂອກາດກ່າວຮັບເຄື່ອງຊ່ວຍເຫຼືອດັ່ງກ່າວ ທ່ານ ແສງເພັດ ຮຸ່ງບຸນຍວງ ໄດ້ສະແດງຄວາມຮູ້ບຸນຄຸນ ແລະ ຂອບອົກຂອບໃຈຢ່າງຈິງໃຈມາຍັງພັກ, ລັດຖະບານ ແລະ ປະຊາາຊົນຫວຽດນາມ ທີ່ມອບເຄື່ອງຊ່ວຍເຫຼືອດັ່ງກ່າວນີ້ໃຫ້ແກ້ ສປປ ລາວ ແລະ ຍັງໄດ້ຢືນຢັນວ່າອຸປະກອນການແພດທີ່ໄດຮັບການຊ່ວຍເຫຼືອຄັ້ງນີ້ ຈະຖືກນຳໃຊ້ເຂົ້າໃນການສະກັດກັ້ນ ແລະ ຕ້ານພະຍາດໂຄວິດ-19 ຢູ່ ສປປ ລາວຢ່າງມີປະສິດທິຜົນສູງ.

ທີ່ມາ: ຂ່າວສານປະເທດລາວ