ບ້ານ ທົ່ງເໝືອດ, ບ້ານຫີນໂງ່ນ ແລະ ບ້ານນ້ຳແປັກ ເມືອງກາສີ ແຂວງວຽງຈັນ ໄດ້ຮັບເຂົ້າຊ່ວຍເຫຼືອ

ບ້ານ ທົ່ງເໝືອດ, ບ້ານຫີນໂງ່ນ ແລະ ບ້ານນ້ຳແປັກ ເມືອງກາສີ ແຂວງວຽງຈັນ ໄດ້ຮັບເຂົ້າຊ່ວຍເຫຼືອ

14th November 2019 0 By Admin

ດ້ວຍຄວາມເປັນຫ່ວງເປັນໄຍ ຂອງຄະນະພັກອຳນາດການປົກຄອງຂັ້ນເທີງ ກໍ່ຄືພະແນກແຮງງານ ແລະ ສະຫວັດດີການສັງຄົມ ທີ່ມີຕໍ່ພໍ່ແມ່ປະຊາຊົນບັນດາເຜົ່າ ແລະ ກໍ່ເພື່ອເປັນການຊ່ວຍເຫຼືອ ແກ້ໄຂບັນເທົາທຸກ, ເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນ ນັບມື້ນັບດີຂື້ນ.

ໃນວັນທີ 12 ພະຈິກ 2019 ພະແນກແຮງງານ ແລະ ສະຫວັດດີການສັງຄົມ ແຂວງວຽງຈັນ ໄດ້ນຳເອົາເຂົ້າສານໜຽວ ຈຳນວນ 5.034 ກິໂລ ມອບໃຫ້ປະຊາຊົນຢູ່ພາຍໃນບ້ານ ທົ່ງເໝືອດ ມີຈໍານວນ 64 ຄອບຄົວ, ມີ 398 ຄົນ ໄດ້ຮັບເຂົ້າທັງໝົດ 2.388 ກິໂລ, ບ້ານ ຫີນໂງ່ນ ມີຈໍານວນ 42 ຄອບຄົວ, ມີ 269 ຄົນ ໄດ້ຮັບເຂົ້າທັງໝົດ 1.614 ກິໂລ ແລະ ບ້ານ ນ້ຳແປັກ ມີຈໍານວນ 30 ຄອບຄົວ, ມີ 172 ຄົນ ໄດ້ຮັບເຂົ້າທັງໝົດ 1.032 ກິໂລ ນອກຈາກນີ້ກໍ່ຍັງໄດ້ມອບເຂົ້າຊ່ວຍເຫຼືອຄອບຄົວທຸກຈົນໃນທົ່ວເມືອງ ຈໍານວນ 318 ຖົງ. ພິທີມອບ – ຮັບດັ່ງກ່າວໄດ້ຈັດຂື້ນຢູ່ທີ່ ຫ້ອງການແຮງງານ ແລະສະຫວັດດີການສັງຄົມເມືອງກາສີ.

ເຊີ່ງໃຫ້ກຽດກ່າວມອບໂດຍແມ່ນ ທ່ານ ຍົມສອນ ຄໍາມາສີ ຫົວໜ້າພະແນກແຮງງານ ແລະ ສະຫວັດດີການສັງຄົມເເຂວງວຽງຈັນ ທັງເປັນຮອງປະທານຄະນະກຳມະການປ້ອງກັນ ແລະ ຄວບຄຸມໄພພິແຂວງວຽງຈັນ ແລະ ຂື້ນກ່າວຮັບໂດຍແມ່ນ ທ່ານ ຄໍາສົດ ເພັດລາວັນ ກໍາມະການພັກແຂວງ ເລຂາພັກເມືອງ ເຈົ້າເມືອງໆກາສີ ໂດຍຊ້ອງໜ້າຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນເມືອງ , ນາຍບ້ານທັງ 3 ບ້ານ ແລະ ຄອບຄົວຜູ້ທີ່ຖືກຜົນກະທົບນ້ຳຖ້ວມສຸ ແລະ ແຫ້ງແລ້ງ ເຂົ້າຮ່ວມເປັນສັກຂີພິຍານ.

ພ້ອມນັ້ນ, ທ່ານກໍ່ໄດ້ກ່າວສະແດງຄວາມຂອບອົກຂອບໃຈມາຍັງຄະນະພັກຂັ້ນເທິງ ໂດຍສະເພາະກໍ່ແມ່ນພະແນກແຮງງານ ແລະ ສະຫວັດດີການສັງຄົມແຂວງວຽງຈັນ ທີ່ໄດ້ມີຄວາມເປັນຫ່ວງເປັນໄຍເຖີງຊີວິດການເປັນຢູ່ ຂອງພໍ່ແມ່ປະຊາຊົນພາຍໃນເມືອງກາສີ ໂດຍສະເພາະກໍ່ແມ່ນບ້ານ ທີ່ໄດ້ຮັບຜົນກະທົບຈາກໄພພິບັດ ນ້ຳຖ້ວມສຸ ແລະ ແຫ້ງແລ້ງໃນໄລຍະຜ່ານມາ.

ສ່ວນວ່າເຂົ້າທີ່ນຳມາຊ່ວຍເຫຼືອໃນຄັ້ງນີ້ ກໍ່ຂໍໃຫ້ໃຫ້ ພໍ່ແມ່ປະຊາຊົນ ຈົ່ງພ້ອມກັນສຸມຈິດສຸມໃຈ ເຂົ້າໃນການສ້າງສາພັດທະນາເສດຖະກິດຄອບຄົວຂອງຕົນ ໃຫ້ມີຄວາມເຂັ້ມແຂງບໍ່ວ່າຈະເປັນການປູກຝັງ – ລ້ຽງສັດ ໃຫ້ນັບມື້ນັບມີການຂະຫຍາຍຕົວຂື້ນເປັນກ້າວໆ ຖ້າເຮັດນາປີບໍ່ໄດ້ກໍ່ໃຫ້ຫັນມາເຮັດນາແຊງທົດແທນ, ເອົາໃຈໃສ່ຮັດແໜ້ນຄວາມສາມັກຄີຊ່ວຍເຫຼືອເຊີ່ງກັນ ແລະ ກັນ ໃຫ້ນັບມື້ນັບມີຄວາມແໜ້ນແຟ້ນຍິ່ງໆຂື້ນ.

.

.

ຂ່າວ: ເມືອງກາສີ
ນາງ ດາລັກ